فوتو: اشىق دەرەككوزدەن
تورتجىلدىق دوداسىنىڭ قورىتىندىسى ايتىلىپ, كەلەشەككە جوسپار ءتۇزىلىپ, جاۋاپتى ۇيىم باسشىلارىنا اۋقىمدى شارۋانىڭ جاۋاپكەرشىلىگى جۇكتەلدى. پاريج وليمپياداسىنداعى ناتيجە سارالانىپ, سپورت سالاسىنا اۋقىمدى رەفورما جۇرگىزۋ قاجەتتىگى تالقىلاندى.
ء«بىزدىڭ سپورتشىلار وليمپياداعا 25 سپورت تۇرىنەن قاتىستى. سونىڭ بەسەۋىنەن مەدال الدى (التىن – دزيۋدو, كۇمىس – بوكس, سپورتتىق گيمناستيكا, گرەك-ريم كۇرەسى, قولا – دزيۋدو, بوكس, نىسانا كوزدەۋ). جالپى, 87 مەملەكەت پاريجدە جۇلدەگە يە بولدى. قازاقستان كوماندالىق ەسەپتە 43-ورىنعا تۇراقتادى (1 التىن, 3 كۇمىس جانە 3 قولا مەدال). ەلدوس سمەتوۆ دزيۋدو كۇرەسىنەن قازاقستان بالۋاندارى اراسىنان العاش بولىپ وليمپيادا چەمپيونى اتاندى. ناريمان قۇربانوۆ تاريحي مەدال جەڭىپ الدى. ول – ەل تاريحىندا سپورتتىق گيمناستيكادان جۇلدە العان تۇڭعىش سپورتشى. نىسانا كوزدەۋدەن يسلام ساتپاەۆ پەن الەكساندرا لە قولا جۇلدە ەنشىلەدى. بۇل سپورت تۇرىنەن 1996 جىلعى اتلانتا (اقش) وليمپياداسىنان كەيىن العاش رەت مەدال الدىق», دەدى تۋريزم جانە سپورت ءمينيسترى ەرمەك مارجىقپاەۆ.
پاريج وليمپياداسىنان مەدال ولجالاعان ساڭلاقتارمەن كەزدەسۋدە پرەزيدەنت قاسىم-جومارت توقاەۆتىڭ قاشاندا سپورتقا جۇيەلى قولداۋ كورسەتىپ, جان-جاقتى دامىتۋعا مۇمكىندىك تۋعىزىپ وتىرعانىنا توقتالعان مينيستر مەملەكەت قامقورلىعىنىڭ قايتارىمى بولۋى كەرەك ەكەنىن باسا ايتتى.
«جەكەلەگەن سپورت تۇرلەرى بويىنشا ناتيجەنى جاقسارتۋ كەرەك. ءبىز ءۇشىن ءداستۇرلى سانالاتىن سپورت تۇرلەرى بار. سولاردان دايىندىق كوڭىل كونشىتپەي, ناتيجە ناشار بولىپ شىقتى. بىلتىر قىتايدىڭ حانچجوۋ قالاسىندا ازيا ويىندارى ءوتتى. ازياداعا قاتىسقان سپورتشىلاردىڭ 80 پايىزى بيىل پاريجگە باردى. ال حانچجوۋدا ۇلتتىق قۇرامانىڭ قانداي ناتيجە كورسەتكەنى بارىمىزگە بەلگىلى. تاريحتاعى ەڭ ءساتسىز ازيادا بولدى. سوعان قاراماستان از ۋاقىت قالسا دا, بارلىعىنا جاعداي جاسادىق. بىراق پاريجدەگى كورسەتكىش كوڭىلدەن شىققان جوق» دەگەن ە.مارجىقپاەۆ الامانعا اتتاناردا ايتىلعان ۋادەنىڭ ورىندالماعانىنا قىنجىلىس ءبىلدىردى.
مينيستر پاريجدەن جالقى جۇلدەمەن ورالعان بوكسشىلاردىڭ ناتيجەسىنە كوڭىلى سوقپايتىنىن, جۇيەلى جۇمىس جۇرگىزۋ ءۇشىن تۇبەگەيلى رەفورما قاجەتتىگىن ەسكەرتتى. جەڭىل اتلەتيكا بويىنشا دا ۋادە ورىندالعان جوق. 8 جولداما ەنشىلەگەن جەڭىل اتلەتتەر 1 كۇمىس مەدال ولجالايمىز دەپ سەندىرگەنىمەن, ەڭ ءتاۋىر كورسەتكىش 9-ورىن بولدى. 2000-2020 جىلدار ارالىعىنداعى جازعى وليمپيا ويىندارىنان مەدالمەن ورالعان جەڭىل اتلەتتەردىڭ دە جاتتىعۋ جۇيەسىنە اۋقىمدى وزگەرىس ەنگىزىپ, جۇكتەمەنى كۇشەيتۋ كەزەك كۇتتىرمەيتىن شارۋا ەكەنىن جەتكىزدى. ە.مارجىقپاەۆ مىندەتتەمەلەرگە سايكەس ەركىن كۇرەس كومانداسى قولا مەدال الۋعا ۋادە بەرگەنىن اتاپ ءوتتى. الايدا سپورتشىلار شيرەك فينالعا وتە الماي, ءبىرىنشى اينالىمنان شىعىپ قالدى. ءتىپتى ەڭ ءساتسىز دەگەن توكيو وليمپياداسىندا ەركىن كۇرەستەن قولا مەدال بۇيىرعان ەدى. بۇل جولى 4 بالۋانىمىزعا جولداما ءتيىپ, وليمپياداعا جولى تۇسكەنىمەن پاريج كىلەمى سپورتشىلاردىڭ دايىندىعى قانداي مەجەدە بولعانىن ايگىلەپ بەردى. «تاريحتا العاش رەت ايەلدەر كۇرەسىنەن سپورتشىلار ويىندارعا قاتىسقان جوق. بۇعان دەيىن بالۋان قىزدارىمىز جۇلدەمەن ورالىپ ەدى», دەدى مينيستر.
سالا باسشىسى ايماقتاردىڭ جاعدايىنا توقتالىپ, ۇلتتىق قۇراماعا 17 ءوڭىردىڭ سپورتشىلارى ەنگەنىن ايتتى. الماتى (17 ليتسەنزيا), استانا (14) جانە شىمكەنت (12) وكىلدەرى كوپ جولداما ەنشىلەگەن. ال قوستاناي, ۇلىتاۋ جانە ماڭعىستاۋ وبلىستارىنىڭ سپورتشىلارى بىردە-ءبىر ليتسەنزيا العان جوق. جۇلدەگە تەك جامبىل وبلىسى (التىن – ە.سمەتوۆ), الماتى قالاسى (كۇمىس – ن.قۇربانوۆ, 3 قولا: ع.قىرعىزباەۆ, ن.قىزايباي, ي. ساتپاەۆ جانە ا.لە), استانا قالاسى (كۇمىس – ن.ورالباي), الماتى وبلىسىنىڭ (كۇمىس – د.جادىراەۆ) ساڭلاقتارى قول جەتكىزدى. سپورتتىق تاريحى باي, تالاي ساڭلاقتى تۇلەتكەن قاراعاندى وبلىسىنىڭ سپورتشىلارى وسىمەن ەكىنشى وليمپيا ويىندارىنان مەدالسىز قايتىپ وتىر. مينيستر بۇعان دەيىن 2 التىن, 1 كۇمىس, 3 قولا مەدال ەنشىلەگەن ءوڭىردىڭ سپورتى ەڭسەسىن تىكتەي الماي تۇرعانىن سىنعا الدى. پاۆلودار وبلىسىندا دا جىلدان-جىلعا كورسەتكىش كۇرت تومەندەپ بارادى. 2016 جىلى وتكەن ريو وليمپياداسىنا بۇل وبلىستىڭ ۇزدىكتەرى 7 جولداما يەلەنسە, 2021 جىلى وتكەن توكيو دوداسىندا 4, ال بيىل پاريجگە تەك 1 سپورتشى عانا قاتىستى.
ە.مارجىقپاەۆ جەرگىلىكتى اتقارۋشى ورگاندار وليمپيادالىق سپورت تۇرلەرىنە باسىمدىق بەرىپ, سالانى دامىتۋ ساياساتىن قايتا قاراۋى قاجەت ەكەنىن ايتتى. «قازىردەن باستاپ مۇددەلى تاراپتارمەن بىرگە اقپاراتتىق-ءتۇسىندىرۋ جۇمىستارىن جۇرگىزۋ كەرەك. التى ايدان كەيىن حاربيندە ءىح قىسقى ازيا ويىندارى وتەدى. ميلان مەن كورتينا-دامپەتستسو قالالارىندا وتەتىن ححV قىسقى وليمپيادا دوداسىنا دا از ۋاقىت قالدى. ۇلتتىق قۇرامانىڭ دايىندىعىن كۇشەيتۋ قاجەت», دەدى مينيستر.
پاريج وليمپياداسىنىڭ قورىتىندىسىنا ارنالعان القا وتىرىسىندا ە.مارجىقپاەۆ قولعا العان شارالار الداعى ۋاقىتتا جەمىسىن بەرەتىنىنە سەنىم ءبىلدىردى. «سپورتتى ورىستەتىپ, سپورتشىلاردىڭ الاڭسىز دايىندىق جاساۋىنا مۇمكىندىك تۋعىزىپ, كەم-كەتىكتى بۇتىندەۋىمىز كەرەك. ءبىز جاڭا وليمپيادالىق تسيكلدى قازىردەن باستادىق. الدا لوس-اندجەلەس وليمپياداسى كۇتىپ تۇر. ماڭىزدى دوداعا قازىردەن دايىندالۋ كەرەك. مينيسترلىك, فەدەراتسيالار, باپكەرلەر, اكىمدىكتەر, ۇلتتىق وليمپيادا كوميتەتى پاريجدەگى جاعدايدان ساباق الىپ, ساپالى جۇمىس جۇرگىزۋى قاجەت. بۇل – بارىمىزگە ورتاق مىندەت», دەدى مينيستر.
