كەلەلى جيىنعا قۇسبەگىلىك سپورت تۇرىنەن وتەتىن جارىستا قازىلىق ەتەتىن 10 مامان قاتىستى. اتاپ وتسەك, الداعى سايىستاردا قازاقستاننان – 6 تورەشى, قىرعىزستاننان – 2 جانە موڭعوليا مەن رەسەيدەن ءبىر-ءبىر تورەشىدەن قىزمەت ەتەدى. بۇل ءدۇبىرلى دودانىڭ حالىقارالىق سيپاتى مەن ادىلدىك پەن اشىقتىققا دەگەن ۇمتىلىستى ايقىندايدى.
«ەلىمىزدە ءوتىپ جاتقان سايىسقا كەلگەن شەتەلدىك سپورتشىلار كوپ. بۇل – ءبىز ءۇشىن ۇلكەن مارتەبە جانە جاۋاپكەرشىلىك. بارلىق قاتىسۋشىلارعا ساتتىلىك تىلەيمىز! سونىمەن قاتار تورەشىلەردەن سۇرايتىنىمىز – سايىستىڭ ادىلدىگىن, جۇيەلىلىگىن قاتاڭ ساقتاپ, جارىستىڭ جوعارى دەڭگەيدە ءوتۋىن قامتاماسىز ەتۋ», دەدى «قۇسبەگىلىك» فەدەراتسياسىنىڭ پرەزيدەنتى.
سونىمەن بىرگە ماماندار جارىس وتەتىن ورىندا باس قوسىپ, حالىقارالىق نورمالار مەن ستاندارتتارعا سايكەس دايىندىق جۇمىسىن جۇرگىزدى. وسىلايشا, قۇسبەگىلىك سايىسى بويىنشا بەكىتىلگەن ەرەجەنىڭ قاعيدالارىمەن قۇستىڭ ءار ءتۇرى بويىنشا وتەتىن 2 جاتتىعۋدىڭ ورتاق كورسەتكىشتەرى بەلگىلەندى. باس تورەشى – مارات قويشيننىڭ ايتۋىنشا, تورتكۇل تاراپ كوز تىككەن بايراقتى باسەكەگە سپورتشىلار دا, تورەشىلەر دە, سايىس وتەتىن الاڭ دا تولىققاندى دايىن.
«بارلىق قاتىسۋشىنى جارىس الاڭىمەن تانىستىردىق. بۇگىندە ۇلتتىق قۇراما قۇسبەگىلەرى مەن شەتەلدىك سپورتشىلار قۇستارىن ۇشىرىپ, دايىندىق جۇرگىزىپ جاتىر. قاتىسۋشىلاردىڭ سۇرانىسى بويىنشا سايىس وتەتىن الاڭعا تورەشىلەرمەن بىرگە قاجەتتى وزگەرىستەر ەنگىزىلدى. جارىس الاڭى حالىقارالىق ەرەجەلەرگە ساي كەلەدى», دەپ اتاپ ءوتتى باس تورەشى.
باسقوسۋ بارىسىندا فەدەراتسيا پرەزيدەنتىنە شەتەلدىك سپورتشىلاردىڭ دايىندىعى مەن ولاردىڭ جاتتىعۋىنا قاجەتتى جاعداي جاساۋ تۋراسىندا ەسەپ بەرىلدى. « ۇلى دالا ءدۇبىرى» ۇرانىمەن ءوتىپ جاتقان كوشپەلىلەر ويىندارىنا قۇسبەگىلىك سپورت ءتۇرى بويىنشا 10 مەملەكەتتەن 42 سپورتشى قاتىسادى.
اتاپ وتسەك, قازىرگى تاڭدا بارلىق قاتىسۋشىلار قىزۋ دايىندىق ۇستىندە. سونداي-اق وتىرىس بارىسىندا سايىستا قولدانىلاتىن جابدىقتاردىڭ ساپاسى, جالپى شارانىڭ ۇيىمداستىرىلۋى جانە سپورتشىلار مەن كورەرمەندەردىڭ قاۋىپسىزدىگىن قامتاماسىز ەتۋ شارالارى جونىندە ءسوز قوزعالدى.
كەزدەسۋ قورىتىندىسى بويىنشا «قۇسبەگىلىك» فەدەراتسياسىنىڭ پرەزيدەنتى بەرىك ءۋالي تورەشىلەر القاسىنا دۇنيەجۇزىلىك ەتنوسپورت كونفەدەراتسياسىنىڭ اتىنان بەرىلگەن ارنايى سەرتيفيكاتتاردى تابىستادى.
