كاسىپكەرلەردى قولداۋ شارالارى سان قيلى. قارجىلاندىرۋ تەتىكتەرىنىڭ قاتارىندا سۋبسيديا, گرانت, جەڭىلدەتىلگەن نەسيە مەن سالىق جەڭىلدىكتەرى ەسكەرىلگەن. وسى مۇمكىندىكتەردى پايدالانا وتىرىپ, كاسىپ يەلەرى جاڭادان جابدىقتار ساتىپ الادى, ءوندىرىستى كەڭەيتەدى, قىزمەتكەرلەر بىلىكتىلىگىن ارتتىرىپ, بيزنەستىڭ دامۋى مەن وسۋىنە ىقپال ەتەتىن ءتۇرلى ماقساتقا مويىن بۇرادى.
«اتامەكەن» ۇكپ باسقارما توراعاسىنىڭ ورىنباسارى مۇرات ءامريننىڭ ايتۋىنشا, كەيىنگى جەتى ايدا شاعىن بيزنەس سالاسىندا 2 ملن 25 000 كومپانيا جۇمىس ىستەپ, الدىڭعى جىلدارمەن سالىستىرعاندا 10%-عا وسكەن.
«ال ورتا كاسىپكەرلىك سەگمەنتىندە شامامەن 3 000-عا جۋىق كومپانيا بار. ولاردىڭ ءوسۋ دەڭگەيى وتە تومەن, 0,5%-دى ارەڭ قۇرايدى. مەملەكەت باسشىسى ورتا بيزنەستىڭ تۇراقتى دامۋىنا قاتىستى ناقتى تاپسىرما بەردى. ءبىز شاعىن بيزنەستىڭ ورتا بيزنەسكە وتۋىنە, ال ورتا بيزنەس سانىنىڭ ودان ءارى ارتا تۇسۋىنە مۇددەلى بولۋىمىز كەرەك», دەيدى.
ساراپشىلار شاعىن بيزنەستىڭ ورتا بيزنەسكە اۋىسۋعا اسىقپايتىنىن, ال ورتا بيزنەستىڭ جاساندى تۇردە ۇساق فيرمالارعا بولشەكتەنۋ ءۇردىسى بار ەكەنىن ايتادى. ونىڭ توركىنىن ماماندار زاڭناماداعى تۇراقسىزدىق پەن سالىققا قاتىستى وزگەرىستەردەن ىزدەيدى.
«قازىر جاڭا سالىق كودەكسى ازىرلەنىپ جاتىر. مولشەرلەمەگە قاتىستى ناقتى ۇسىنىستار بار. ءماجىلىستىڭ جۇمىس توبى ىسكە كىرىسىپ, ورتا بيزنەستى قولجەتىمدى قۇرالدارمەن قارجىلاندىرۋ ماسەلەسى قاراستىرىلىپ جاتىر. بۇل قارجى شاعىن بيزنەس ءۇشىن دە قاجەت. قارجىلاندىرۋ تۋرالى ءسوز بولعاندا, البەتتە, مەملەكەتتىك باعدارلامالار العا تارتىلادى. تاياۋدا ۇكىمەت شاعىن جانە ورتا بيزنەستى قولداۋ باعىتىندا بيزنەستىڭ جول كارتاسى مەن قاراپايىم زاتتار ەكونوميكاسىن بىرىكتىرەتىن كەشەندى شارالار باعدارلاماسىن قابىلدادى. وندا نەسيەگە كەپىلدىك بەرۋ تەتىكتەرىنىڭ قولدانىلۋ اياسىن كەڭەيتۋ مەن مەملەكەتتىك شىعىنداردى وڭتايلاندىرۋ ماسەلەسى قاراستىرىلعان. بيزنەستى قولداۋعا قاتىستى مەملەكەتتىك باعدارلامالاردىڭ بۇگىندە قانشالىقتى ءتيىمدى بولىپ جاتقانىن باعالاۋ ءارى تالداۋ ماڭىزدى», دەيدى «اتامەكەن» وكىلى.
