سۋرەتتەردى تۇسىرگەن – ەرلان ومار, «EQ»
ساقا ويىنشىعا سەنىم ارتپاق
كوكپار مەن كوكبورى ويىندارىنىڭ تارتىسى «قازانات» يپپودرومىندا 9-12 قىركۇيەك ارالىعىندا وتەدى. ءدۇبىرلى دوداعا قاتىساتىن ەلىمىزدىڭ كوكپار قۇراماسى استانا قالاسىندا وقۋ-جاتتىعۋ جيىنىن وتكىزىپ جاتىر. باس باپكەرلىك قىزمەتكە تاعايىندالعانىنا كوپ ۋاقىت وتە قويماعان اقىلباي مانكەەۆ وزىنە وراسان جاۋاپكەرشىلىك جۇكتەلگەنىن, ۇلتتىق قۇراما مۇشەلەرى بارىن سالاتىنىن ايتتى.
«دۇنيەجۇزىلىك كوشپەلىلەر ويىندارىنا دايىندىقتى كۇشەيتۋ ماقساتىندا وقۋ-جاتتىعۋ جيىنى بىرنەشە كەزەڭمەن ءوتتى. نەگىزىنەن الماتى وبلىسىنداعى ارنايى جابدىقتالعان الاڭدا ازىرلىك جۇرگىزدىك. استانا قالاسىنا تامىزدىڭ سوڭىنا تامان كەلدىك. سارىارقانىڭ سارى جەلى سوعىپ, كۇزدىڭ لەبى ەرتە بايقالاتىن وڭىرگە جەرسىنۋ اتتارىمىزعا اۋىر ءتيدى. ۇلتتىق قۇراما مۇشەلەرى مىنەتىن اتتاردىڭ باسىم كوپشىلىگى وڭتۇستىك وبلىستارداعى كوكپار كوماندالارىنان جالعا الىندى. تابيعاتى جانعا جايلى جايماشۋاق وڭىردە وسكەن جانۋارلار استاناعا كەلگەندە اۋىردى. ءتىپتى سۋدى دا باستاپقىدا ىشە المادى. بىراق ۆەتەرينار ماماندار, اتبەگىلەردىڭ كومەگىمەن قايتا قوڭدانىپ جەرگە دە ۇيرەنىسە باستادى. دۇنيەجۇزىلىك كوشپەلىلەر ويىندارىندا كوكپاردان عانا ەمەس, قىرعىزدىڭ كوكبورى ويىنىنان دا, ياعني قازاندىققا سالىم سالاتىن تارتىستان دا دوداعا كىرەمىز. بىراق ءبىزدىڭ كوكپارشىلار بىرنەشە جىلدان بەرى تەك شەڭبەرگە تارتاتىندىقتان, قازاندىققا ويناپ جۇرگەن جوق», دەدى ا.مانكەەۆ.
باس باپكەر كوكبورىگە قوساتىن اتتاردىڭ ۇشقىرلىعى مەن ابجىلدىگىنە باسا ءمان بەرىلەتىنىن دە اتاپ ءوتتى.
«بىرنەشە جىلدان بەرى قازاندىققا ويناۋدى دوعارعاندىقتان, اتتار دا ۇيرەنىسە المايدى. قازاندىققا جەتكەندە يەسى تىزگىن تارتپاسا دا, ات وزدىگىنەن توقتاي الۋى كەرەك. جەردەن كوكپاردى ءىلىپ العان بالۋاننىڭ اتى توپ اراسىنان سۋىرىلىپ شىعىپ, قازاندىققا قاراي قۇستاي ۇشىپ جەتىپ كىلت كىدىرۋگە ءتيىس. ءبىزدىڭ كوكپاردىڭ اتتارى بۇعان ۇيرەنبەگەندىكتەن, اعىزىپ وتە شىعادى. جاسىرىپ قايتەمىز, جەكپە-جەككە قوياتىن قۇرامادا سەنىمدى ات بولماي تۇر. كوكپاردان چەمپيون اتانۋعا بارىمىزدى سالامىز. ەكى جىل بۇرىن تۇركيانىڭ يزنيك قالاسىندا وتكەن دۇنيەجۇزىلىك كوشپەلىلەر ويىندارىندا كوكپاردان قازاقستان ۇلتتىق قۇراماسى چەمپيون اتاندى. وزبەكستان كوكپارشىلارىن دا, موڭعوليا قۇراماسىن دا ءىرى ەسەپپەن ۇتىپ, فينالدا قىرعىز قارسىلاستارىن ەڭسەرىپ, ەلگە زور مەرەيمەن ورالعان ەدى. سول بيىكتەن تومەندەمەۋگە تىرىسامىز. ال كوكبورىدەن قىرعىزدان اسىپ تۇسۋگە الەۋەتىمىز تولىق جەتەدى دەپ كەسىپ ايتۋ قيىن. ونىڭ سەبەبىن جوعارىدا ايتتىم, ەڭ ءبىرىنشى اتتاردىڭ دايىندىعى جەتكىلىكتى ەمەس. 2016 جىلدان بەرى ەلىمىزدە كوكپاردان قازاندىققا تارتىس وتكەن ەمەس. سەگىز جىلدىڭ ىشىندە كوكپارشىلار دا قازاندىققا سالىم سالماعاندىقتان ۇمىتا باستاعان. جاپپاي كوكپارعا قاتىسىپ جۇرگەن بالۋانداردىڭ دەنى جاستار. بۇلار قازاندىققا تارتىپ ۇيرەنبەگەن. سوندىقتان كوكبورى دوداسىنا قاتىساتىن كومانداعا ەرتەدەن تارتىسقا ءتۇسىپ شىڭدالعان, تاجىريبەلى, ساقا كوكپارشىلاردى شاقىرىپ وتىرمىز. كوكپار دوداسىنا قاتىسقان كوكپارشى كوكبورى سايىسىنا قاتىسپايدى. ياعني 12 ادامنان جاساقتالعان كومانداعا اتتاردى تاۋىپ, ول تۇلپاردى كوكپارشى تىزگىندەپ ىرقىنا ۇيرەتكەنشە دە از ۋاقىت كەتپەيدى. جۋىردا كوكبورى ويىنىنا ارنايى قىرعىزستاننان ارعىماق ساتىپ اكەلدى. مۋرداش ەسىمدى جۇيرىكتى قۇراماداعى بىرنەشە شاباندوز الما-كەزەك ءمىنىپ ءجۇر, دوداعا دەيىن كىمنىڭ تاقىمىنا ىڭعايلى ەكەنىن بايقاپ كورەمىز. كوكبورى ويىنىنا ۇيرەنگەن بۇل اتتى قاي كوكپارشىنىڭ تىزگىندەيتىنىن قورىتىندى وقۋ-جاتتىعۋ جيىنى بارىسىندا ناقتىلايمىز», دەدى ا.مانكەەۆ.
بىلىكتى مامان تىم از ۋاقىت قالعاندا كوكبورى دۇنيەجۇزىلىك كوشپەلىلەر ويىندارىنىڭ باعدارلاماسىنا قوسىلعاندىقتان دا دايىندىقتىڭ كەمشىن سوعىپ تۇرعانىنا قىنجىلىس ءبىلدىردى. سول سەبەپتى دە كوكبورىدەن كوماندا قاتارىنا ەرتەرەكتە قازاندىققا كوكپار تارتقان, بۇگىندە جاسى قىرىقتى قۋالاپ, ەلۋدى ەڭسەرگەن ءوز قاتارلاستارىن دا شاقىرىپ, تىعىرىقتان شىعۋدىڭ قامىن جاساعانىن ايتتى. 2022 جىلى تۇركيادا وتكەن ەتنوسپورت الامانىندا كوكپاردان كوماندا كاپيتانى مىندەتىن اتقارىپ, جىگىتتەردى دوداعا باستاپ كىرگەن ۇلان بايتورەەۆتى دە باس باپكەر كومانداعا شاقىرتىپتى.
«تۇركيادا وتكەن ءىV دۇنيەجۇزىلىك كوشپەلىلەر ويىندارىندا كوماندا كاپيتانى بولعاندىقتان, زور جاۋاپكەرشىلىك جۇكتەلگەن ەدى. بۇل جولى دا ايانىپ قالمايمىز. استانا قالاسىنا ەرتە كەلىپ, الاڭعا بويىمىزدى ۇيرەتىپ, اتتارىمىز دا جەرسىندى. «قازانات» يپپودرومىنا كۇردەلى جوندەۋ جۇمىستارى جۇرگىزىلىپ, ادام تانىماستاي تۇلەپ, تۇرلەنىپ شىعا كەلىپتى. زاماناۋي ۇلگىدە جابدىقتالعان كەشەندە بارلىعى بار. كوكپار مەن كوكبورى ويىنى وتەتىن الاڭعا ارنايى قۇم سەبىلىپ, اتتاردىڭ تۇياعىنا دا جۇمساق, جايلى ەكەنى كوڭىلىمىزدى ءوسىردى. وسىنداي قولداۋدىڭ وتەۋىنە جەڭىس تارتۋ ەتۋ ءۇشىن بارىمىزدى سالامىز», دەدى ۇ.بايتورەەۆ.
مەيمانداردى كۇتۋگە ساقاداي ساي
دۇنيەجۇزىلىك كوشپەلىلەر ويىندارىنا دايىندىق اياسىندا ەلوردا اكىمدىگىندە كومپانيالارعا, قوناقۇيلەر مەن كاسىپكەرلەرگە ويىنعا قاتىسۋشىلار مەن قوناقتاردى قابىلداۋعا دايىن ەكەنىن راستايتىن سەرتيفيكاتتار سالتاناتتى تۇردە تابىستالدى.
قالالىق ءماسليحات توراعاسى ەرلان قاناليموۆ, V دۇنيەجۇزىلىك كوشپەلىلەر ويىندارىن دايىنداۋ جانە وتكىزۋ ديرەكتسياسىنىڭ باسشىسى نايل نۇروۆ, ينۆەستيتسيالار جانە كاسىپكەرلىكتى دامىتۋ باسقارماسىنىڭ باسشىسى حالەل اكىمجانوۆ ەتنوسپورت الامانىنا كەلەتىن مەيمانداردى قابىلدايتىن ۇجىمدارعا ساتتىلىك تىلەدى. سالتاناتتى ءىس-شارادا ە.قاناليموۆ قاتىسۋشىلارعا شەتەلدەن كەلگەن قوناقتارعا قىزمەت كورسەتۋدە دايارلىقتىڭ جوعارى دەڭگەيى مەن سەرۆيستىك قىزمەتتىڭ ساپاسى وتە ماڭىزدى ەكەنىن اتاپ ءوتتى.
جارىس بارىسىندا قالانىڭ قوناقۇيلەرى حالىقارالىق سپورتشىلار مەن ارتىستەردى قابىلدايدى, ال وتاندىق كومپانيالار ويىن ۇيىمداستىرۋشىلارىمەن بىرلەسىپ تۋريستەرگە ەلدىڭ مادەني مۇراسىن ايگىلەيتىن ونىمدەردى ۇسىنادى. سونداي-اق ىرىكتەۋدەن وتكەن قوعامدىق تاماقتاندىرۋ نىساندارى ويىنداردىڭ نەگىزگى الاڭدارىندا جانكۇيەرلەر مەن قاتىسۋشىلاردى ساپالى اسپەن قامتاماسىز ەتەدى. سەرتيفيكات 52 قوعامدىق تاماقتاندىرۋ كومپانياسىنا, كادەسىيلار ۇسىناتىن 20 كومپانيا, جارىسقا قاتىسۋشىلار توقتايتىن 22 قوناقۇي يەلەرىنە بەرىلدى.
ءدۇبىرلى دوداعا تارتۋ – تەگىن ينتەرنەت
ەلدەگى جەتەكشى ءموبيلدى وپەراتور سانالاتىن «Kcell» V دۇنيەجۇزىلىك كوشپەلىلەر ويىندارىنىڭ رەسمي بايلانىس سەرىكتەسى اتاندى. سايىس وتەتىن سپورت نىساندارىندا بايلانىس قۇرىلعىلارى مەن قوسىمشا بازالىق ستانسالارى ورناتىلىپ جاتىر.
«Kcell» كومپانياسىنىڭ تەحنيكالىق توبى «استانا-ارەنا» ستاديونى, «قازانات» اتشابارى, ج.ۇشكەمپىروۆ اتىنداعى جەكپە-جەك سارايى, «الاۋ» مۇزايدىنى سارايى, «Qazaqstan» جەڭىل اتلەتيكا كەشەنى, ۇلتتىق مۋزەي, «دۋمان» ويىن-ساۋىق كەشەنى اۋماعىنا قوسىمشا 4G جانە 5G بازالىق ستانسالارى مەن تەلەكومۋنيكاتسيالىق جابدىقتارىن ورناتادى. وسىلايشا, كومپانيا ۇجىمى شەتەلدىك قوناقتار مەن قاتىسۋشى سپورتشىلارعا ءوز ەلدەرىمەن ەش كەدەرگىسىز بەينەبايلانىسقا شىعىپ, الەۋمەتتىك جەلىلەرگە فوتو, ۆيدەو ماتەريالداردى جەدەل جۇكتەۋگە, تاراتۋعا, بارلىق تسيفرلىق سەرۆيستەردى ۇزدىكسىز پايدالانۋعا مۇمكىندىك تۋعىزباق.
ء«بىز ۇلتتىق بايلانىس وپەراتورى رەتىندە بۇل ويىنداردىڭ جاۋاپكەرشىلىگى جوعارى ەكەنىن تۇسىنەمىز. سوندىقتان وسى حالىقارالىق ءىس-شارانى جوعارى دەڭگەيدە ۇيىمداستىرۋعا ۇلەس قوسۋدى ازاماتتىق پارىز سانادىق. شەتەلدىك قوناقتار مەن سپورتشىلاردى ساپالى بايلانىسپەن قامتاماسىز ەتۋ – وتە ماڭىزدى مىندەت. سول ءۇشىن ءبىزدىڭ ماماندار جارىس وتەتىن سپورت نىساندارىندا ءتيىستى جۇمىستى اتقارىپ جاتىر. «Kcell» ەلىمىزدىڭ حالىقارالىق ارەناداعى مەرەيىن اسىرىپ, بەدەلىن كوتەرۋگە باعىتتالعان جوبالاردى قولداۋعا ءازىر. ەلدەگى ەڭ ءىرى بايلانىس وپەراتورى رەتىندە 2010 جىلى استانادا وتكەن ەقىۇ ءسامميتىنىڭ رەسمي سەرىكتەسى بولدى. 2011 جىلى قىسقى ازيادانىڭ دا رەسمي بايلانىس وپەراتورى اتاندى. ەندى دۇنيەجۇزىلىك كوشپەلىلەر ويىندارىنان دا تىس قالمادىق. بۇل ءىس-شارانى ەلىمىز جوعارى دەڭگەيدە وتكىزەتىنىنە سەنىمدىمىن», دەدى «Kcell» اق باسقارما توراعاسى اسقار جامباكين.
V دۇنيەجۇزىلىك كوشپەلىلەر ويىندارىن دايىنداۋ جانە وتكىزۋ جونىندەگى ديرەكتسيا باسشىسى نايل نۇروۆ ەتنوسپورت ويىندارىنىڭ رەسمي بايلانىس وپەراتورى اتانعان «Kcell» كومپانياسىمەن تىزە قوسىپ جۇمىس اتقارۋعا ارقاشان بەيىل ەكەنىن جەتكىزدى.
«دۇنيەجۇزىلىك كوشپەلىلەر ويىندارى اياسىندا «Kcell» كومپانياسىمەن ىنتىماقتاستىق ورناتۋ – قاتىسۋشىلاردى, سپورتشىلاردى, جاتتىقتىرۋشىلاردى, تورەشىلەردى, ەرىكتىلەر مەن ۇيىمداستىرۋشىلاردى ساپالى ۇيالى بايلانىسپەن جانە تەگىن ينتەرنەتپەن قامتاماسىز ەتۋگە باعىتتالعان ستراتەگيالىق ماڭىزدى قادام. ويىنداردى ءساتتى وتكىزۋگە جانە وسى اۋقىمدى ءىس-شارانىڭ بارلىق كەزەڭىندە بايلانىس ورناتۋعا ۇلەس قوسىپ, سەنىمدى كوممۋنيكاتسيالىق ينفراقۇرىلىم جاساۋعا اتسالىسقانى ءۇشىن «Kcell» كومپانياسىنا ريزاشىلىعىمىزدى بىلدىرەمىز», دەدى ن.نۇروۆ.
«Kcell» كومپانياسى دۇنيەجۇزىلىك كوشپەلىلەر ويىندارىنىڭ ينفراقۇرىلىمىنا بايلانىس جەلىلەرىن تارتىپ قانا قويماي, الامانعا قاتىساتىن ءار سپورتشىعا, ەرىكتىلەرگە, سونداي-اق ۇيىمداستىرۋ كوميتەتىنىڭ بارلىق مۇشەسىنە 5G ينتەرنەتى مەن بايلانىسى بار سيم-كارتالاردى تەگىن تاراتپاق. بۇعان قوسا كومپانيا سپورت كەشەندەرىندە Wi-Fi-سيگنالىن تاراتاتىن ارنايى 5G-روۋتەرلارىن ورناتىپ, كوپشىلىككە SمS حابارلامالار جولداپ, ءدۇبىرلى دودادان قۇلاعدار ەتۋدى جوسپارلاپ وتىر.
