سۋرەتتەردى تۇسىرگەن – ەرلان ومار, «EQ»
ەتنواۋىلدا بوي كوتەرگەن بالالار الاڭى دا كوشپەلىلەر الامانىنىڭ كىشكەنتاي كورەرمەندەرىنە وراسان كوڭىل-كۇي سىيلادى. مۇندا ۇلتتىق ويىندى ۇلىقتايتىن ءتۇرلى سايىستار كوپتەپ ۇيىمداستىرىلدى. اسىرەسە جاس جەتكىنشەكتەرگە اسىقتان وتەتىن سايىستار ەرەكشە اسەر سىيلادى. استانا قالاسىنىڭ تۇرعىنى رولان نيازوۆ 2-سىنىپتا وقيتىن ۇلى ايسۇلتاندى كوشپەلىلەر ويىندارىن تاماشالاۋعا ارنايى ەرتىپ كەلىپ, ۇلتتىق قۇندىلىعىمىز دارىپتەلىپ, سالت-ءداستۇرىمىز جاڭعىرعان ەتنواۋىلدى ارالاتقانىن ايتادى. «مۇندا بالالار تاماشالايتىن ءتۇرلى اتتراكتسيوندارى جەتەرلىك ەكەن. بىزگە ۇناعانى اسىق ويىنى بولدى. بالا كۇنىمىزدە اسىق ويناپ ەسەيدىك, بىراق قازىرگى بالالار, جاسىراتىنى جوق, «قولىڭا جاقسا ساقا تۇتاتىن» اسىقتى تۇستەپ تانىپ, قانداي ويىن تۇرلەرى بار ەكەنىن دە بىلە بەرمەيدى. ەگەر مەكتەپتە ارنايى ءپان رەتىندە وقىلماسا دا, قوسىمشا ۇيىرمە ەسەبىندە ىسكە قوسىلسا, بالالاردىڭ قىزىعۋشىلىعى ارتار ەدى. بىلۋىمشە, كەيبىر مەكتەپتەردە اسىق ۇيىرمەسى دە بار ەكەن. بالانىڭ ويلاۋ جۇيەسىنىڭ دامۋىنا, فيزيولوگيالىق ءوسۋىنىڭ دۇرىس قالىپتاسۋىنا اسىق ويىنىنىڭ تيگىزەر پايداسى زور», دەيدى ەلوردالىق تۇرعىن.
ءوزىن كوللەدج ستۋدەنتىمىن دەپ تانىستىرعان جانەل قىرىقباەۆاعا دا «كوشپەلىلەر الەمىندە» اسىق ويىنى ەرەكشە ۇناپتى. مەكتەپتە وقىپ جۇرگەندە بەس تاس ويناپ ۇيرەنگەن ەدىم, بۇگىندە بۇل ويىندى تاسپەن ەمەس, اسىقپەن دە وينايدى. ۇشقىرلىقتى, ەپتىلىكتى سىنايتىن بەس اسىققا زامانداستارىم دا قىزىعادى. ءوزىم دە قولىما اسىق ۇستاپ, شەبەرلىگىمدى سىناپ كوردىم», دەدى ج.قىرىقباەۆا.
استانا قالاسىنداعى ۇلتتىق عىلىمي پراكتيكالىق دەنە تاربيەسى ورتالىعىنىڭ مامانى ءابدىمۇسىلىم مەيىرمانوۆ – ۇلتتىق قۇندىلىقتارىمىزدى تالماي ۇلىقتاپ جۇرگەن جان. ەتنواۋىلداعى بالالار الاڭىنا دا اسىق ويناۋعا ارنايى كەرەك-جاراعىن ارقالاپ كەلىپتى. «دۇنيەجۇزىلىك كوشپەلىلەر ويىندارىنا قاتىسۋعا عانا ەمەس, تاماشالاۋعا دا الەمنىڭ ءار قيىرىنان تۋريستەر كەلدى. ءبىز ۇلتتىق ويىندارىمىزدى سولارعا دا ناسيحاتتاپ, كورسەتىپ دارىپتەيمىز. اسىق شەرتۋ – ويىننىڭ الىپپەسى. بالا ساقانى شەرتۋدى مەڭگەرسە, اسىق اتۋدى دا تەز يگەرەدى. ەتنواۋىلعا كەلگەن جەتكىنشەك قوناقتارىمىزدىڭ ۇلتتىق ويىندارعا قىزىعۋشىلىعى جوعارى. ۇلتتىق ءتول ويىندارىمىزدى دامىتۋعا ءبارىمىز كۇش سالۋعا ءتيىستىمىز», دەدى مامان.
