قازىرگى ۋاقىتتا سالىق كودەكسىندە ارناۋلى سالىق رەجىمىنىڭ 7 ءتۇرى قاراستىرىلعان. ونىڭ 4 ءتۇرى – شاعىن كاسىپكەرلىك سۋبەكتىلەرىنە, 2 ءتۇرى – اۋىل شارۋاشىلىعى ونىمدەرىنە, 1 ءتۇرى بولشەك ساۋدا سالىعى شاعىن جانە ورتا بيزنەسكە ارنالعان.
كاسىپكەرلىكتى دامىتۋعا قولايلى جاعداي جاساۋ ماقساتىندا سالىق كودەكسىندە جەكەلەگەن سالىقتاردى ەسەپتەۋ جانە تولەۋ ءتارتىبىن جەڭىلدەتۋ كوزدەلىپ وتىر. سونداي-اق بۇل رەجىمدەر جەڭىلدىك مولشەرلەمەلەرىن جانە سالىق جۇكتەمەسىن ازايتۋعا باعىتتالعان باسقا دا تەتىكتەردى بەلگىلەيدى.
مەملەكەت باسشىسى قازاقستان حالقىنا جولداۋىندا سالىق رەجىمدەرىن وڭتايلاندىرۋدى تاپسىردى. وسى ماقساتتا جاڭا سالىق كودەكسىندە ارناۋلى سالىق رەجىمدەرىنىڭ ءۇش ءتۇرى ۇسىنىلادى:
1) ءوزىن-ءوزى جۇمىسپەن قامتىعانداردى (جەكە تۇلعالاردى جەكە تابىس سالىعىن تولەۋدەن بوساتۋ, ارنايى ءموبيلدى قۇرىلعىلار بويىنشا الەۋمەتتىك تولەمدەردى ەسەپتەۋ);
2) وڭايلاتىلعان دەكلاراتسيا نەگىزىندە (وڭايلاتىلعان دەكلاراتسيا مەن بولشەك ساۋدا سالىعىن بىرىكتىرۋ);
3) شارۋا جانە فەرمەر قوجالىقتارى بويىنشا (قولدانىستاعى ءتارتىپ ساقتالدى, بىرىڭعاي جەر سالىعىنىڭ جويىلۋىنا بايلانىستى سالىق تەك جەكە تابىس سالىعى تۇرىندە تولەنەتىن بولادى). مەملەكەت باسشىسىنىڭ قازاقستان حالقىنا جولداۋىنا سايكەس جاڭا سالىق كودەكسىن قابىلداۋ كەلەسى جىلعا شەگەرىلدى.
جاڭا سالىق كودەكسىنىڭ جوباسى اياسىندا سالىقتىق اكىمشىلەندىرۋدى وڭايلاتۋعا جانە تسيفرلاندىرۋعا ەرەكشە كوڭىل بولىنگەن. نەگىزگى ماقسات – سالىق تولەۋشىلەردىڭ سالىق مىندەتتەمەلەرىن قاراپايىم ورىنداۋى. قارىم-قاتىناستىڭ بۇل فورماتىن قولدانۋ سالىقتىق اكىمشىلەندىرۋدى جەڭىلدەتىپ قانا قويماي, سالىق تولەۋشىلەرگە حابارلامالار مەن مەملەكەتتىك قىزمەتتەردى جەدەلدەتىپ الۋعا مۇمكىندىك بەرەدى.
سەيىلجان احمەتوۆ,
قارجى مينيسترلىگى مەملەكەتتىك كىرىستەر كوميتەتى توراعاسىنىڭ ورىنباسارى
