ءمجا وزىق تەحنولوگيالار مەن زاماناۋي ەمدەۋ ادىستەرىن ەنگىزۋ ءۇشىن بىرەگەي مۇمكىندىكتەر ۇسىنادى, بۇل كۇردەلى دەنساۋلىق ساقتاۋ سالالارى, اسىرەسە ونكولوگيا ءۇشىن وتە وزەكتى ماسەلە. جەكە سەكتوردى تارتۋ – جاڭا مەديتسينالىق مەكەمەلەردى قۇرۋ, جابدىقتاۋ پروتسەسىن جەدەلدەتۋگە, سونداي-اق مامانداردىڭ بىلىكتىلىگىن ارتتىرۋعا كومەكتەسىپ, پاتسيەنتتەردى ەمدەۋ ناتيجەلەرىنە تىكەلەي اسەر ەتەدى.
بۇدان باسقا, ءمجا ساپالى مەديتسينالىق كومەككە قول جەتكىزۋدەگى تەڭسىزدىكتى ازايتا وتىرىپ, وڭىرلەردە دەنساۋلىق ساقتاۋ ينفراقۇرىلىمىن دامىتۋعا مۇمكىندىك بەرەدى جانە ورتالىق كلينيكالارعا جۇكتەمەنى ازايتادى.
ايتا كەتەيىك, سوڭعى 8 جىلدا ءمجا اياسىندا قر ونكولوگيالىق كومەك كورسەتۋ سالاسىندا زاماناۋي مەديتسينالىق وبەكتىلەردى, ونىڭ ىشىندە پەت/كت-ورتالىقتارىن, الماتى, استانادا, قازاقستان وڭىرلەرىندە سالۋ جانە جاراقتاندىرۋ بويىنشا بىرقاتار جوبالار ىسكە اسىرىلدى.
اتاپ ايتقاندا, 2019 جىلى Orhun Medical مەديتسينالىق كومپانياسىمەن مەملەكەتتىك-جەكەشەلىك ارىپتەستىك شەڭبەرىندە قازاق ونكولوگيا جانە راديولوگيا عزي-دا پەت/كت-ورتالىعى پايدالانۋعا بەرىلدى. 2022 جىلى شىمكەنت قالالىق ونكوورتالىعىندا ءمجا جوباسى اياسىندا پەت-اپپاراتى, سونداي-اق پاتسيەنتتەرگە جاڭا بۋىن ساۋلەلىك تەراپياسىن جۇرگىزۋ ءۇشىن زاماناۋي ساۋلەلىك ۇدەتكىش ورناتىلدى.
ال 2024 جىلدىڭ قىركۇيەگىندە ورال قالاسىندا ونكولوگيالىق اۋرۋلاردى يننوۆاتسيالىق دياگنوستيكالاۋ ورتالىعى اشىلدى. سونداي-اق, ءمجا اياسىندا, وڭىردە زاماناۋي كت-سيمۋلياتور مەن ساۋلەلىك ۇدەتكىشپەن جابدىقتالعان يادرولىق مەديتسينا ورتالىعى اشىلدى. جاڭا ورتالىقتا مەديتسينالىق كومەك بارلىق پاتسيەنتتەرگە تەگىن مەديتسينالىق كومەكتىڭ كەپىلدىك بەرىلگەن كولەمى (تمككك) شەڭبەرىندە, ورال قالاسى مەن باتىس قازاقستان وبلىسىنىڭ تۇرعىندارى ءۇشىن عانا ەمەس, رەسپۋبليكانىڭ بارلىق تۇرعىندارى ءۇشىن دە تەگىن كورسەتىلەدى.
سونداي-اق قىركۇيەك ايىنىڭ ورتاسىندا الماتىدا قازاق ونكولوگيا جانە راديولوگيا عزي (قازورعزي) بازاسىندا ونكولوگيالىق اۋرۋلاردى يننوۆاتسيالىق دياگنوستيكالاۋدىڭ ەكىنشى ورتالىعى جۇمىس ىستەي باستايدى. اتالعان ورتالىقتار ونكولوگيالىق اۋرۋلاردى ەرتە انىقتاۋدى ايتارلىقتاي جاقسارتادى, بۇل پاتسيەنتتەردىڭ ءومىر ءسۇرۋىن ارتتىرۋ مۇمكىندىگىن ارتتىرادى.
بۇدان باسقا, «قازاقمىس» كورپوراتسياسىمەن تالدىقورعان قالاسىندا سۋ جاڭا ونكولوگيالىق ورتالىق سالۋ تۋرالى كەلىسىمگە قول جەتكىزىلدى. تالدىقورعاندا قازىرگى زامانعى ونكولوگيالىق ورتالىقتىڭ قۇرىلىسى جەتىسۋ حالقى ءۇشىن عانا ەمەس, جاقىن ماڭداعى وڭىرلەر – الماتى, شىعىس قازاقستان جانە اباي وبلىستارى ءۇشىن دە وزەكتى. جوبانى ىسكە اسىرۋ وبلىس اكىمدىگى جەتىسۋ, «Kazakhmys Holding» جشس جانە قازاقستان دەنساۋلىق ساقتاۋ مينيسترلىگى اراسىندا قول قويىلعان ۇشجاقتى مامىلەنىڭ ارقاسىندا جۇزەگە استى.
ديليارا قايداروۆا,
قر دسم شتاتتان تىس باس ونكولوگى,
«قازاق ونكولوگيا جانە راديولوگيا عزي» اق باسقارما توراعاسى,
ۇعا اكادەميگى
الماتى
