سۋرەتتى تۇسىرگەن – ەرلان ومار, «ەQ»
قۇسبەگىلەر سايىسى باستالماس بۇرىن مانداتتىق كوميسسيانىڭ وتىرىسى ءوتىپ, جەرەبە تارتىلدى. سونىڭ ناتيجەسىندە سايىستى ءبىرىنشى بولىپ ەلىمىزدىڭ قۇسبەگىلەرى باستادى. دۇنيەجۇزىلىك كوشپەلىلەر ويىندارىندا ەل ءۇمىتىن ارقالاپ شىققان 9 قۇسبەگى دە – تاجىريبەسى تولىسقان, رەسپۋبليكالىق, حالىقارالىق سايىستاردا ىسىلعان, ەل چەمپيوناتىندا توپ جارعان ساڭلاقتار. «بۇركىت سالۋ» ساناتىندا استانا قالاسىنان سەرىكبەك كۇنتۋعان, اباي وبلىسىنان ەرزات بايقاداموۆ, اتىراۋ وبلىسىنان ارمان قوشقاروۆ شەبەرلىگىن كورسەتتى. تۇركىستان وبلىسىنان كەلگەن داۋرەن ارشاباي جانە باعدات كەۋەنوۆ, استانالىق قۇدايبەرگەن راۋىل ۇلى «قارشىعا سالۋ» ساناتىنان ەتنوسپورت الامانىنا قاتىستى. اقمولا وبلىسىنان ەرلان كەنجەتاەۆ, جامبىل وبلىسىنان باقداۋلەت باباجان, تۇركىستان وبلىسىنان يبراگيم بازارباەۆ «يتەلگى سالۋدان» قۇستارىنىڭ العىرلىعىن سىناپ, بارلىعى دا فينالعا ءوتتى.
سارىارقا ءتوسىن دۇبىرگە بولەگەن دۇنيەجۇزىلىك كوشپەلىلەر ويىندارىنا ەلىمىزدىڭ قۇسبەگىلەرىنەن سىرت قىرعىزستان, رەسەي, موڭعوليا, يسپانيا, كانادا, ماجارستان, قىتاي, گرۋزيا جانە تۇركيادان, بارلىعى 42 قاتىسۋشى تىركەلدى. ءۇش ساناتتا 18 بۇركىت, 12 يتەلگى جانە 12 قارشىعانىڭ ۇشقىرلىعى سىنالدى. رەسپۋبليكالىق «قۇسبەگىلىك» فەدەراتسياسىنىڭ ەرەجەسىنە ساي ۇيىمداستىرىلعان تارتىستىڭ جىلدان-جىلعا اۋقىمى دا كەڭەيە ءتۇستى. اتادان بالاعا ميراس بولعان, كوشپەلى حالىقتىڭ كونە مۇراسى سانالاتىن قۇسبەگىلىك ونەردى جاڭعىرتۋ جۇمىسى قارقىن الىپ كەلەدى.
سايىستىڭ اشىلۋ سالتاناتىندا قازاقستان پرەزيدەنتىنىڭ كەڭەسشىسى – پرەزيدەنتتىڭ ءباسپاسوز حاتشىسى, رەسپۋبليكالىق «قۇسبەگىلىك» فەدەراتسياسىنىڭ پرەزيدەنتى بەرىك ءۋالي مۇنداي سايىستاردى وتكىزۋ جوعارى جاۋاپكەرشىلىك جۇكتەيتىنىن اتاپ ءوتتى.
«دۇنيەجۇزىلىك كوشپەلىلەر ويىندارىنا كوپتەگەن شەتەلدىك قوناقتار كەلۋى بۇل دودانىڭ دەڭگەيى جوعارى ەكەنىن ايقىنداي تۇسەدى. قۇسبەگىلىك ونەردى ۇلتتىق سپورت دەڭگەيىندە دارىپتەۋ, دامىتۋ مىندەتى تۇر. بۇگىنگى ەتنوسپورت الامانىندا ءار قۇرلىقتان كەلگەن قاتىسۋشىلار ءوز شەبەرلىگىن كورسەتتى», دەدى بەرىك ءۋالي. فەدەراتسيا پرەزيدەنتى تورەشىلەر قۇرامىنا سايىسقا ءادىل تورەلىك ەتۋدى جۇكتەدى.
دۇنيەجۇزىلىك كوشپەلىلەر ويىندارىندا سىنعا تۇسكەن قۇسبەگىلەردىڭ شەبەرلىگىن باعالاعان تورەشىلەر القاسىندا 6 وتانداسىمىز, قىرعىزستاننان ەكى, موڭعوليا مەن رەسەي فەدەراتسياسىنان ءبىر تورەشىدەن بار. قۇسبەگىلىك سايىسىنىڭ باس تورەشىسى مارات قويشين سايىستى ۇيىمداستىرۋ ەرەجەسى حالىقارالىق ستاندارتقا ساي ەكەنىن اتاپ ءوتتى. ءدۇبىرلى دوداعا كەلگەن قۇسبەگىلەرگە سايىسقا دايىندىعىن پىسىقتاۋىنا بارلىق جاعداي جاسالعانىن جەتكىزدى.
ء«دۇبىرلى دودادا قۇسبەگىلەر الدىمەن قولعا شاقىرۋ جانە شىرعاعا سالۋ بويىنشا سىنعا ءتۇستى. سايىس وتە تارتىستى ءوتتى. جەرگىلىكتى جانكۇيەرلەر مەن شەتەلدىك تۋريستەردىڭ قيقۋى اسەر ەتتى مە, شەتەلدىك كەيبىر قۇسبەگىلەردىڭ ۇشىرعان قىراندارى قولعا شاقىرۋ سىنىندا دا, ودان كەيىن شىرعاعا سالۋدا دا قاتەلىككە بوي الدىردى. مۇندا ەڭ الدىمەن ۋاقىت ەسەپكە الىنادى. ياعني تورەشىنىڭ باستا دەگەن بەلگىسىنەن كەيىن قىرانىن ۇشىرادى, قارسى جاقتا قولعا شاقىرعان يەسىنە نەشە سەكۋندتا جەتىپ, قولىنا قونعانى ەسەپكە الىنادى. ال شىرعاعا سالۋدا قىراننىڭ قىراعىلىعى سارالاندى», دەدى باس تورەشى.
دۇنيەجۇزىلىك كوشپەلىلەر ويىندارىنا قۇسبەگىلىكتىڭ ءۇش ساناتى بويىنشا قاتىسقان كوماندا قۇرامىندا 3 قۇسبەگى, 1 باپكەر, 1 مال دارىگەرى بولدى. سايىستا 18 جاستان اسقان ەرەسەك قاتىسۋشىلار ونەر كورسەتتى. گرۋزيا ەلىنەن قاتىسقان قۇسبەگى لەۆاني دوبورجيگيشۆيلي بۇركىتىنىڭ جاتىرقاعانىن ايتتى.
ء«بىرىنشى جاتتىعۋدا ۇشقان بۇركىتىم ماعان قاراي كەلمەي, باسقا باعىتقا قايىرىلىپ كەتتى. ەكىنشى جاتتىعۋدا دا جولىم بولمادى. بۇل سايىس بىزگە تاجىريبە مەكتەبى بولدى. قۇسبەگىلىك ونەردىڭ قيىندىعى دا, قىزىعى دا مول ەكەنىن استانادا ءوتىپ جاتقان ءدۇبىرلى دودادا تەرەڭدەي سەزىندىم. فينالدىق سايىسقا وتكەن قارسىلاستارىمنىڭ بارلىعىنا ساتتىلىك تىلەيمىن», دەدى بۇركىتشى.
قۇسبەگىلىك سايىسىنىڭ فينالدىق كەزەڭى بۇگىن ءوتىپ, جەڭىمپازدار مەن جۇلدەگەرلەر انىقتالادى.
