فوتو: ۇكىمەت
ولجاس بەكتەنوۆ ستەپنوگورسك تاۋ-كەن حيميا كومبيناتىن ارالاۋ بارىسىندا قۇرامىندا ۋران بار شيكىزاتتى قايتا وڭدەۋ بويىنشا وزىق وندىرىستىك پروتسەستەرمەن تانىستى.
«قازاقستان الەمدىك ءوندىرىستىڭ شامامەن 40%-ىن قامتاماسىز ەتە وتىرىپ, ۋران ءوندىرۋ بويىنشا الەمدە ءبىرىنشى ورىندا تۇر. ۋراندى قايتا وڭدەيتىن ستەپنوگورسك تاۋ-كەن حيميا كومبيناتى الەمدىك اتوم ەنەرگەتيكاسى ءۇشىن تۇراقتى جەتكىزىلىمدى قامتاماسىز ەتەدى جانە ءوڭىر ەكونوميكاسىنىڭ دامۋىنا ەلەۋلى ۇلەس قوسادى. وتكەن جىلى كومبينات 1650 توننا دايىن ۋران ءونىمىن ءوندىردى. جوبالىق قۋاتى جىلىنا 4 مىڭ توننا تابيعي ۋراندى, قايتا وڭدەۋ – 1 ملن تونناعا دەيىن مىس-موليبدەن كەنىن قۇرايدى», دەلىنگەن حابارلامادا.
تەكسەرۋ بارىسىندا پرەمەر-مينيسترگە قايتا وڭدەۋ قۋاتىن جىلىنا 6 مىڭ توننا ۋرانعا دەيىن ۇلعايتۋعا باعىتتالعان كومبيناتتى ودان ءارى جاڭعىرتۋ جونىندەگى جوسپارلار تۋرالى باياندالدى. ايتا كەتەيىك, قالا قۇراۋشى كاسىپورىندا 1 مىڭنان استام ادام جۇمىس ىستەيدى.
سونىمەن قاتار 2026 جىلدان باستاپ «بۋدەنوۆ» كەن ورنىنان جەتكىزىلەتىن قۇرامىندا ۋران بار شيكىزاتپەن تولىق قۋاتىنا شىعارۋ جوسپارلانعان. بۇل مونوقالا تۇرعىندارىن جاڭا جۇمىس ورىندارىمەن جانە تۇراقتى جۇمىسپەن قامتاماسىز ەتەدى.
جالپى, قازاقستاننىڭ ەنەرگيا تۇتىنۋ كولەمى شامامەن 17 گۆت قۇرايدى, بۇل ءوندىرىس كولەمىنەن جوعارى. بۇل رەتتە قازىر ەلەكتر ەنەرگياسىنىڭ بەلگىلى ءبىر كولەمى كورشىلەس ەلدەردەن ساتىپ الىنۋدا. سوندىقتان قازاقستان باسقا ەنەرگيا كوزدەرىنە كوشۋى ءتيىس ەكەنى اتاپ ءوتىلدى.
اتوم ەنەرگەتيكاسىنىڭ قازاقستان ءۇشىن نەگىزگى ەنەرگيا كوزىنە اينالىپ, ەنەرگەتيكا جۇيەسىنىڭ تۇراقتى دامۋىنا ىقپال ەتۋى مۇمكىن ەكەندىگى اتاپ ءوتىلدى. رەفەرەندۋم قورىتىندىسى بويىنشا وڭ شەشىم قابىلدانعان جاعدايدا اەس-ءتىڭ سالىنۋى ءوسىپ جاتقان سۇرانىس جاعدايىندا نارىقتاعى ەلەكتر ەنەرگياسى تاپشىلىعىن ازايتۋعا, جابدىقتاردىڭ توزۋى سەبەبىنەن تومەندەپ جاتقان ءوندىرىستى تولىقتىرۋعا مۇمكىندىك بەرەدى. بۇل قاۋىپسىز ءارى ەكولوگيالىق تازا ەنەرگيانى تۇراقتى تۇردە وندىرۋگە جول اشادى.
«ەنەرگەتيكا جۇيەسىنىڭ سەنىمدىلىگى مەن تۇراقتىلىعى – ۇكىمەتتىڭ باستى مىندەتى. قالىپتاسقان كۇردەلى احۋال بىزدەن تۇبەگەيلى جاڭا تاسىلدەر مەن كوپ جىلدان بەرى قوردالانىپ قالعان ماسەلەنى شەشۋدى تالاپ ەتىپ وتىر. قازاقستانعا ەلەكتر ەنەرگياسىنىڭ جاڭا نەگىزگى گەنەراتورىن ەنگىزۋ قاجەت. ەگەر پرەزيدەنت 6 قازانعا بەلگىلەگەن رەفەرەندۋمدا حالىقتان قولداۋ كوپ بولسا, وندا ءبىز وسى باعىتپەن جۇرەمىز. ونسىز ونەركاسىپتى دامىتۋ دا, قاراپايىم تىرشىلىكتى قامتاماسىز ەتۋ دە مۇمكىن ەمەس. بۇل ەلىمىزدىڭ دامۋىنا مۇمكىندىك بەرەدى», دەدى ولجاس بەكتەنوۆ.
