كاسىپقوي بوكس. يسا اقبەرباەۆ كەزەكتى جەڭىسىنە قول جەتكىزدى

استانا. 13 ماۋسىم. كاسىپقوي بوكستا ەل نامىسىن قورعاپ جۇرگەن قازاق بوكسشىسى يسا اقبەرباەۆ Global Boxing Council (عالامدىق بوكس كەڭەسى) تۇجىرىمى بويىنشا چەمپيوندىق اتاعىن قورعاپ قالدى. بۇل تۋرالى allboxing.ru پورتالىنا سىلتەمە جاساعان egemen.kz حابارلادى. گەرمانيا استاناسى – بەرلين قالاسىندا وتكەن بوكس كەشىندە يسا برازيليالىق جۋليو سەزار دوس سانتوس ەسىمدى بوكسشىعا قارسى جۇدىرىقتاستى. 12 راۋندقا سوزىلعان جەكپە-جەكتە تورەشىلەردىڭ شەشىمىمەن قازاق بوكسشىسى جەڭىسكە جەتتى. قازىلاردىڭ بەرگەن باعاسى بويىنشا يسا اقبەرباەۆتىڭ پايداسىنا 117:110, 116:111, 117:110 ەسەبى تىركەلدى. وسىمەن وتانداسىمىز كاسىپقوي بوكستاعى 16-شى جەڭىسىنە قول جەتكىزدى. بۇگىنگە دەيىن 17 كەزدەسۋ وتكىزگەن بولىپ سانالعانىمەن, ءبىر جەكپە-جەك وتپەي قالدى. دەگەنمەن, رەسمي كورسەتكىشتەرى تۋرالى ايتقان كەزدە ول كەزدەسۋ دە ەسەپكە الىنادى. ياعني, يسا 17 جەكپە-جەكتىڭ 16-سىندا جەڭىسكە جەتتى. 32 جاستاعى بوكسشى ءبىرىنشى اۋىر سالماقتا ونەر كورسەتەتىنىن ايتا كەتەيىك. ال وسىمەن 32-كەزدەسۋىن وتكىزگەن 37 جاستاعى برازيليا بوكسشىسى ءۇشىن 5-ءشى جەڭىلىس تىركەلدى. سايكەسىنشە ونىڭ 27 رەت مەرەيى ۇستەم بولدى. ەلامان قوڭىر. دەرەك: egemen.kz. سۋرەت: allboxing.ru.