فوتو: t.me/ UKIMET
جيىندا پرەزيدەنت جولداۋىندا ايتىلعان مىندەتتەردى ىسكە اسىرۋ شەڭبەرىندە كاسىپكەرلىكتى دامىتۋدىڭ وزەكتى ماسەلەلەرى تالقىلاندى.
ولجاس بەكتەنوۆ مەملەكەت ينۆەستيتسيالىق تارتىمدىلىقتى ارتتىرۋ, ەلىمىزدىڭ ونەركاسىپتىك الەۋەتىن اشۋ, ينفراقۇرىلىمدىق ماسەلەلەردى شەشۋ جانە ەكونوميكانىڭ ناقتى سەكتورىن دامىتۋ بويىنشا اۋقىمدى جۇمىستار اتقارىلىپ جاتقانىن اتاپ ءوتتى.
تالقىلاۋ بارىسىندا ەنەرگەتيكا, وڭدەۋ ونەركاسىبى مۇناي-گاز سەكتورى, تاۋ-كەن مەتاللۋرگيا كەشەنى, كولىك جانە قارجى سالاسى, دەنساۋلىق ساقتاۋ, ءىت, تۋريزم سالالارىنىڭ وكىلدەرى ءوز ۇسىنىستارىن ءبىلدىردى. مەتالداردى تەرەڭ وڭدەۋ, مۇناي-گاز حيمياسى جانە باسقا دا باسىم سالالارداعى جاڭا جوبالارعا باسا نازار اۋدارا وتىرىپ, وتاندىق تاۋار وندىرۋشىلەردى قولداۋ ماسەلەلەرى كوتەرىلدى.
ۇكىمەت «اتامەكەن» ۇلتتىق كاسىپركەرلىك پالاتاسىمەن بىرلەسىپ, تاۋارلارداعى, جۇمىستار مەن كورسەتىلەتىن قىزمەتتەردەگى وتاندىق قامتۋ ۇلەسىن ايقىنداۋ ماقساتىندا جاڭا ءادىسنامانى ازىرلەۋ بويىنشا جۇمىس جۇرگىزىپ جاتىر. ولجاس بەكتەنوۆ جاڭا تەتىك اناعۇرلىم ءادىل بولاتىنىن جانە وتاندىق كاسىپورىنداردىڭ دامۋىنا ەلەۋلى سەرپىن بەرەتىنىنە ەرەكشە نازار اۋداردى. ال ءتيىستى قۇرىلىمدارعا جۇرگىزىلىپ جاتقان جۇمىستى جەدەلدەتۋ تاپسىرىلدى.
كەزدەسۋدە جاساندى ينتەللەكت جۇيەلەرىن قولدانۋدى كەڭەيتۋ جانە تسيفرلىق تەحنولوگيالاردى دامىتۋ ماسەلەلەرى قارالدى. ەكولوگيالىق تازا, ەنەرگيا ۇنەمدەيتىن جانە تومەن كومىرتەكتى جوبالاردى ىسكە اسىرۋعا باعىتتالعان تۋريزم, تۇرعىن ءۇي-كوممۋنالدىق شارۋاشىلىق, «جاسىل» قارجىلاندىرۋ سالاسىن دامىتۋدىڭ ماڭىزدى ەكەنى ايتىلدى.
پرەمەر-مينيستر پرەزيدەنت العا قويعان مىندەتتەرگە قول جەتكىزۋ ءۇشىن ەكونوميكانىڭ ناقتى سەكتورىن دامىتۋعا بيزنەس وكىلدەرىن بەلسەندى تارتۋ قاجەت ەكەنىن اتاپ ءوتتى.
«مەملەكەت باسشىسى قازاقستاندى جان-جاقتى جاڭعىرتۋدى بەلسەندى جۇرگىزۋدە. ەكونوميكاداعى ءوسىم ازاماتتارىمىزدىڭ تۇرمىس ساپاسىن جاقسارتۋعا تىكەلەي اسەر ەتۋى ماڭىزدى. سونىمەن بىرگە ءىرى بيزنەس الەۋمەتتىك جاۋاپكەرشىلىكتى كورسەتۋى كەرەك. پرەزيدەنت كەلەسى جىلدى جۇمىسشى ماماندىقتارى جىلى دەپ جاريالاعانىن بىلەسىزدەر. بىزدە ءىرى كاسىپكەرلەر كوللەدجدەرگە قامقورلىق جاساپ, ماماندار دايارلاۋعا ءتيىستى بازا قۇراتىن ءساتتى ۇلگىلەر بار. بۇل مودەل سونىمەن قاتار بيزنەسكە بولاشاق كادرلاردى دايىنداۋعا مۇمكىندىك بەرەدى. جۇمىسشى ماماندىقتارى جىلى اياسىندا مۇنداي تاجىريبەنى جانداندىرۋ قاجەت», دەدى ولجاس بەكتەنوۆ.
اۋىلدا كاسىپكەرلىكتى دامىتۋ جانە اۋىل تۇرعىندارىن جىل بويى جۇمىسپەن قامتۋ قاجەتتىگى اتاپ ءوتىلدى.
ۇكىمەت باسشىسى ءتيىستى مينيسترلىكتەرگە بيزنەس وكىلدەرى تاراپىنان ايتىلعان ۇسىنىستاردى زەردەلەۋدى تاپسىردى.
