مەملەكەت باسشىسى قاسىم-جومارت توقاەۆ ەل ابىرويىن اسىرعان ساڭلاقتار داۆيد دەگتيارەۆ پەن اقمارال ناۋاتبەكتى جارقىن جەڭىسىمەن قۇتتىقتادى. اتباسارلىق پاۋەرليفتەر پاريج كۇللى الەمدى تولاعاي كۇشىمەن تاڭداندىرىپ, 188 كگ تارتاتىن زىلتەمىردى ەركىن كوتەردى. كۇمىس مەدال تيگەن كۋبالىق پابلو راميرەس تە, قولا جۇلدەنى قاناعات تۇتقان قىتايلىق سپورتشى يان تسزينلاننىڭ دا قايراتى جەرلەسىمىزدەن اسپادى. 54 كگ سالماقتا سىنعا تۇسكەن داۆيد تورتجىلدىق دوداسىنىڭ چەمپيونى اتانۋدان باستى ۇمىتتىلەردىڭ ءبىرى بولدى. وعان نەگىز دە جوق ەمەس.
2021 جىلى جاپونيانىڭ توكيو قالاسىندا وتكەن جازعى پاراليمپيادا ويىندارىنا العاش رەت قاتىسقان ساڭلاق توپ جارىپ, ەل مەرەيىن اسىردى. توكيو جازعى وليمپياداسىندا سپورتشىلارىمىز 8 قولانى مىسە تۇتىپ, ءانۇرانىمىز شىرقالماعاندا 25 جاستاعى داۆيد دەگتيارەۆ پاراليمپيا ويىندارىندا مەرەيىمىزدى تاسىتقان ەدى.
قالىڭ جانكۇيەر ءداۆيدتى 2021 جىلدان بەرى تانيدى. سەبەبى 2016 جىلى كوللەدج ستۋدەنتى العاش پاۋەرليفتينگ سپورتىنىڭ قىر-سىرىن مەڭگەردى. العاشقى سىناق جاتتىعۋىنان-اق قىزىعۋشىلىعى ويانعان ساڭلاقتىڭ ەكى دۇركىن پاراليمپيادا چەمپيونى اتاناتىنىنا ءشۇباسىز سەنگەندەر از. تەك ونىڭ كەلەشەككە دەگەن ءۇمىتى عانا وسى بيىككە جەتەلەدى. وبلىستىق سپارتاكيادادان باستالعان داڭعىل جول پاراليمپيادا التىنىنا باستادى. قازاقستان چەمپيوناتىندا جەڭىسكە جەتىپ, الەم كۋبوگىندە باعىن سىنادى. توكيو جازعى پاراليمپيادا سىنىنا دەيىن ازيا چەمپيوناتىندا قولا مەدال بۇيىردى. 2018 جىلى يندونەزيادا وتكەن جازعى پاراازيادا دوداسىندا ەڭسەرگەن ۇزدىك كورسەتكىشىمەن كۇمىس مەدال ولجالادى. 2021 جىلدىڭ كوكتەمىندە گرۋزيادا وتكەن الەم چەمپيوناتىندا 158 كگ زىلتەمىردى ەركىن كوتەرىپ, الەمدىك رەكورد ورناتتى. ءۇش جىل بۇرىن جاپونيا استاناسىنداعى پاراليمپيادا سايىسىندا داۆيد دەگتيارەۆ 54 كگ سالماقتا 174 كگ زىلتەمىردى كوتەرگەندە, كۇمىس جۇلدەنى مىسە تۇتقان فرانتسۋز اكسەل بۋرلون مەن قولا مەدال يەگەرى اتانعان گرەكيالىق ديميترۋس باكوحريستوس جەرلەسىمىزدىڭ جەتىستىگىنە ماڭايلاي المادى (165 كگ). كاسىبي سپورتپەن شۇعىلدانىپ جۇرگەنىنە بەس جىل تولا قويماعان تولاعايدىڭ تولايىم تابىسى وسىلايشا ەسىمىن الەمگە ايگىلەدى.
بىلتىر قىتايدىڭ حانچجوۋ قالاسىندا وتكەن جازعى پاراازيادا ويىندارىنان داۆيد دەگتيارەۆ التىن مەدالمەن ورالدى. 54 كگ سالماقتا سىنعا تۇسكەن ول 187 كگ زىلتەمىردى كوتەرىپ, ازيا رەكوردىن جاڭارتقان ەدى.
«ماعان قولداۋ كورسەتكەن قازاقستان حالقىنا, بارشا جانكۇيەرگە العىسىمدى ايتامىن. «مەرگەن» سپورت كلۋبىنىڭ باسشىلىعىنا, جەكە باپكەرىم يۋري كولەسنيكوۆقا وسىنداي جەتىستىككە جەتۋ جولىندا قولداپ, وراسان كومەك كورسەتكەنى ءۇشىن رازىلىعىمدى جەتكىزەمىن», دەدى سپورتشى.
پاراليمپيادا دوداسىندا پارادزيۋدودان J2 ساناتىندا سىنعا ءتۇسىپ, 48 كگ سالماقتا دۇنيەجۇزىنىڭ تەگەۋرىندى بالۋاندارىن ايقىن ۇتقان اقمارال ناۋاتبەكتىڭ ەسىمى دە ەل سپورتىنىڭ تاريحىنا التىن ارىپپەن ادىپتەلەدى. ويتكەنى وسى سپورتتان ايەلدەر اراسىندا تۇڭعىش الەم چەمپيونى اتاندى, جازعى پارا ازيا ويىندارىندا توپ جاردى. ەندى, مىنە, پاريج تورىندە قالاقتاي قىز قازاق ەلىنىڭ ابىرويىن اسقاقتاتتى. شيرەك فينالدا ۇندىستاندىق بالۋاندى ايقىن جەڭىپ, جارتىلاي فينالدا تۇرىكتىڭ تەگەۋرىندى بالۋانىن الىپ ۇردى. ال فينالدا 70 ميلليون جانكۇيەرىنىڭ الدىندا فرانتسۋز سپورتشىسىن سان سوقتىردى.
نۇرداۋلەت جۇماعالي پاريج پاراليمپياداسىنىڭ فينالدىق سىنىنا ءوتىپ, SB13 ساناتىندا 100 مەترگە براسس ادىسىمەن جۇزۋدەن كۇمىس مەدال يەلەندى. ءۇش جىل بۇرىن توكيو جازعى پاراليمپيا ويىندارىندا قولا مەدال ەنشىلەگەن ساڭلاق بۇل جولى دا مەرەيىمىزدى تاسىتتى.
قورجىنىمىزعا قولا مەدال سالعان سپورتشى داستان مۇقاشبەكوۆ يادرو لاقتىرۋدان F36 ساناتىندا باق سىناپ, ازيا قۇرلىعىنىڭ رەكوردىن جاڭارتتى. كورسەتكىش – 16 مەتر. پاراجۇزۋدەن ريو پاراليمپياداسىنىڭ چەمپيونى ءزۇلفيا عابيدۋلينا 50 مەترگە براسس ادىسىمەن جۇزۋدە 10-ساتىعا ورنىقتى.
كەزەكتى جارىس كۇنىنىڭ ناتيجەسىندە قازاقستان سپورتشىلارى 2 التىن, 2 كۇمىس, 1 قولا مەدالمەن 33-ساتىعا ورنىقتى.
