استانا. 13 ماۋسىم. فۋتبولدان 2016 جىلعى ەۋروپا چەمپيوناتىنا ىرىكتەۋ ءتۋرنيرى اياسىندا قازاقستان ءوز الاڭىندا تۇركيانى قابىلداپ, 0:1 ەسەبىمەن جەڭىلىپ قالدى. وسىلايشا ۇلتتىق قۇرامامىز اتالعان تۋرنير بارىسىندا قاتارىنان بەسىنشى رەت قارسىلاستارىنا ەسە جىبەرىپ وتىر. بۇل تۋرالى egemen.kz حابارلادى.
العاشقى تايم تەڭ جاعدايدا ءوربىدى. باستاپقى مينۋتتاردا قوناقتار باسىمدىققا يە بولعانىمەن, ۋاقىت وتە الاڭ يەلەرى دە سەنىمدى ويىن ورنەگىن كورسەتتى. ءتىپتى سەرگەي حيجنيچەنكو گول دا سالعان بولاتىن. دەگەنمەن, ول ويىننان تىس قالىپ, ەسەپ اشىلعان جوق. ودان بولەك ۇلان قونىسباەۆتىڭ دا قاقپاشىمەن بەتپە-بەت شىعاتىن مۇمكىندىگى بولعان.
جالپى, ماتچتىڭ ءبىرىنشى بولىگىندە ءبىزدىڭ ويىنشىلار ساپىنان دميتري شومكودا عانا گول سوعاتىن كەرەمەت ءسات بولدى. الايدا, ونىڭ سوققىسىن قاقپاشى بابادجان قايتاردى. ال تۇركيا ساپىنان مەحمەت توپال مەن بۋراك يىلمازدار گول سوعاتىن مۇمكىندىكتەرىن پايدالانا المادى.
ەكىنشى تايم قازاقستانىڭ شابۋىلىمەن باستالدى. باۋىرجان يسلامحاننىڭ ايىپ الاڭىنا ەنىپ بارىپ, الىس بۇرىشتى كوزدەپ جاساعان سوققىسى قاقپادان ءسال عانا قيىس كەتتى. ارتىنشا قونىسباەۆتىڭ دا سوققىسى قاقپا باعانىن جاناپ ءوتتى. كەزدەسۋدىڭ 65-مينۋتىندا كوماندا كاپيتانى سامات سماقوۆ جاراقات الىپ, ويىندى وزگەلەردەن ەرتە اياقتاۋعا ءماجبۇر بولدى. باس جاتتىقتىرۋشى ونىڭ ورنىنا جاس قورعاۋشى ابزال بەيسەبەكوۆتى شىعارعانىمەن, ساماتتىڭ ورنى ويسىراپ تۇردى. ناتيجەسىندە تۇرىكتەردىڭ ءدال وسى ورتالىق الاڭنان باستاعان شابۋىلدارى قاقپاعا جاسالعان سوققىلارمەن اياقتالىپ جاتتى. سونداي ساتتەردىڭ بىرىندە بۋراك يىلماز پوكاتيلوۆپەن بەتپە-بەت شىعىپ, سوققى جاسادى. ابىروي بولعاندا, دوپ قاقپا باعانىنان كەيىن سەرپىلدى.
ويىننىڭ 83-مينۋتىندا قوناقتار ەسەپ اشىپ, دەگەندەرىنە جەتتى. ايىپ الاڭىنىڭ ىشىندە ارىپتەستەرىنەن پاس العان كاپيتان اردا تۇران اينالىپ بارىپ سوققى جاسادى. بۇعان دەيىن بىرنەشە قاۋىپتى سوققىنىڭ بەتىن قايتارىپ ۇلگەرگەن قاقپاشىمىز بۇل جولى ەش شارا قولدانا المادى. ناتيجەسىندە جالعىز گول ويىن تاعدىرىن شەشۋگە جەتكىلىكتى بولدى.
كەزدەسۋدەگى ستاتيستيكالىق كورسەتكىشتەرگە نازار اۋدارايىق. فاتيح تەريمنىڭ شاكىرتتەرى كەشەگى ويىندا 19 مارتە قاقپاعا سوققى جاساسا, سونىڭ 6-ۋىن تۋرا باعىتتاعان. ال قازاقستان 4 سوققىمەن جاۋاپ بەردى. ونىڭ بىرەۋى عانا قاقپا اڭعارىنا ءدال جاسالدى. بۇرىشتاما دوبى بويىنشا دا قوناقتار ەكى ەسە باسىمدىققا يە (3 – 7). دەسەك تە, دوپقا يەلىك ەتۋ كورسەتكىشى جاعىنان ايتارلىقتاي ەسە جىبەردىك دەي المايمىز (44% – 56%). ءتىپتى 1-تايم قورىتىندىسى بويىنشا بۇل كورسەتكىش 50% – 50% بولعانىن ايتا كەتەيىك.
وسىلايشا, يۋري كراسنوجاننان ءتالىم الاتىن فۋتبولشىلارىمىز 1 ۇپايمەن «ا» توبىنداعى سوڭعى ورنىندا قالدى. ال ۇپاي سانىن 8-گە جەتكىزگەن تۇرىكتەر ازىرگە 4-ورىندا. توپ باسىندا 15 ۇپايمەن يسلانديا كەلەدى. كەشە تۇندە ولار چەحيا قۇراماسىن 2:1 ەسەبىمەن جەڭگەن بولاتىن. ال ءۇشىنشى ساتىعا ورنالاسقان نيدەرلاندى (10 ۇپاي) كەشە سىرت الاڭدا لاتۆيادان 2:0 ەسەبىمەن باسىم ءتۇستى.
قازاقستان – تۇركيا 0:1 (0:0)
12 ماۋسىم. الماتى. «ورتالىق» ستاديونى. 26 000 كورەرمەن.
تورەشى: مايكل وليۆەر (انگليا).
قازاقستان: ستاس پوكاتيلوۆ, سامات سماقوۆ (ابزال بەيسەبەكوۆ 67), مارك گۋرمان (اسحات تاعىبەرگەن 78), رەنات ابدۋلين, سەرگەي مالىي, دميتري شومكو, گەنريح شميدتگال, يۋري لوگۆينەنكو, ۇلان قونىسباەۆ, باۋىرجان يسلامحان (جامبىل كوكەەۆ 85), سەرگەي حيجنيچەنكو.
تۇركيا: ۆولكان بابادجان, سەردار ازيز, حاكان بالتا, گەكحان گەنيۋل, سەميح كايا (ەمرە تاشدەمير 75), وزان تۋرفان ء(ۇمىت بۋلۋت 64), اردا تۇران, مەحمەت توپال (ۆولكان شەن 46), سەلچۋك ينان, حاكان چالحانوگلۋ, بۋراك يىلماز.
گول: اردا تۇران 83.
ەسكەرتۋلەر: گەنريح شميدتگال 77, رەنات ابدۋلين 88, دميتري شومكو 90+2.
ەلامان قوڭىر.
دەرەك: egemen.kz.
سۋرەت: sports.kz.
كەشە الماتىداعى ويىننان بولەك, اتالعان ىرىكتەۋ ءتۋرنيرى اياسىندا تاعى 8 كەزدەسۋ ءوتتى. ول ماتچتاردىڭ ناتيجەلەرى تومەندەگىدەي:
«ا» توبى
يسلانديا – چەحيا 2:1 (0:0)
گولدار: گۋننارسسون 60, سيگتورسسون 76 – دوچكال 55.
لاتۆيا – نيدەرلاندى 0:2 (0:0)
گولدار: ۆەينالدۋم 67, نارسينح 71.
«ۆ» توبى
بوسنيا جانە گەرتسەگوۆينا – يزرايل 3:1 (2:1)
گولدار: ۆيشچا 42, 75, دجەكو 45+2 (پەنالتي) – بەن حايم 41.
ۋەلس – بەلگيا 1:0 (1:0)
گول: بەيل 25.
اندوررا – كيپر 1:3 (1:2)
گولدار: دوسسا (اۆتوگول) 2 – مىتيديس 13, 45, 53.
«ن» توبى
نورۆەگيا – ازەربايجان 0:0
حورۆاتيا – يتاليا 1:1 (1:1)
گولدار: ماندجۋكيچ 11 – كاندرەۆا 36.
مالتا – بولگاريا 0:1 (0:0)
گول: پوپوۆ 56.
