ەكس-ۆەلوسپورتشى لەنس ارمسترونگ تاقىر كەدەي بولىپ قالۋى مۇمكىن

استانا. 13 ماۋسىم. بەلگىلى ەكس-ۆەلوسپورتشى, دوپينگ قولدانعانى ءۇشىن ءومىر بويىنا سپورتتان الاستاتىلعان لەنس ارمسترونگ 100 ملن. دوللارىنان ايىرىلىپ قالۋى مۇمكىن. بۇل تۋرالى eurosport.ru حابارلادى. قازىرگى تاڭدا ارمسترونگ US Postal ۆەلوكومانداسىندا بىرگە سايىسقا تۇسكەن ارىپتەسى فلويد لەنديسپەن جانە اقش ۇكىمەتىمەن سوتتاسۋدا. ەگەر سوت شەشىمى بويىنشا بۇرىنعى سپورتشى جەڭىلەتىن بولسا, بارلىق دۇنيە-مۇلكىنەن ايىرىلادى. Cycling Weekly باسىلىمىنا بەرگەن سۇحباتىندا ول: «ەگەر بۇل ىستە جەڭىلەتىن بولسام, ءبىز بۇدان بىلاي ءدال وسىلاي مەنىڭ ۇيىمدە ەمىن-ەركىن اڭگىمەلەسىپ وتىرا المايمىز. ءتىپتى ول كەزدە مەنىڭ ءۇيىم دە بولمايدى. سەبەبى, سوتتا جەڭىلسەم مەن 100 ملن. دوللارى بار ادامداردىڭ قاتارىندا بولمايمىن», – دەدى. سونداي-اق, ارمسترونگ بارلىق جانكۇيەرىنەن كەشىرىم سۇرادى. «مەن ماعان سەنگەن, جانكۇيەر بولعان, قولداۋ بىلدىرگەن, قانداي جاعداي بولسىن قورعاعان ادامداردىڭ بارىنەن كەشىرىم سۇرايمىن. ولاردىڭ سونشالىقتى ىقىلاستارىن بىلە تۇرا, سوڭىندا ءبارىن ساتىپ كەتتىم. بۇل ءىسىم ءۇشىن قاتتى وكىنەمىن. ەگەر ءار جانكۇيەرىمە بارىپ, جەكەلەي كەشىرىم سۇراۋ مۇمكىن بولسا, ءدال سولاي جاسار ەدىم», – دەيدى ول. لەنس ارمسترونگ دوپينگ داۋىنا دەيىن ۆەلوسپورتتاعى داڭقتى سپورتشىلاردىڭ ءبىرى بولدى. «تۋر دە فرانس» كوپكۇندىگىن جەتى مارتە جەڭىپ العان ول دوپينگ قولدانعانىن مويىنداعاننان كەيىن بارلىق اتاق-داڭقىنان ايىرىلعانى بەلگىلى. ايبەك مولداباەۆ. دەرەك, سۋرەت: eurosport.ru.