2021 جىلى ۇكىمەتتىڭ قاۋلىسىمەن گەرالديكالىق زەرتتەۋلەر ورتالىعى اشىلدى. سول جىلدىڭ ماۋسىم ايىندا سەمەي قالاسى اكىمدىگى تاراپىنان – مادەنيەت جانە سپورت مينيسترلىگىنىڭ جانىنان قۇرىلعان مەملەكەتتىك رامىزدەر مەن گەرالديكالىق بەلگىلەرى ماسەلەلەرى جونىندەگى ساراپتاما كەڭەسىنە قالامىزدىڭ باستى نىشانىنا وتكىزىلگەن بايقاۋدا ۇزدىك دەپ تانىلعان نۇسقالار جولداندى.
جوباسى ۇزدىك دەپ تانىلعان ەكى ادامنىڭ ءبىرى مەن ەدىم. 2021 جىلدىڭ 25 قاراشاسىندا كەڭەس مۇشەلەرىنىڭ جاسىرىن داۋىس بەرۋ ارقىلى وتكىزىلگەن وتىرىسىندا (№3 حاتتاما شەشىمىنە سايكەس) سەمەي قالاسىنىڭ جاڭا تاڭباسىنا مەنىڭ جوبامدى پايدالانۋعا رۇقسات بەرىلدى. دەگەنمەن, سەمەي قالاسىنىڭ جەرگىلىكتى اتقارۋشى بيلىگى تاراپىنان جاڭا تاڭبانى قالالىق ماسليحاتقا ۇسىنۋ اكىمدىك تاراپىنان بەلگىسىز سەبەپتەرمەن كەشىكتىرىلدى. قالاعا جاڭا تاڭبانى قابىلداۋ تەك 2022 جىلى عانا ءوڭىر باسشىسى ن.ۇرانحاەۆتىڭ تىكەلەي تاپسىرما بەرۋىمەن عانا جۇزەگە استى. 24 ماۋسىم كۇنى ماسليحاتتىڭ سەمەي قالاسىنىڭ جاڭا تاڭباسىن قابىلداۋ تۋرالى №25/206-VII شەشىمى شىعارىلدى. 2022 جىلى مادەنيەت مينيسترلىگى تاراپىنان ءوڭىر نىشاندارىن قولدانۋ بارىسىندا باسشىلىققا الۋ جونىندە ءتيىستى ەرەجە جولدانعانىمەن, جاڭا تاڭبانىڭ باياۋ قولدانىلۋى كوڭىلگە قاياۋ سالادى. مىسالى, كۇنى كەشە عانا «سەمەي قالاسىنىڭ الاكولدەگى مادەني كۇندەرى» ءوتتى, قالا گەربى جوق. بيىلعى قالا كۇنى مەرەكەسىنىڭ افيشالارىندا قالا گەربى پايدالانىلمادى. استانا مەن الماتى قالاسىندا ءوتىپ جاتقان ءىس-شارالاردا وبلىستىڭ ەمەس, قالا گەربتەرى قولدانىلادى, سەبەبى, قولدانىستاعى تاڭبا ءىس-شارانىڭ قاي قالادا ءوتىپ جاتقانىنان حاباردار ەتەدى.
پرەزيدەنت «تاريحي ورتالىق» دەپ جوعارى مارتەبە بەرگەن سەمەيدىڭ ەلىمىزدىڭ رۋحانياتى مەن مادەنيەتىندە الار ورنى ەرەكشە. سەمەي – ۇلى تۇلعالاردىڭ ءىزى قالعان كيەلى مەكەن. ج. ايماۋىتوۆ: «سەمەي – ءبىر گۋبەرنيا ەلدىڭ ميى. اقىل-ويدىڭ تابىسى سەمەيدە!» دەپ جوعارى باعا بەرگەنى سودان بولسا كەرەك. قازىرگى ۋاقىتتا وبلىس ورتالىعىندا ءوتىپ جاتقان ءىس-شارالاردا اباي وبلىسىنىڭ برەنبۋگىنە ەرەكشە باسىمدىق بەرىلىپ جاتاتىنى جاسىرىن ەمەس. وبلىس – ناقتى ءبىر ەلدى مەكەننىڭ ەمەس, مەملەكەتتىڭ اكىمشىلىك بىرلىكتەرىنىڭ ورتاق اتاۋى. وبلىستىڭ برەنبۋگى - كورشىلەس ايماقتارمەن شەكارالاس كىرە بەرىستەرىنە «اباي وبلىسىنا قوش كەلدىڭىزدەر!» دەپ قويىلسا ءسوز باسقا. وبلىسىمىز ءوزىنىڭ جەتىستىگىن وبلىستان تىس ايماقتاردا اۋىز تولتىرىپ ايتارلىقتاي جەتىستىكتەرمەن دالەلدەي السا نۇر ۇستىنە نۇر بولار ەدى. دانىشپان اباي اتامىز: «جاقسى بولساڭ جارىقتى كىم كورمەيدى, ءوز باعاڭدى وزىڭنەن كىم سۇرايدى», دەيدى, ءوزىڭدى ءوزىڭ ەمەس, سىرت كوزدىڭ ماقتاعانى ورىندى شىعار.
قازىرگى ۋاقىتتا پرەزيدەنتتىڭ تاپسىرماسىمەن قۇزىرەتتى مينيسترلىك دايىنداعان وڭىرلىك نىشانداردى ازىرلەۋ تۋرالى ۇلگىلىك قاعيدالارى Zakon.kz سايتىندا جارىق كوردى. اتالعان ۇلگىدە ءوڭىر تاڭبالارىنا قاتىستى جەرگىلىكتى ورگانداردىڭ مىندەتتەرى مەن وڭىرلىك نىشانداردى قولدانۋ ءتارتىبى ساۋاتتى تۇردە قامتىلعانىنىمەن تانىسىپ وتىرمىز. وسىعان وراي, اتالعان ۇلگى ەرەجەسى جەرگىلىكتى مەملەكەتتىك جانە جەرگىلىكتى ءوزىن-ءوزى باسقارۋ زاڭىنا ەنگىزىلىپ وبلىس ورتالىعىنىڭ تاڭبالارى ءوز لايىقتى باعاسىن الادى دەگەن ءۇمىتىم زور.
ەرلان شاياحمەت ۇلى,
سەمەي قالاسى گەربىنىڭ اۆتورى
