تەكسەرىس كەزىندە ولاردىڭ ەڭبەككە جارامسىزدىق قاعازى ەشقانداي مەديتسينالىق ۇيىمدا تىركەلمەگەن بولىپ شىقتى. بۇل تۋرالى قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ وكىلدەرى مالىمدەدى.
وسىلايشا, وڭاي ولجا تاپقىسى كەلگەندەر بيۋدجەتتىڭ 24 ملن تەڭگەسىن قالتاعا باسقان. ەڭبەك موبيلدىلىگى ورتالىعى اتىنان بەرىلگەن تالاپ-ارىز سوتتا قاناعاتتاندىرىلىپ, ونىڭ 9 ملن تەڭگەسى قازىناعا قايتارىلدى. قالعان قارجى جەكە سوت ورىنداۋشىلاردىڭ كۇشىمەن ءماجبۇرلى تۇردە وندىرىلەدى.
بەلگىلى ءبىر مەرزىمگە – 6 اي, 8 اي, 1 جىل دەگەن سياقتى جۇمىسقا جارامسىز انىقتامالار. ءىس جۇزىندە ولار – جۇمىسقا جارامدى ادامدار. ول انىقتامالار ءتيىستى مەكەمەلەردە, ەمحانالاردا تىركەلمەگەن. ياعني قولدان جالعان جاساپ بەرىلگەن انىقتامالار. 2023 جىلدىڭ ءتورتىنشى توقسانىندا 3 اي العان. 2024 جىلدىڭ ءبىرىنشى توقسانىندا العان, - دەيدى قالالىق ەڭبەك موبيلدىلىگى ورتالىعىنىڭ ءبولىم باسشىسى ەربولات احانوۆ.
بيىل شىمكەنتتە اتاۋلى الەۋمەتتىك تولەم ورتاشا تابىسى تومەن 8 200-دەن اسا وتباسىعا تاعايىندالدى. بۇل – بىلتىرعىمەن سالىستىرعاندا, 30 پايىز از كورسەتكىش.
ەندى سالالىق مينيسترلىك شىن مانىندە كومەككە مۇقتاج ادامعا قولداۋ كورسەتۋ ءۇشىن جاڭا پيلوتتىق جوبانى ىسكە قوسپاق. ياعني وتباسى مۇشەلەرىنىڭ تابىسى عانا ەسەپتەلمەي, شىعىنى دا ەسكەرىلەتىن بولادى. بىراق بۇيرىق ءالى زاڭدى كۇشىنە ەنگەن جوق.
