الاتاۋ اۋىلىنىڭ تۇرعىنى اسەمگۇل توقتاسىنوۆا «اۋىل اماناتى» باعدارلاماسى تۋرالى ەستىگەن ساتتەن-اق ىسكە كىرىسەدى. قۇشاق-قۇشاق قاعازدى قۇشاقتاپ, ءتۇرلى مەكەمەگە بارىپ, قۇجاتىن راسىمدەپ, تابانىنان تاۋسىلىپ ءجۇرىپ, الدىمەن «اسەمگۇل» جەكە كاسىپكەرلىگىن اشسا, ارتىنشا اۋىلدىقتاردى جارىلقايتىن جوبا اياسىندا 8,5 ميلليون تەڭگە نەسيە الىپتى. وسىلايشا, وتاۋىنىڭ وشاعىن جاعىپ, اعايىننىڭ قاباعىن باعىپ وتىرعان كەلىنشەك مۇعالىمدىك جۇمىسىمەن قاتار, وتباسىنىڭ تابىسىن ارتتىرۋدى تاعى ءبىر ءىستى باستاۋعا بەلدى بەكەم بۋادى.
«وتاعاسى ەكەۋمىزدىڭ جۇمىسىمىز بار بولسا دا, جاڭا ءبىر ءىس باستاعانىمىز ءجون دەپ شەشتىك. قۇر جاتقانعا قۇت قونبايدى. وسىنى انىق ۇقتىق تا, كۇندەر بويى كەڭەسىپ, اپتا بويى اقىلداسىپ, جوبا اياسىندا قۇجات تاپسىردىق. قۇداي دا ادامنىڭ نيەتىنە قاراي بەرەدى عوي. مەملەكەت تاراپىنان قاراستىرىلعان نەسيەمىزدى الدىق. ويلانا كەلە, ۋاق مال ساتىپ الۋ تۋرالى شەشىم قابىلدادىق. جۇمىس پەن شارۋاشىلىقتى قاتار يگەرۋ البەتتە وڭاي ءىس ەمەس ەكەن. وعان انىق كوزىمىز جەتتى. بارىنە بىردەي ۇلگەرۋ كەرەك. وتاعاسى سەرىك «قازسۋشار» مەكەمەسىنىڭ اۋداندىق فيليالىندا سۋ رەتتەۋشى بولىپ ەڭبەك ەتەدى. سوندىقتان ءبىز الا تاڭنان تۇرىپ, بار شارۋانى رەتىمەن اتقارامىز. بىزدە بوس ۋاقىت دەگەن بولمايدى. جۇمىسقا بارماس بۇرىن تاڭ الاگەۋىمنەن مالدىڭ قامىن جاسايمىز», دەيدى اسەمگۇل توقتاسىنوۆا.
جۋالىنىڭ جۇپار اۋاسىن جۇتىپ وسكەن وتباسىنا مەحناتقا تولى اۋىل تىرشىلىگى تاڭسىق ەمەس. مالدى جايىلىمعا شىعارۋ, جەمشوبىن بەرۋ, قىسقى مال ازىعىن دايىنداۋ سەكىلدى جۇمىستاردى بەس ساۋساقتاي مەڭگەرىپ العان. ءارى ولار وزدەرى باستاعان جاڭا ءىستى ارمەن قاراي ورىستەتە تۇسۋگە دە نيەتتى ەكەن.
اسەمگۇل توقتاسىنوۆانىڭ ايتۋىنشا, وتكەن جىلى نەسيە راسىمدەگەن سوڭ قولعا تيگەن قارجىعا جامبىل اۋدانىنان 110 قوي ساتىپ الىپتى. دەر كەزىندە جەمشوبىن ازىرلەگەن. العاشقى مال تولدەتۋ ناۋقانىندا سول 110 باس قويدان 90 ءتول العان ەكەن. قازىرگى كەزدە ءبىر ازاماتتى جۇمىسپەن قامتىپ وتىرعان جايى بار.
«وتباسىمىزدا ءبىر-ءبىرىمىزدى قاي كەزدە دە قولداپ جۇرەمىز. سونىڭ ارقاسىندا تابىسقا جەتىپ وتىرعان جايىمىز بار. ءبىر سوزبەن ايتقاندا, ادال نيەتىمىز ارقىلى قولعا العان ءىسىمىز العا باسىپ, ناتيجەسىن كورىپ جاتىرمىز. قويلارىمىز وتكەن جىلدىڭ جەلتوقسان ايىنان باستاپ تولدەدى.
«اۋىل اماناتى» باعدارلاماسى اۋىلداعىلارعا ۇلكەن مۇمكىندىك بەرىپ وتىرعانىن ايتا كەتكەن ءجون. قازىعىن التىن بەسىككە قاققان تالاي وتباسى ءدال وسى جوبانىڭ شاراپاتىن كورىپ وتىرعانى انىق. ادال ەڭبەكتەن قاشپاعان وتباسىلاردىڭ ىسكەرلىگى بىزگە دە ۇلگى بولدى. تومەندەتىلگەن پايىزبەن بەرىلگەن نەسيەنى ءوز ماقساتىمىزعا جۇمسادىق. قازىرگى كەزدە قولعا العان سول اتا كاسىپتىڭ ارقاسىندا ءناسىبىمىزدى ايىرىپ وتىرمىز. اۋىلداعى اعايىننىڭ جاڭا ءىستى باستاۋى ءۇشىن مۇمكىندىك بەرىپ وتىرعان بيلىككە ايتار العىسىمىز شەكسىز.
راسىندا, اۋىل – ىستىق ۇيا, قيماس مەكەن. ۇقساتا بىلگەن ادام اۋىلدا ءجۇرىپ-اق مول تابىسقا كەنەلەدى. مۇنداعى ساف اۋا, ارىقتان اققان تاۋ سۋى, جايقالىپ وسكەن تال-تەرەك جانىڭدى راحاتقا بولەيدى. بيلىكتىڭ ءوزى اۋىل ازاماتتارىنىڭ جاڭا ءىس باستاۋىنا مۇمكىندىك تۋدىرىپ جاتقانى كوڭىل قۋانتادى. ەندى تۇرعىندار سول مۇمكىندىكتى ۇتىمدى پايدالانىپ, كاسىپ باستاۋعا تاۋەكەل ەتسە, نۇر ۇستىنە نۇر. قىسقاسى, قول قۋسىرىپ قاراپ وتىرماعان ادامعا كاسىپ تە, جۇمىس تا اۋىلدان تابىلادى», دەيدى اسەمگۇل توقتاسىنوۆا.
اتا كاسىپ ارقىلى تابىس تابۋعا بەل بۋعان وتباسىنىڭ ەڭبەكقورلىعى كوڭىل توعايتادى. اۋىلداستارىنىڭ ايتۋىنشا, سەرىك قادىروۆتىڭ وتباسىنداعى بىرلىك پەن تاتۋلىق, ەڭبەكقورلىق سەكىلدى قاسيەتتەر كوپكە ۇلگى. ولار الداعى ۋاقىتتا كاسىبىنىڭ ءورىسىن كەڭەيتە تۇسۋگە نيەتتى. ءبارى دە ساتىمەن بولسىن دەيمىز.
جامبىل وبلىسى,
جۋالى اۋدانى,
الاتاۋ اۋىلى
