اتالعان ۆولەيبول ورتالىعىندا ەرلەر مەن ايەلدەر قۇرامالارىنىڭ نەگىزگى كوماندالارى, جاستاردىڭ قوس كوماندالارى ءۇشىن ەكى بولەك جاتتىعۋ زالى بار. اشىلۋ سالتاناتىندا ءسوز العان وبلىس باسشىسى بەيبىت يساباەۆ بۇل سپورت كەشەنى ءوڭىر ءۇشىن ماڭىزى زور ورتالىق بولاتىنىن ايتتى.
«مەملەكەت باسشىسى بىزگە بۇقارالىق سپورتتى دامىتۋعا بارىنشا قولايلى جاعداي جاساۋ مىندەتىن جۇكتەدى. وسى ورايدا, «جەتىسۋ» كلۋبى ءۇشىن زاماناۋي ۆولەيبول ورتالىعىنىڭ اشىلۋى سپورتشىلارىمىزدىڭ كاسىبي وسۋىنە, ءوزىمىزدىڭ جاس كادرلاردى تاربيەلەۋگە قولايلى جاعداي تۋعىزۋدا. الداعى ۋاقىتتا «جەتىسۋ» ۆولەيبول كلۋبىنىڭ اكادەمياسىن قۇرامىز. وعان ورتا مەكتەپتەردەن ۆولەيبولعا قابىلەتى بار بالالار ىرىكتەلىپ الىنادى. بۇل اكادەميادا ولار جالپى ءبىلىم بەرۋ باعدارلاماسىن مەڭگەرىپ قانا قويماي, ۆولەيبولمەن قارقىندى تۇردە اينالىساتىن بولادى. وسىلايشا ءبىز ءوز ويىنشىلارىمىزدى, بولاشاق چەمپيوندارىمىزدى كەزەڭ-كەزەڭىمەن تاربيەلەيتىن بولامىز», دەدى وبلىس اكىمى ب.يساباەۆ.
وبلىس باسشىسى ۆولەيبول ورتالىعى جەرگىلىكتى بيۋدجەتتەن, ال سپورتشىلارعا ارنالعان تۇرعىن ءۇي ينۆەستوردىڭ قاراجاتىنا سالىنعانىن اتاپ ءوتتى. بەيبىت يساباەۆ سالتاناتتى جيىنعا قاتىسقان كاسىپكەر-مەتسەنات كەڭەس راقىشەۆقا جەتىسۋداعى بۇقارالىق سپورتتى دامىتۋعا قوسقان ۇلەسى ءۇشىن وبلىس تۇرعىندارى اتىنان العىسىن ءبىلدىردى.
ايماق باسشىسى ءوز سوزىندە, سپورت ۇيىمدارى مەن جەكەلەگەن سپورتشىلاردىڭ كوممەرتسيالىق كىرىستەرىن ارتتىرۋ ارقىلى ناتيجەلەردى جاقسارتۋعا جانە قولداۋدى تارتۋعا مۇمكىندىك بەرەتىن كاسىبي سپورتتى كەزەڭ-كەزەڭىمەن كوممەرتسيالاندىرۋ جوسپارلارىن اتاپ ءوتتى.
ۆولەيبول ورتالىعىنىڭ لەنتا قيۋ ءراسىمى سالتاناتتى تۇردە وتكەن سوڭ, قوناقتار جاڭا نىساننىڭ ءىشىن ارالادى.
اشىلۋ سالتاناتىنا ەلىمىزدىڭ ابىرويىن حالىقارالىق ارەنادا اسقاقتاتقان بەلگىلى سپورتشىلار قاتىستى. ولاردىڭ قاتارىندا وليمپيادا جۇلدەگەرى ماۋلەن مامىروۆ, «قازاقستان بارىسى» اتانعان ۇلان رىسقۇل, «قازاقستان بارىسى» ءتۋرنيرىنىڭ كۇمىس جۇلدەگەرى, قازاق كۇرەسىنەن الەم چەمپيونى رۋسلان ابدىرازاقوۆ, «جەتىسۋ» كاسىبي ۆولەيبول كلۋبىنىڭ بۇرىنعى ويىنشىلارى جانە سپورت ارداگەرلەرى كارينا يشيمتسەۆا, ولگا دانچەنكو, مارينا اندرەەۆا, تاتيانا پيۋروۆا, كارينا تاتكولار بار.
«جەتىسۋ» كاسىبي ۆولەيبول كلۋبىنىڭ ديرەكتورى نياز جانتىلەۋوۆ ۆولەيبول ورتالىعى جوعارى كاسىبي دەڭگەيدەگى جوعارى ساپالى ماتەريالدىق-تەحنيكالىق بازاسىمەن ەرەكشەلەنەتىنىن ايتتى.
«ۆولەيبول – سپورتشىلار ءۇشىن فيزيكالىق تۇرعىدان قيىن, كەڭ اۋقىمدى قوزعالىستاردى قاجەت ەتەتىن سپورت ءتۇرى. سوندىقتان بۇل سپورتپەن اينالىسۋ ءۇشىن سپورتشىلارعا جوعارى ساپالى ەدەن قاجەت. ەڭ ءبىرىنشى, ەدەنەن سپورتشى جاراقات الماۋى كەرەك. ەدەن جۇمساق, سوققىعا ءتوزىمدى بولعانى ءجون. مىنە, جاڭا ورتالىقتا وسى ەڭ ماڭىزدى تالاپ ءبىرىنشى كەزەكتە ورىندالادى. ەدەن فرانتسيا قالاسىنان جەتكىزىلدى. مۇندا بارلىعى دا حالىقارالىق وليمپيادا تالاپتارىنا ساي», دەدى ن. جانتىلەۋوۆ.
ايەلدەر ۆولەيبول كومانداسىنىڭ ويىنشىسى يانا راحماتۋللينا دا ءوز اسەرىمەن ءبولىستى.
ء«بىز وسى جاڭا زالدا وقۋ-جاتتىعۋ جيىنىن وتكىزدىك. زال, ارينە, وتە جاقسى, جارىق, ىڭعايلى, كەڭ. ەدەندەر ىڭعايلى, تەرافلەكس تايعاق, بۇل ويىنشىلار ءۇشىن ماڭىزدى. بۇرىن ءبىز «جاستار» سپورت سارايىندا جاتتىعاتىنبىز. ول جاقتا جاقسى جاعداي بار. بىراق باسقا سپورت تۇرلەرىنەن جارىس وتكەندە جاتتىعا المايمىز. جاتتىعۋلار سانىن ازايتۋ, ارينە, جالپى كوماندانىڭ دايىندىق ساپاسىنا اسەر ەتەدى. ەندى ءوز ورتالىعىمىزدا ءوزىمىز ەمىن-ەركىن, كەز كەلگەن ۋاقىتتا جاتتىعۋىمىزدى جاسايمىز. بۇل كلۋبتىڭ كاسىبي جەتىستىكتەرىنە وڭ اسەر ەتەتىنىنە سەنىمدىمىن. ەڭ باستىسى – جاقىن جەردە سپورتشىلارعا ارنالعان ءۇي دە سالىنعانى وتە ىڭعايلى», دەدى سپورتشى.
جاڭا ۆولەيبول ورتالىعىندا ەكى جاتتىعۋ بولمەسى بار. ياعني, ايەلدەر مەن ەرلەر كوماندالارى بولەك جاتتىعادى. ۆولەيبول ورتالىعىنىڭ ءۇش قاباتتى عيماراتىنىڭ جالپى اۋدانى 2,3 مىڭ شارشى مەتردەن اسادى. ۆولەيبول ورتالىعىنىڭ 1-قاباتىندا جاتتىعۋ زالى, 2-قاباتىندا جاتتىقتىرۋشىلار بولمەسى, كيىم اۋىستىراتىن بولمەلەر, ەمدەۋ-ماسساج, دۋش كابينالارى, ال 3-قاباتتا جاتتىعۋ زالى مەن اكىمشىلىك كابينەتتەر ورنالاسقان.
سپورتشىلارعا ارنالعان تۇرعىن ءۇي عيماراتى 41 ورىنعا ارنالعان. جالپى اۋدانى 3 مىڭ شارشى مەتردەن اسادى. جەرتولەلەرى بار ءتورت قاباتتى عيماراتتىڭ 2 كىرەبەرىسى بار. بىرىندە 12 ءبىر بولمەلى, 3 ەكى بولمە بار. بۇل بولمەلەرگە شاعىن وتباسىلار قونىستانۋعا بولادى. ەكىنشىسىندە 26 بولمە بار. ۇيدە بارلىق قاجەتتى سانيتارلىق-تۇرمىستىق قۇرال قامتىلعان. ونىڭ ىشىندە اس ءۇي مەن كىر جۋاتىن, جۋىناتىن ارنايى بولمەلەر دە قاراستىرىلعان.
جالپى, مەملەكەت باسشىسىنىڭ بۇقارالىق سپورتتى دامىتۋ جونىندەگى تاپسىرمالارىن جۇزەگە اسىرۋ اياسىندا بيىل وبلىستا 17 جاڭا سپورت نىسانىنىڭ قۇرىلىسى ءجۇرىپ جاتىر, سونىڭ ىشىندە بەسەۋى پايدالانۋعا بەرىلدى.
