«استانا ەكسپو-2017» كومپانياسىنىڭ بۇرىنعى باسشىسى تۇتقىندالدى

استانا. 13 ماۋسىم. استانانىڭ الماتى اۋداندىق №2 سوتىنىڭ شەشىمىمەن «استانا ەكسپو-2017» ۇلتتىق كومپانياسىنىڭ بۇرىنعى باسقارما توراعاسى تالعات ەرمەگياەۆ 2 ايعا ءۇي قاماققا الىندى. بۇل تۋرالى «قازتاگ» جانە tengrinews.kz ينتەرنەت رەسۋرستارىنا سىلتەمە جاساعان «قازاقپارات» حابارلادى. سوت شەشىمىندە: «قازاقستان رەسپۋبليكاسى قىلمىستىق كودەكسىنىڭ 4-ءبولىمى, 176-بابىنىڭ «ب» تارماعى بويىنشا – «سەنىپ تاپسىرىلعان بوتەننىڭ مۇلكىن اسا ءىرى كولەمدە يەلەنۋ نەمەسە تالان-تاراجعا سالۋعا» كۇدىكتى تالعات ەرمەگياەۆكە قاتىستى «ءۇي قاماق» تۇرىندە بۇلتارتپاۋ شاراسىن قولدانۋ سانكتسيالانسىن», – دەلىنگەن. بۇعان دەيىن اتالعان كومپانياعا قاراستى قۇرىلىس دەپارتامەنتىنىڭ بۇرىنعى ديرەكتورى قاجىمۇرات ۇسەنوۆ ۇستالىپ, ءۇي قاماققا الىنعان بولاتىن. ال 11 ماۋسىمدا مەملەكەت باسشىسىنىڭ وكىمىمەن تالعات امانگەلدى ۇلى ەرمەگياەۆ «استانا ەكسپو-2017» ۇلتتىق كومپانياسى» اكتسيونەرلىك قوعامىنىڭ باسقارما توراعاسى قىزمەتىنەن بوساتىلدى. ەلامان قوڭىر. دەرەك: «قازاقپارات». سۋرەت: ratel.kz.