فۋتبول. قازاقستاننىڭ 16 ماۋسىمعا جوسپارلانعان ويىنى وتپەيتىن بولدى

استانا. 13 ماۋسىم. فۋتبولدان قازاقستان قۇراماسىنىڭ 16 ماۋسىمعا جوسپارلانعان ۋگانداعا قارسى ويىنى وتپەيتىن بولدى. بۇل تۋرالى vesti.kz حابارلادى. بۇعان دەيىن ەكى ەلدىڭ فۋتبول فەدەراتسيالارى اراسىندا جولداستىق كەزدەسۋ تۋرالى كەلىسىم بولعان. دەگەنمەن, بەلگىلەنگەن مەرزىمگە ءۇش كۇن قالعان كەزدە ماتچتىڭ وتپەيتىنى بەلگىلى بولدى. مۇنىڭ سەبەبى الداعى ۋاقىتتا جاريالانادى. نەگىزى 16 ماۋسىمدا يۋري كراسنوجاننان ءتالىم الاتىن فۋتبولشىلارىمىز افريكانىڭ تاعى ءبىر وكىلى كابو-ۆەردەنى قابىلداۋى ءتيىس ەدى. الايدا, قارسىلاسىمىز سوڭعى ساتتە قازاقستانعا كەلۋدەن باس تارتتى. سوعان بايلانىستى ۋگاندا قۇراماسىمەن كەلىسىم جاسالعان ەدى. وكىنىشكە قاراي, بۇل ەلمەن دە فۋتبول ويناۋ مۇمكىن بولماي وتىر. وسىدان ءبىر اي بۇرىن قازاقستان قۇراماسى قارا قۇرلىقتان كەلگەن بۋركينا-فاسو كومانداسىن قابىلداعانى بەلگىلى. اتالعان ماتچتا ەسەپ اشىلعان جوق. ال ۇلتتىق قۇرامامىز سوڭعى ويىنىن كەشە تۇركيا قۇراماسىنا قارسى وتكىزدى. فۋتبولدان 2016 جىلعى ەۋروپا چەمپيوناتىنا ىرىكتەۋ ءتۋرنيرى اياسىندا وتكەن كەزدەسۋدە تۇرىكتەر 1:0 ەسەبىمەن جەڭىسكە جەتتى. ەلامان قوڭىر. دەرەك, سۋرەت: vesti.kz.