فوتو: ۇلتتىق سپورت قاۋىمداستىعى
«Amanat» پارتياسىنىڭ حاتشىسى ەرجان جىلقىباەۆ حالىقارالىق « ۇلى دالا جورىعىنىڭ» اشىلۋ سالاتاناتىندا ءسوز الىپ, قر پارلامەنتى ءماجىلىسىنىڭ توراعاسى, «Amanat» پارتياسىنىڭ توراعاسى ەرلان قوشانوۆتىڭ قۇتتىقتاۋ حاتىن وقىپ بەردى.
« ۇلى دالا توسىندە وتەتىن كوشپەندىلەردىڭ ۇلان-اسىر مەرەكەسىنىڭ باسى – وسى « ۇلى دالا جورىعى» مارافون-بايگەسىنەن باستالادى», دەلىنگەن حاتتا.
بۇل جورىققا وڭتۇستىك افريكا, يران, تۇركيا, قىرعىزستان, قاراشاي-شەركەش, قاباردين-بالقار, تاتارستان, ماجارستان ەلىنەن كەلگەن كوماندالار قاتىسىپ جاتىر.
ەل نامىسىن ماڭعىستاۋ وبلىسىنىڭ قوس كومانداسى, جەتىسۋ وبلىسى, الماتى قالاسى, جامبىل, اقمولا, قوستاناي, شىعىس قازاقستان, اقتوبە وبلىسىنىڭ كوماندالارى قورعايدى.
تۇڭعىش رەت ءوتىپ جاتقان جورىققا ەلىمىزدەن قوس بىردەي قىزدار كومانداسى قاتىسىپ جاتىر. ءبىرى ماڭعىستاۋدان كەلگەن «سۋىن» كومانداسى بولسا, ەكىنشىسى اقمولا وبلىسىنىڭ «توميريس» كومانداسى. اقمولانىڭ ارۋلارى بۇعان دەيىن رەسپۋبليكالىق مارافون-بايگەگە قاتىسقان, تاجىريبە جيناعان.
حالىقارالىق « ۇلى دالا جورىعىن» ۇيىمداستىرۋشىلار بۇل جولى قازاقى تۇقىمدارعا ەرەكشە ءمان بەردى. سول سەبەپتەن اداي, نايمان, كوشىم, اۋليە اتا, قوستاناي, جەتىسۋ ارعىماعى تۇقىمدارى وسى جارىسقا قاتىسىپ جاتىر.
سالتاناتتى ءىس-شارادا ءسوز سويلەگەن ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ, بۇل جورىق وركەنيەتتىڭ تال بەسىگى بوتايدان باستالعانىنا ەرەكشە توقتالدى.
«سەبەبى بوتاي ەڭ العاش جىلقى قولعا ۇيرەتىلگەن جەر. سول سەبەپتى تاريحي مەكەننىڭ ماڭىزى وسىنداعى بارشا قاتىسۋشىعا قۇندى دەپ ەسەپتەيمىن», دەدى ول.
حالىقارالىق « ۇلى دالا جورىعى» مارافون-بايگەسى استانادا وتەتىن 5-ءشى دۇنيەجۇزىلىك كوشپەلىلەر ويىندارىنىڭ باستاۋى بولدى.
ەسكە سالا كەتەيىك, رەسپۋبليكالىق «JORYQ» ات سپورتى فەدەراتسياسى قازاقستان رەسپۋبليكاسى ۇلتتىق سپورت قاۋىمداستىعىنىڭ قۇرامىنا كىرەدى. قاۋىمداستىق قۇرامىندا بۇدان وزگە «كوكپار», «بايگە», «ساداق اتۋ», «تەڭگە ءىلۋ», «اۋدارىسپاق», «جامبى اتۋ», «قۇسبەگىلىك», «اسىق اتۋ» جانە ت.ب. فەدەراتسيالار بار. قر ۇلتتىق سپورت قاۋىمداستىعىن يسلامبەك سالجانوۆ باسقارادى.
اتاپ وتەيىك, 8-13 قىركۇيەكتە استانا قالاسىندا 5-ءشى دۇنيەجۇزىلىك كوشپەلىلەر ويىندارى وتەدى. ءىس-شاراعا 89 ەلدەن 2000-نان استام سپورتشى قاتىسادى دەپ جوسپارلانىپ وتىر. استانادا وتەتىن دۇنيەجۇزىلىك كوشپەلىلەر ويىندارىندا بارلىعى 21 سپورت تۇرىنەن 97 مەدال جيىنتىعى ساراپقا سالىنادى.
