سۋرەتتەردى تۇسىرگەن – ەرلان ومار, «EQ»
8-13 قىركۇيەك ارالىعىندا «قازانات» يپپودرومىنىڭ ماڭىنان بوي كوتەرگەن ەتنواۋىلدا كۇندە دۋمان, كۇندە توي. مۇندا ەتنوسپورت سايىستاردىڭ تارتىسىنان سىرت مادەني باعدارلامالار دا كوپشىلىك نازارىنا ۇسىنىلادى. قازاق حالقىنىڭ باي مۇراسى مەن ءداستۇر سالتىن دارىپتەيتىن «شاتتىق كەرۋەنى» شەرۋمەن اشىلعان اۋىلدىڭ بازارى دۇنيەجۇزىلىك كوشپەلىلەر ويىندارى بىتكەنشە تارقامايدى. ەتنواۋىلعا تابانى تيگەن تۇرعىندار مەن قالا قوناقتارى كوشپەلىلەر الەمىنە بويلاپ, ءور رۋحتى تەرەڭ سەزىنەدى.
«ونەر ورداسى» اتالاتىن باس ساحنادا كۇندە ءار وڭىردەن كەلگەن ۇزدىك ونەر ۇجىمدارى ونەر كورسەتىپ, «دۋماندى دالا» كونتسەرتى وتەدى. ەتنوفولكلورلىق انسامبل, قازاق ۇلتتىق وركەسترلەرى انمەن كومكەرسە, بي توپتارى ءداستۇرلى ەتنوستىق ستيلدە ونەر كورسەتەدى. قازاقتىڭ ءتول مۇراسى ايتىس تا كوشپەلىلەر ويىندارىنىڭ داڭقىن اسىرىپ, ءار وڭىردەن كەلگەن ۇزدىك ايتىسكەر اقىندار سارا ءسوز دوداسىنا تۇسەدى.
«كوشپەلىلەر الەمىنىڭ» ىشىندە ىرگە تەپكەن ەتنوشاتىر الاڭى قوناقتارعا قولونەر شەبەرلەرى مەن ىسمەرلەردىڭ تۋىندىلارىنان كورمە ۇيىمداستىرىلسا, «شىعىس بازارىنا» كەلگەن كوپشىلىك قازاقتىڭ ۇلتتىق تاعامدارىن ۇسىنعان مەيرامحانالاردان ءدام تاتادى. دۇنيەجۇزىلىك كوشپەلىلەر ويىندارىنىڭ ءرامىزى سانالاتىن كادەسىيلاردى دا وسى ماڭنان تاباسىز. ورتالىق الاڭدا ۇلتتىق ويىن تۇرلەرىن قامتىعان بالالار الاڭقايى دا بار. حالىق مۋزىكاسىنا ارنالعان ساحنا, اشىق اسپان استىنداعى كوشپەلى حالىقتىڭ باي مۇراسىننان سىر شەرتەتىن وركەنيەتتەر مۇراجايى, سپورتتىق ءىس-شارالار وتەتىن ورىن دا بار.
«كوشپەلىلەر الەمى» ەتنواۋىلدا وتەتىن ءىس-شارانىڭ بارلىعىنا كىرۋ تەگىن. كۇندەلىكتى ساعات 11.00-دەن تۇنگى 21.00-گە دەيىن ارالاۋعا بولادى. استانادا ءوتىپ جاتقان دۇنيەجۇزىلىك كوشپەلىلەر ويىندارىنا وراي «قازاق ەلى» مونۋمەنتى, «اتاتۇرىك» پاركى, «بايتەرەك» مونۋمەنتى مەن ورتالىق ساياباقتا دا ەتنواۋىلدار اشىلىپ, قالا تۇرعىندارى مەن قوناقتارىنا كونتسەرتتىك باعدارلاما ۇسىنىلىپ, سپورتتىق ويىنداردان سايىس وتكىزىلەدى.
