سۋرەتتى تۇسىرگەن – ەرلان ومار, «EQ»
تەڭگە ءىلۋ سپورتىنىڭ «قوس قۇلاش» دەپ اتالاتىن سىنىندا راحات قامباروۆ قوس سايىستىڭ قورىتىندىسى بويىنشا قارسىلاس شاق كەلتىرمەدى. ول العاشقى كەزەڭدە جارىس جولىنىڭ وڭ جانە سول جاق قاپتالىنا قويىلعان ءتورت تەڭگەنى بەلگىلەنگەن ۋاقىتتا تۇگەل ءىلدى. وسىلايشا, وتانداسىمىز ويىننىڭ العاشقى كەزەڭىنەن-اق قارسىلاستارىن قاپىدا قالدىرۋعا تىرىستى. بۇل كەزەڭدە وتانداسىمىز 8 ۇپاي ەنشىلەپ, كوش باستاسا, قىرعىزستان سپورتشىسى 6 ۇپايدى ولجالاپ, مىقتىلىعىن بايقاتتى. ءا دەگەننەن ۇزدىك ۇشتىككە ىلەسكەن موڭعوليا ورەنى مەلس ناۋرىزبەكتىڭ ەنشىسىندە 4 ۇپاي بولدى. بۇل كەزەڭدە وزبەكستان مىقتىسى زوكيرجون ازيزبەكوۆ تە 3 ۇپاي الىپ, جۇلدەدەن ءۇمىتتى ەكەنىن بايقاتقان. الايدا العاشقى ۇشتىكتىڭ قارىمى ەكىنشى كەزەڭدە دە باسىم بولدى.
فينالدىق باسەكەدە سپورتشىلار وڭ جانە سول قولمەن ءۇش-ءۇش تەڭگەدەن التى تەڭگەنى ىلۋگە تالپىندى. راحات قامباروۆ بۇل كەزەڭدە دە 6 تەڭگەنى وڭاي قاعىپ الىپ, جەڭىمپاز اتاندى. ال راحاتتىڭ باستى قارسىلاستارىنان موڭعول سپورتشىسى مەلس ناۋرىزبەك ەكىنشى ورىندى جەڭىپ السا, قىرعىزدىڭ مىقتىسى اسحات تالايبەكوۆ ءۇشىنشى ورىن الدى. راحات قامباروۆ – تۇركىستان وبلىسىنىڭ تۋماسى. تەڭگە ىلۋدەن ەلدىڭ بىرنەشە دۇركىن چەمپيونى, ازيا كۋبوگىنىڭ جەڭىمپازى. كوشپەلىلەر ويىندارىندا راحاتتىڭ استىنداعى سايگ ۇلىگى دە جەر تارپىپ, تەڭگە ءىلۋ سپورتىنا ابدەن ماشىقتانعانى كورىنىپ تۇردى.
تەڭگە ىلۋدەن قورجىنعا ەكىنشى التىندى بەكنۇر سەرىكوۆ سالدى. بەكنۇر ەتنواۋىلدا وتكەن باسەكەدە تەڭگە ءىلۋدىڭ «بەس بەلەس» سىنىندا ونەر كورسەتىپ, قارسىلاستارىنان ەپتى ءارى شاپشاڭ ەكەنىن دالەلدەدى. ال ەكىنشى ورىندى قىرعىز سپورتشىسى ادىلبەك كەنجەبەك ۇلى السا, ءۇشىنشى ورىندى رۋمىنيا وكىلى باكوس كسونگور ەنشىلەدى.
بەكنۇر جارىس ەرەجەسىنە ساي ىلگەن تەڭگەسى جاعىنان دا, ۋاقىت جاعىنان دا ۇزدىك ونەر كورسەتتى. ول جارىس الاڭىنا ءتورت مارتە شىعىپ, العاشىندا بەرىلگەن ەكى مۇمكىندىكتىڭ بىرىندە 10 تەڭگەنىڭ سەگىزىن, ەكىنشىدە جەتەۋىن ءىلدى. فينالدا 14 تەڭگەنىڭ 12-ءسىن, ەكىنشى مۇمكىندىكتە 11-ءىن ءىلدى. ەرەجەگە ساي, تەڭگەلەردى ىلۋگە 35 سەكۋند بەرىلسە, بەكنۇر تەڭگەلەردى 33 سەكۋندتان اسىرماي قاعىپ وتىردى.
