سۋرەت: aqmeshit-aptalygy.kz
جۋرناليستيكا سالاسىندا ەڭبەك ەتكەن جىلدارى وتان الدىنداعى مىندەتىن وتەۋگە جىبەرگەن ۇلدارىنان ايىرىلىپ, قارا جامىلعان وتباسىلار كوپ بولعانىن كوزىمىز كوردى. مىسالى, وسىدان 5-6 جىل بۇرىن اسكەردەگى سارباز اتىلىپ قالدى. كەيىن ونى شۇرىپپەنى بايقاۋسىزدا ءوزى باسىپ جىبەرگەن دەپ جاريالادى. بۇل قانشالىقتى اقىلعا سىيادى؟ كۇنى كەشە ەربايان ەسىمدى باۋىرىمىزدىڭ اسكەردە ءجۇرىپ قانداي اۋىر جاعدايعا تاپ بولعانىن بۇكىل ەل كوردى. زىڭگىتتەي جىگىتتىڭ اجەتحانا ىشىندە قۇلاپ, سونشالىقتى اۋىر دەرتكە شالدىققانىنا كىم سەنەدى؟ بۇل وقيعالاردىڭ ءبارى ءالى كۇنگە اسكەردە الىمجەتتىك بار ەكەنىن, سونداي-اق ول بۇرىنعىشا جاسىرىلىپ, جابۋلى تاقىرىپ كۇيىندە كەلە جاتقانىن كورسەتەدى. ونى مەملەكەت باسشىسىنىڭ ءوزى جولداۋدا ايتىپ وتىرعانى دا بەكەر ەمەس. قورعانىس مينيسترلىگىنىڭ باسشىلىعى مەن قۇقىق قورعاۋ سالاسىنداعى وزگە دە مەكەمەلەر بۇعان ءجىتى نازار اۋدارۋعا ءتيىس.
ەگەر وسىنداي وقيعالار قايتالانا بەرسە, اسكەرگە كەتكەن بالالارىمىز اركىمنەن تيىن-تەبەن سۇراپ جۇرسە, تاياق جەپ, ۇيىنە مۇگەدەك بولىپ ورالىپ جاتسا, بۇل – جۇيەدە ۇلكەن پروبلەما بار ەكەنىنىڭ ايقىن كورسەتكىشى. مۇنى توقتاتۋ كەرەك. سونداي-اق اسكەر سالاسىنا ۇلكەن رەفورما قاجەت. بۇل رەفورمانى تسيفرلىق پلاتفورما جاساۋدان باستاساق دەگەن ويىم بار. بالالارىمىزدىڭ قاۋىپسىزدىگىن تىكەلەي رەجىمدە كورىپ وتىراتىن جۇيە كەرەك. ولار قولىندا تەلەفون ۇستامايدى, بىراق بوپسالايتىن كەزدە تەلەفون تابىلا قالاتىنى قىزىق.
ءبىز جاستارعا اسكەرگە بارۋ مىندەت دەيمىز. شىن مانىندە, ولار اسكەرگە, وتاندى قورعاۋعا مىندەتتەۋمەن ەمەس, ءوزىنىڭ قالاۋىمەن بارۋى كەرەك. ول ءۇشىن ءبىز جوعارىدا اتالعان كەلەڭسىزدىكتەردى جويىپ, ءتيىستى جاعداي جاساۋىمىز قاجەت. اسكەردە قاۋىپ-قاتەر جوق ەكەنىنە ولاردىڭ اتا-انالارىنىڭ دا كوزىن جەتكىزگەن ءجون. جاۋىردى جابا توقىعانمەن, جارانىڭ جازىلمايتىنى بەلگىلى, سوندىقتان بۇل جاعدايعا بارىنشا كوڭىل اۋدارۋ كەرەك. ەگەر جاعداي وسى بەتىمەن كەتە بەرسە, قوعامنىڭ ءتيىستى رەاكتسياسى بولادى. قولدان الەۋمەتتىك دۇردارازدىق تۋدىرماعان ءجون.
نارتاي ارالباي ۇلى,
ءماجىلىس دەپۋتاتى
