بۇل باعىتتاعى جۇمىستار تالقىلانعان وبلىس اكىمى اپپاراتىنىڭ اپتالىق ماجىلىسىندە بيىلعا جوسپارلانعان قۇرىلىس نىساندارىن ۋاقتىلى ءارى ساپالى اياقتاۋ قاجەتتىگى ايتىلدى. ء«اربىر قۇرىلىس نىسانىنداعى جۇمىستار باقىلاۋدا بولسىن. قاداعالاڭىزدار! ۋاقتىلى ءارى تالاپقا ساي تاپسىرىلۋعا ءتيىس. بۇل نىساندار ەلدىڭ سۇرانىسىنا جانە ءوڭىردىڭ دامۋ جوسپارىنا سايكەس سالىنىپ جاتىر. بوس ۋادە ەمەس, ناقتى جوسپار, جۇمىس قاجەت. الەۋمەتتىك نىساندار مەن تۇرعىن ۇيلەر ءوڭىر تۇرعىندارىنىڭ تۇرمىس ساپاسى مەن الەۋەتىن كوتەرۋگە سەرپىن بەرەدى. سوندىقتان ەل قازىناسىنا سالىنىپ جاتقان ءاربىر عيماراتتىڭ قۇرىلىسى جوعارى جاۋاپكەرشىلىكپەن جۇرگىزىلۋى قاجەت», دەدى وبلىس اكىمى دارحان ساتىبالدى.
وبلىستىق قۇرىلىس باسقارماسىنىڭ باسشىسى توقتار ۋسۋباليەۆتىڭ ايتۋىنشا, باسقارما مەن اۋدان, قالا اكىمدىكتەرىنىڭ تاپسىرىسىمەن قولعا الىنعان بيۋدجەتتىك ينۆەستيتسيالىق جوبالار سانى – 485. ونىڭ 22-ءسى پايدالانۋعا بەرىلگەن. قارجىسى تولىق شەشىلگەن جاعدايدا جىل سوڭىنا دەيىن تاعى 396 نىساننىڭ قۇرىلىسى اياقتالسا, 67-ءسى 2025 جىلعا وتپەلى. وڭىردە 21 ءبىلىم نىسانىنىڭ قۇرىلىسى قولعا الىنىپ, ونىڭ 4-ەۋى تاپسىرىلعان. جىل سوڭىنا دەيىن 10 ءبىلىم نىسانى تاپسىرىلادى, 7-ەۋى كەلەسى جىلعا وتپەلى. ال دەنساۋلىق ساقتاۋ سالاسىندا 94 نىساننىڭ قۇرىلىسى جوسپارلانىپ, ونىڭ 3-ەۋى پايدالانۋعا بەرىلگەن. قالعان 90-ىن جىل سوڭىنا دەيىن تاپسىرۋ ماقساتىندا جۇمىس كۇشەيتىلگەن. بۇل رەتتە «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 49 جوبا جۇزەگە اسىرىلىپ جاتىر. وڭىردە 3 اكىمشىلىك عيماراتى جىل سوڭىنا دەيىن ەل يگىلىگىنە بەرىلمەك. سونىمەن بىرگە قۇرىلىسى ءجۇرىپ جاتقان 12 مادەنيەت نىسانىنىڭ 4-ەۋى بيىل اشىلسا, 23 سپورت نىسانىنىڭ 3-ەۋى پايدالانۋعا بەرىلگەن. جىل سوڭىنا دەيىن 10 سپورت نىسانى بەرىلەدى. قۇرىلىس باسقارماسىنىڭ تاپسىرماسىمەن جۇزەگە اسىپ جاتقان قۇرىلىس جۇمىستارىنا بيۋدجەتتەن 305 ميلليون تەڭگە قارالعان.
وڭىردە تۇرعىن ءۇي, ينفراقۇرىلىممەن قامتۋ جۇمىستارى دا قارقىندى. بۇل ورايدا 221 ءۇي, 2 469 پاتەردىڭ قۇرىلىسى ءجۇرىپ جاتىر. مىسالى, جەتىساي اۋدانى تۇرعىندارىنا جىل باسىنان بەرى 167 الەۋمەتتىك تۇرعىن ءۇيدىڭ كىلتى تابىستالعان. ەندى جىل سوڭىنا دەيىن تاعى 90 پاتەردىڭ كىلتىن تاپسىرۋ جوسپارلانىپ وتىر. ناقتىراق ايتار بولساق, بۇگىندە اسىقاتا كەنتىندە 3 قاباتتى, 54 پاتەرلى, قازىبەك بي ەلدى مەكەنىندە 2 قاباتتى, 16 پاتەرلى جانە ش.دىلدابەكوۆ اۋىلدىق وكرۋگىنىڭ قىزىلتاڭ اۋىلىندا 2 قاباتتى, 16 پاتەرلى جالگەرلىك تۇرعىن ۇيلەردىڭ قۇرىلىسى جۇرگىزىلىپ جاتىر. قىزىلتاڭ ەلدى مەكەنىندەگى 2 تۇرعىن ءۇيدى «قۇرىلىس نۇرتاس» جشس سالىپ جاتىر. مامىردا باستالعان قۇرىلىس جۇمىستارى قازان ايىندا تاپسىرىلادى دەپ جوسپارلانىپ وتىر. بۇگىندە نەگىزگى قۇرىلىس جۇمىستارى تولىعىمەن اياقتالىپ, قاجەتتى ينفراقۇرىلىممەن قامتاماسىز ەتىلگەن. جۇرگىزىلگەن جۇمىستاردىڭ ساپاسىنا سەنىمدى بولۋ ماقساتىندا وتاندىق ونىمدەر پايدالانىلعان. اتالعان تۇرعىن ۇيلەردىڭ اۋلاسىندا تالاپقا ساي بالالاردىڭ ويىن الاڭشالارى مەن اۆتوتۇراق تا ىسكە قوسىلادى.
بۇدان بولەك, «جايلى مەكتەپ» جوباسى اياسىندا اسىقاتا كەنتىندە 900 ورىندىق, جەتىساي قالاسىندا 1500 ورىندىق, ىنتىماق اۋىلدىق وكرۋگىندە 600 ورىندىق مەكتەپتەردىڭ جانە 2 امبۋلاتوريا مەن 4 فەلدشەرلىك-اكۋشەرلىك پۋنكت قۇرىلىسى جۇرگىزىلىپ جاتىر, ءبىر مەكتەپ كۇردەلى جوندەۋدەن وتەدى. التى مەكتەپتىڭ جىلىتۋ قازاندىقتارىن قاتتى وتىننان تابيعي گازعا قوسۋ جوسپارلانعان.
ال ماقتاارال اۋدانىندا بيىل «نۇرلى جەر» باعدارلاماسى اياسىندا 87 الەۋمەتتىك باسپانانىڭ قۇرىلىسى ءجۇرىپ جاتىر. كاسىپكەرلەردىڭ قارجىسىنا سالىنىپ جاتقان ۇيلەر تولىعىمەن اياقتالعان سوڭ مەملەكەت ساتىپ الىپ, ءۇي كەزەگىندە تۇرعان ازاماتتارعا ساناتتارىنا قاراي, تەڭدەي ءبولىپ بەرمەك. اتالعان باعدارلاما اياسىندا وتكەن جىلى 46 تۇرعىن ءۇي ساتىپ الىنىپ, باسپاناعا مۇقتاج وتباسىلارعا بەرىلگەن بولاتىن. بۇگىندە اۋدان كولەمىندە 2 مىڭعا جۋىق ادام تۇرعىن ءۇي كەزەگىندە تۇرادى. ودان بولەك, بيىل اۋداندا 2 مادەنيەت ءۇيى سالىنىپ جاتىر.
تۇركىستان وبلىسى
