تۇركىستان وبلىسىنا جينالعان قۇراما مۇشەلەرى جالپى جاتتىعۋعا كىرىستى. بوكستان ۇلتتىق قۇرامانىڭ كەڭەيتىلگەن قۇرامداعى جاتتىعۋىنا ءار سالماقتا بارلىق وڭىردەن بوكسشىلار شاقىرىلدى.
قۇرامانىڭ باس باپكەرى قىزمەتىنە تاعايىندالعان قايرات ءساتجانوۆتىڭ باپكەرلىك بىلىگى سىنالاتىن ءسات تە جاقىن. قىركۇيەكتىڭ سوڭىن الا شىمكەنت قالاسىندا حالىقارالىق تۋرنير جالاۋىن جەلبىرەتەدى. 29 قىركۇيەكتە باستالىپ, 5 قازاندا مارەسىنە جەتەتىن كەڭەس وداعىنىڭ باتىرى قاراقوزى ابداليەۆتى ەسكە الۋعا ارنالعان حالىقارالىق تۋرنيردە ءار سالماقتاعى بوكسشىلاردىڭ الەۋەتى سارالانىپ, قارىمى بايقالماق. باس باپكەر ۇلتتىق قۇرامانىڭ كاپيتاندىق تىزگىنىن جاسوسپىرىمدەر وليمپياداسىنىڭ جەڭىمپازى, ازيا چەمپيونى ايبەك ورالبايعا جۇكتەۋدى ءجون كورىپتى.
ق.ءساتجانوۆ پاريج جازعى وليمپياداسىنان كەيىن ۇلتتىق قۇراماداعى بوكسشىلاردىڭ كەيبىرى سالماق دارەجەسىن اۋىستىرعانىن اتاپ ءوتتى. «ازيا چەمپيوناتى بەدەلدى دودا سانالاتىندىقتان, قۇرامانىڭ ۇزدىكتەرىن اپارامىز. كەيبىر بوكسشىلار سالماق دارەجەسىن وزگەرتتى. ارقايسىسى كوشباسشىلىقتى تىزگىندەگىسى كەلەدى. باسەكەلەستىكتىڭ الەۋەتى ارتقاندا عانا ناتيجە كورىنەدى.
48 كگ سالماق دارەجەسىندە الەم چەمپيوندارى تەمىرتاس ءجۇسىپوۆ پەن سانجار تاشكەنباي بار. ولارعا ايتارلىقتاي باسەكەلەستىك تۋدىراتىن جاستاردىڭ شوعىرى دا ءوسىپ كەلەدى. 51 كگ سالماقتا توكيو وليمپياداسىنىڭ قولا جۇلدەگەرى, الەم چەمپيونى ساكەن بيبوسىنوۆ بارا ما, جوق الدە دامير ابدىحالىقوۆقا سەنىم ارتامىز با, ونى الداعى كۇندەرى ناقتىلايمىز. ماحمۇد سابىرحان 54 كگ سالماق دارەجەسىنە تومەندەيتىنىن ايتتى. سەرىك تەمىرجانوۆ 60 كگ سالماققا ءوتتى. ۇلتتىق قۇرامانىڭ كاپيتانى اتانعان ايبەك ورالباي اسا اۋىر سالماققا اۋىسىپ جاتىر. قۇرلىق چەمپيوناتىنا دەيىن قامشىبەك قوڭقاباەۆ ەكەۋىنىڭ دەڭگەيىن سارالايمىز», دەدى باس باپكەر.
ماحمۇد سابىرحان پاريج جازعى وليمپياداسىنا 57 كگ سالماق دارەجەسىندە قاتىسىپ, العاشقى اينالىمدا-اق دودادان شىعىپ قالعان بولاتىن. 1/8 فينالدا يسپان حوسە كيلەسپەن جۇدىرىقتاسىپ, 4:1 ەسەبىمەن جول بەردى. سابىرحاننىڭ سويىنا 57 كگ سالماق دارەجەسىنە ءوتۋ ءالى ەرتە ەكەنى, بويىنىڭ تاپالدىعى, قۇلاشىنىڭ قىسقالىعى پاريجدەگى تورتجىلدىق دوداسى باستالعانعا دەيىن دە, ۇلى الاماننان كەيىن دە از تالقىلانعان جوق. بىلتىر وزبەكستاندا وتكەن الەم چەمپيوناتىندا ماحمۇد 54 كگ سالماقتا سىنعا ءتۇسىپ, الەم چەمپيونى اتاندى, ءتىپتى فينالدىق جەكپە-جەكتە وزبەك بوكسشىسى ويبەك جۋراەۆتى ەكى مارتە ەسەڭگىرەتىپ, نوكداۋنعا دا تۇسىرگەن ەدى. ءوزىنىڭ سالماعىنا قايتا ورالعان ساڭلاق ازيا چەمپيوناتىندا ولجا سالۋدى كوزدەيدى.
شىمكەنتتە وتەتىن حالىقارالىق تۋرنيردە باپكەردىڭ نازارىنا ىلىككەن بوكسشىلار 30 قاراشا مەن 12 جەلتوقسان ارالىعىندا يوردانيانىڭ اممان قالاسىندا وتەتىن ازيا چەمپيوناتىندا باق سىنايدى.
فۋتزال: الەم چەمپيوندارىنا ەسە جىبەرمەدى
وزبەكستاندا فۋتزالدان الەم چەمپيوناتى ءوتىپ جاتىر. ۇلتتىق قۇراما «D» توبىندا سىنعا تۇسەدى. العاشقى ماتچتى ازۋلى يسپانيا ۇلتتىق قۇراماسىنا قارسى وتكىزگەن وتانداستارىمىز 1:1 ەسەبىمەن تەڭ ءتۇستى.
ويىننىڭ 5-سەكۋندىندا ەنشىسىنە گول جازىپ, ەسەپ اشقان ءبىرجان ورازوۆ ۇلتتىق قۇراماداعى 60-ويىنىن وتكىزدى. «تەڭ ەسەپتى قومسىنبايمىز, بىراق ءبىز جەڭىسكە جەتەمىز دەپ الاڭعا شىقتىق. الەم چەمپيوناتىنا كەلگەنگە دەيىن بىرنەشە ەلدىڭ قۇراماسىمەن جولداستىق ماتچ وتكىزىپ, الەۋەتىمىزدى تارازىلادىق. وزبەكستاننان جەڭىسپەن ورالاتىنىمىزعا سەنىمدىمىن, ەل ءۇمىتىن اقتاۋ جولىندا ايانىپ قالمايمىز», دەدى ب.ورازوۆ.
باس باپكەر پاۋلو ريكاردو كاكا ءدۇبىرلى تارتىس قۇددى ءبىر ءوز ەلىمىزدە ءوتىپ جاتقانداي اسەرگە بولەنگەنىن اتاپ ءوتتى. «اندىجانعا جانكۇيەرلەرىمىز كوپتەپ جينالعانى مەرەيىمىزدى اسىردى. ولاردىڭ قىزۋ قولداۋىن سەزىندىك. الەم چەمپيوناتى ءوز ەلىمىزدە ءوتىپ جاتقانداي اسەرلەندىك. گولدى الدىمەن ءبىزدىڭ ويىنشىمىز سوعىپ, العا شىقتىق. باسىمدىقتى ماتچ سوڭىنا دەيىن ۇستاپ تۇرۋعا تىرىستىق. بىراق تارتىستىڭ بەل ورتاسىندا داۋرەن تۇرساعۇلوۆتىڭ قىزىل قاعاز الىپ, الاڭنان قۋىلۋى جىگىتتەرگە پسيحولوگيالىق قىسىم بولدى. سوعان قاراماستان تەگەۋرىندى قارسىلاستىڭ ارىنىن تەجەي الدىق. الەم چەمپيوناتىنىڭ تارتىسى ءالى الدا», دەدى كاكا.
قازاقستان ۇلتتىق قۇراماسى فۋتزالدان الەم چەمپيوناتىنا بۇعان دەيىن ءۇش مارتە قاتىستى, 2021 جىلى 4-ورىنعا تۇراقتادى. ال يسپانيا قۇراماسىنىڭ ەنشىسىندە ەكى دۇركىن الەم چەمپيونى دەگەن اتاعى بار.
بۇگىن اقشام اۋا ءاندىجان سپورت كەشەنىندە ءبىزدىڭ جىگىتتەر ليۆيا قۇراماسىنىڭ قارىمىن بايقاپ كورەدى. بۇل ماتچقا ايىپ قاعازىن العان داۋرەن تۇرساعۇلوۆ قاتىسپايدى. فيفا-نىڭ ءتارتىپ كوميتەتى بۇدان كەيىنگى ويىندارعا قوسىلۋىنا رۇقسات ەتپەك. ليۆيا قۇراماسى الەم چەمپيوناتىنىڭ بەتاشار ماتچىن جاڭا زەلانديا قۇراماسىنا قارسى وتكىزىپ, 3:1 ەسەبىمەن جەڭىسكە جەتتى.
