وي دوداسىنا ازىرلىك
استانا قالاسىندا وتەتىن دۇنيەجۇزىلىك كوشپەلىلەر ويىندارىندا باق سىنايتىن ۇلتتىق قۇراما مۇشەلەرى قورىتىندى جاتتىعۋ جيىنىن وتكىزىپ جاتىر. نازارباەۆ ۋنيۆەرسيتەتىنىڭ سپورتتىق الاڭىندا توعىزقۇمالاق, وۆاري جانە مانگالادان ەلىمىزدىڭ ۇلتتىق قۇراماسى باق وكىلدەرىنە جاتتىعۋ بارىسىن تانىستىردى. ەتنوسپورت الامانىندا توعىزقۇمالاق پەن تۇرىكتىڭ مانگالا جانە افريكا ەلىنىڭ ۇلتتىق سايىسى سانالاتىن وۆاريدەن وي جارىستىراتىن ساڭلاقتار جۇلدەدەن ءۇمىتتى.
توعىزقۇمالاقتان ۇلتتىق قۇرامانىڭ باس باپكەرى اينۇر جاقىپباەۆا قورىتىندى جاتتىعۋ جيىنى جوسپارعا سايكەس ءوتىپ جاتقانىن ايتتى.
«دۇنيەجۇزىلىك كوشپەلىلەر ويىندارىندا توعىزقۇمالاقتان – 4, وۆاريدەن – 4, مانگالادان 4 سپورتشى سايىسقا تۇسەدى. ون جىلدان بەرى تۇراقتى ءوتىپ كەلە جاتقان دۇنيەجۇزىلىك كوشپەلىلەر ويىندارىنىڭ دەڭگەيى جوعارى. ەلىمىزدە تۇڭعىش رەت جالاۋى جەلبىرەيتىن ايتۋلى دودادا توپ جارۋعا بارىمىزدى سالامىز. 27 تامىزدان باستالعان قورىتىندى جاتتىعۋ جيىنى 7 قىركۇيەككە دەيىن جالعاسادى», دەدى ۇلتتىق قۇرامانىڭ باس باپكەرى.
ەتنوسپورت دوداسىندا توعىزقۇمالاق, مانگالا, وۆاريدەن سايىس استاناداعى «دۋمان» قوناقۇيىنىڭ ءماجىلىس زالىندا وتەدى. دۇنيەجۇزىلىك كوشپەلىلەر ويىندارىن دايىنداۋ جانە وتكىزۋ جونىندەگى ديرەكتسيا باسشىسىنىڭ ورىنباسارى مۇراتبەك قىپشاقباەۆ زياتكەرلىك ويىندارعا قاتىساتىن سپورتشىلارعا بارلىق جاعداي جاسالعانىن اتاپ ءوتتى.
«وسى ءۇش سپورت تۇرىنەن دوداعا قاتىساتىن دەلەگاتسيا مۇشەلەرى «دۋمان» قوناقۇيىنە ورنالاسادى. جاتىن ورنى مەن سايىس وتەتىن الاڭ دا – ءبىر جەردە. سپورتشىلار جول ءجۇرىپ ۋاقىتىن شىعىندامايدى», دەدى ول.
باتىس افريكا ەلدەرىنىڭ زياتكەرلىك دوداسى - ءوۆاريدى ەكى ادام وينايدى. ويىن تاقتاسىندا ەكى قاتاردا ورنالاسقان التى ويىق بولادى. 48 شارمەن وينالاتىن سايىستا ءوز تاقتاسىنداعى ويىققا شاردى كوپ جيناعان قاتىسۋشى جەڭىسكە جەتەدى. كوماندادا ەكى ەر, ەكى ايەل ويىنشى بولادى. ۇلتتىق قۇرامانىڭ باس باپكەرى اينۇر جاقىپباەۆا وۆاريدەن العاشقى ەل چەمپيوناتى ناۋرىز ايىندا قىزىلوردا قالاسىندا وتكەنىن, بىرىنشىلىكتىڭ جەڭىمپازدارى مەن جۇلدەگەرلەرى ۇلتتىق قۇراماعا الىنعانىن جەتكىزدى. زياتكەرلىك ويىندار سايىسىندا جانكۇيەرلەر توعىزقۇمالاقتان ەڭبەك سىڭگەن سپورت شەبەرلەرى سەرىك اقتاەۆ, اسەل داليەۆا, حالىقارالىق دارەجەدەگى سپورت شەبەرى اتاعىنا يە ەرنۇر مەرەشەۆ پەن اڭساعان قوجاناسىپتەن مەدال كۇتەدى. دۇنيەجۇزىلىك كوشپەلىلەر ويىندارىنا قاتىساتىن افريكا ەلدەرى مەن انتيگۋا-باربۋدا جانە قىرعىز رەسپۋبليكاسىنىڭ سپورتشىلارى دا وۆاري سايىسىنىڭ جۇلدەسىنەن دامەلى.
نازارباەۆ ۋنيۆەرسيتەتىنىڭ سپورتتىق الاڭىندا اسىق اتۋ, بەس اسىق جانە قىرعىزدىڭ ۇلتتىق ويىنى وردودان ەلىمىزدىڭ ۇلتتىق قۇراماسى دا باق وكىلدەرىنە ارنايى اشىق جاتتىعۋ وتكىزدى. ۇلتتىق سپورت اسىق اتۋ, بەس اسىق جانە قىرعىز ەلىنىڭ ۇلتتىق ويىنى سانالاتىن وردودان دۇنيەجۇزىلىك كوشپەلىلەر ويىندارىنا قورىتىندى جاتتىعۋ جيىنعا قاتىسۋشىلار ازىرلىكتى كۇشەيتكەن. ۇلتتىق قۇرامانىڭ باس باپكەرى جومارت سابىرجان ۇلى اسىق اتۋدان 4 جانە بەس اسىقتان 4 سپورتشى, قىرعىزدىڭ ۇلتتىق ويىنى وردودان 8 مەرگەن سايىساتىنىن ايتتى. 16 ساڭلاق تا – حالىقارالىق دودا كورىپ ىسىلعان تاجىريبەلى سپورتشىلار.
جومارت سابىرجان ۇلى بارلىق وبلىس پەن ءۇش مەگاپوليستە فەدەراتسيا جۇمىسى قارقىندى ءجۇرىپ, اسىق اتۋ ويىنى كەڭ قانات جايعانىن اتاپ ءوتتى.
«2023-2024 وقۋ جىلىنان باستاپ ورتا مەكتەپ وقۋشىلارى اراسىندا «التىن ساقا» رەسپۋبليكالىق وليمپياداسى ءوتىپ, ءبىر مەزەتتە 2 ميلليوننان اسا وقۋشى قولىنداعى ساقاسىن شيىرىپ, اسىق وينادى. قىرعىزدىڭ ءتول ويىنى وردودان التىن مەدال بۇيىرادى دەۋ قيىن, سەبەبى ولار ءتول سپورتىن ەجەلدەن ويناپ كەلە جاتىر. ال اسىق اتۋ مەن بەس اسىق سىنىنان بارىمىزدى سالامىز. 2022 جىلى ازيا چەمپيوناتىندا ءبىزدىڭ مەرگەندەر قىرعىز قارسىلاستارىنان باسىم تۇسكەن ەدى», دەدى باس باپكەر.
ەتنوسپورت دوداسىندا اسىق اتۋ, بەس اسىق جانە وردو سايىسى «الاۋ» مۇز سارايىندا وتەدى.
مەرەيتويلىق پوشتا ماركاسى
استانا قالاسىندا 8-13 قىركۇيەك ارالىعىندا وتەتىن V دۇنيەجۇزىلىك كوشپەلىلەر ويىندارى قارساڭىندا «قازاقستاننىڭ مادەنيەتى مەن سپورتى» اياسىندا مەرەيتويلىق پوشتا ماركاسى شىقتى. دۇنيەجۇزىلىك كوشپەلىلەر ويىندارىن دايىنداۋ جانە وتكىزۋ ديرەكتسياسىنىڭ باسشىسى نايل نۇروۆ پەن «قازپوشتا» اق باسقارما توراعاسى اسەل جاناسوۆا باق وكىلدەرىنە مەرەيتويلىق ماركانىڭ مورلەۋ شاراسىن وتكىزدى. نايل نۇروۆ يگى ءىستىڭ ماڭىزدىلىعىن اتاپ ءوتىپ, «دۇنيەجۇزىلىك كوشپەلىلەر ويىندارى – بۇل تەك سپورتتىق دودا عانا ەمەس, ءداستۇرىمىز بەن مادەني مۇرامىزدى دا ناسيحاتتايدى», دەدى.
اسەل جاناسوۆا ەتنوسپورت ويىندارى قارساڭىندا مەرەيتويلىق پوشتا ماركاسىن شىعارۋ ارقىلى دۇنيەجۇزىلىك دودانى ناسيحاتتاۋعا باسقارما ۇجىمى دا ىقىلاستى ەكەنىن ايتتى.
دۇنيەجۇزىلىك كوشپەلىلەر ويىندارىنا ارنالعان مەرەيتويلىق پوشتا ماركاسى بىرەگەي فيلاتەليالىق ونەر تۋىندىسى سانالادى. 5 000 دانا تارالىممەن شىققان ماركانىڭ نومينالدى قۇنى – 500 تەڭگە.
ۇلت مۇراسىنا ارنالعان كورمە
دۇنيەجۇزىلىك كوشپەلىلەر ويىندارىنىڭ باستالۋىنا دا ساناۋلى كۇن قالدى. ەلىمىزدە وتەتىن ايتۋلى دودا اياسىندا بىرنەشە ماڭىزدى ءىس-شارا دا جۇزەگە اسىرىلىپ جاتىر. ەتنوسپورت دوداسىنا وراي سىعاناق كوشەسى, 60/5 مەكەنجايىندا اشىلعان كورمە 17 قىركۇيەككە دەيىن ەلوردا تۇرعىندارى مەن قوناقتارىنىڭ نازارىنا ۇسىنىلادى. «كوشپەلىلەر رۋحى: شەكسىز كوكجيەك» اتتى فوتوسۋرەتتەر مەن ارت-جۇمىستار كورمەسىنىڭ اشىلۋ سالتاناتىنا قاتىسقان «Kazakh Tourism» ۇك» اق» باسقارما توراعاسى قايرات سادۋاقاسوۆ, ۇلىبريتانيا ەلشىسى كەتي ليچ, قاتار ەلشىسى ابدۋللا حۋسەين دجابەر, ءۇندىستان ەلشىسى ناگەندرا پراساد, كانادا ديپلوماتيالىق ميسسيا باسشىسىنىڭ ورىنباسارى دەۆيد ماككيننون, ومان ديپلوماتيالىق ميسسيا باسشىسىنىڭ ورىنباسارى تالال ءال ياكۋبي, قىرعىزستان ەلشىلىگىنىڭ ءۇشىنشى حاتشىسى ەرنيس ابديراشيتوۆ, سونداي-اق زيالى قاۋىم وكىلدەرى تۋىندىلارعا جوعارى باعا بەردى.
كوشپەلىلەر مادەنيەتىنىڭ الەمىنە تەرەڭدەي ۇڭىلۋگە جەتەلەيتىن كورمەگە كەلۋشىلەر ەلىمىزدىڭ تانىمال فوتوگرافتارى انزور گاساەۆ پەن الەكساندر كۋزنەتسوۆ, ۇلىبريتانيالىق شەبەر كوننور ماكنيل (TheFella), ماجارستاندىق رەجيسسەر كاراچون شاندوردىڭ ەرەكشە تۋىندىلارىن تاماشالاي الادى. بۇل سۋرەتشىلەر كوشپەلىلەر ءومىرىنىڭ اسەرلى ءھام قىزىقتى ساتتەرىن, سونداي-اق الەمنىڭ تۇكپىر-تۇكپىرىنەن الىنعان تاڭعاجايىپ پەيزاجداردى العاش رەت كورەرمەن نازارىنا ۇسىنىپ وتىر.
كورمە بىرنەشە تاقىرىپتى قامتىپ, كوشپەلىلەر ءومىرىنىڭ ءارتۇرلى قىرلارىن جانە ولاردىڭ تابيعاتپەن تەرەڭ بايلانىسىن ايگىلەيدى. كوشپەلىلەر الەمىنە كىرىسپە بولىمىندە قازاقستان تابيعاتى مەن حالىقتىڭ كۇندەلىكتى ومىرىنەن سىر شەرتەتىن تۋىندىلار قويىلعان.
كوشپەلىلەر رۋحى بولىمىنە توپتاستىرىلعان سىرلى سۋرەتتەر كوشپەلى حالىقتىڭ ءداستۇرىن, ءراسىمىن جانە تابيعاتپەن ۇندەستىگىن سيپاتتايدى.
كوكپارشىلارعا ساتتىلىك تىلەدى
استانا تورىندە وتەتىن V دۇنيەجۇزىلىك كوشپەلىلەر ويىندارىندا قالىڭ جانكۇيەر كوكپار مەن قىرعىزدىڭ كوكبورى وينىنان وتەتىن دودانى اسىعا كۇتەتىنى انىق. سەبەبى قازاق پەن قىرعىز اراسىنداعى كوكپار تارتىسى ەجەلدەن قىزىقتى ءھام قيقۋمەن وتەدى. اقىلباي مانكەەۆ باپتايتىن كوكپاردان ۇلتتىق قۇراما مۇشەلەرى دە قورىتىندى وقۋ-جاتتىعۋ جيىنىن استانا قالاسىندا وتكىزىپ جاتىر.
ءدۇبىرلى دودا قارساڭىندا كوكپار فەدەراتسياسىنىڭ پرەزيدەنتى باۋىرجان يساباەۆ, «ۇلتتىق جانە ات سپورتى تۇرلەرى ورتالىعىنىڭ» ديرەكتورى باقداۋلەت ءسابيتوۆ, جاپپاي كوكپار فەدەراتسياسىنىڭ پرەزيدەنتى عاني ءدىرمانوۆ, دۇنيەجۇزىلىك كوكپار فەدەراتسياسىنىڭ ۆيتسە-پرەزيدەنتى الىبەك مۇقاتاەۆ قۇراما كوماندا مۇشەلەرىمەن كەزدەسىپ, وقۋ-جاتتىعۋ بارىسىمەن تانىستى.
كوكپار فەدەراتسياسىنىڭ پرەزيدەنتى سپورتشىلارعا ساتتىلىك تىلەپ, ەل ابىرويىن حالىقارالىق ارەنادا قورعاۋدىڭ جاۋاپكەرشىلىگى زور ەكەنىن جەتكىزدى. فەدەراتسيانىڭ سپورتشىلارعا قولداۋ كورسەتۋ جانە كوكپار سپورتىن دامىتۋ باعىتىنداعى قولعا الىنعان ءىس-شارالارىنان حاباردار ەتتى.
تارتىسقا دايىندىق قىزۋ
دۇنيەجۇزىلىك كوشپەلىلەر ويىندارىندا ارقان تارتىستان دوداعا قوسىلاتىن ۇلتتىق قۇراما مۇشەلەرى قورىتىندى جاتتىعۋ جيىنىن وتكىزىپ جاتىر.
ششۋچينسك قالاسىنداعى وليمپيادالىق دايارلاۋ ورتالىعىندا ازىرلىكتى كۇشەيتكەن قۇراما مۇشەلەرى چەمپيون اتانۋدان ءۇمىتتى. ۇلتتىق قۇراماعا قابىلدانعان سپورتشىلار قاڭتار ايىندا وتكەن ەل بىرىنشىلىگىندە ىرىكتەلدى. ارقان تارتىس فەدەراتسياسىنىڭ ۆيتسە-پرەزيدەنتى نۇرلان جاباەۆ باستى قارسىلاس سانالاتىن كوماندالاردىڭ ازىرلىگىن زەرتتەپ, تىڭعىلىقتى ازىرلەنۋ قاجەتتىگىن ايتتى.
«ارقان تارتىستان انگليا, پاكىستان, قىرعىزستان قۇرامالارى تەگەۋرىندى. دەگەنمەن دە ءوز ەلىمىزدە وتەتىن ءدۇبىرلى دودادا قىزدارىمىز دا, جىگىتتەر دە ولجا سالاتىنىنا سەنەمىز», دەدى ن.جاباەۆ.
ارقان تارتىس فەدەراتسياسىنىڭ باس ديرەكتورى راسۋل تىلەنوۆ ۇلتتىق قۇراما مۇشەلەرى رەسەيدىڭ ەكاتەرينبۋرگ, تۇمەن قالالارىندا وتكەن حالىقارالىق تۋرنيرلەرگە قاتىسىپ, جەڭىسكە جەتكەنىن ايتتى. ارقان تارتىس كەنجە دامىعان سپورت ءتۇرى سانالادى. فەدەراتسيا بيىل جىل باسىندا عانا قۇرىلدى.
كورشىلەر دە وسال ەمەس
استانا قالاسىندا وتەتىن V دۇنيەجۇزىلىك كوشپەلىلەر ويىندارىنا كوكپار مەن كوكبورى وينىنا قاتىساتىن قىرعىزستاننىڭ ۇلتتىق قۇراماسى ىستىقكول جاعاسىندا وقۋ-جاتتىعۋ جيىنىن وتكىزىپ جاتىر. رەسەي ۇلتتىق قۇراماسىمەن بىرلەسكەن جيىندا جولداستىق كەزدەسۋ وتكىزىپ تە ۇلگەردى. قىرعىزستان ۇلتتىق قۇراماسىنىڭ كاپيتانى رۋستام تىناليەۆ جىگىتتەردىڭ ازىرلىگى جوعارى دەڭگەيدە ەكەنىن اتاپ ءوتتى.
«بۇعان دەيىن كوكپاردان دۇنيە-جۇزىلىك كوشپەلىلەر ويىندارىنا, الەم چەمپيوناتىنا, وزگە دە حالىقارالىق تۋرنيرلەرگە قاتىستىم. قازاقستاندا وتەتىن ەتنوسپورت الامانىنىڭ ماڭىزى زور. ءبىز كوكبورىدەن دە, شەڭبەرگە وينالاتىن كوكپاردان دا سايىسقا تۇسەمىز. كوكپار ويىنىنىڭ ايىرماشىلىعى – تەك شەڭبەردە عانا ەمەس, ۋاقىتى دا قىسقا: ەكى تايم عانا. ال كوكبورىنى ءبىز ءۇش تايم وينايمىز. اتتارىمىزدى دا بابىندا ۇستاپ, جىگىتتەر فيزيكالىق, تاكتيكالىق ازىرلىكتى پىسىقتاپ جاتىر. بابالارىمىزدان ميراس ۇلىق ونەردى قۇرمەتتەيتىن ءار قىرعىز ۇلانى ۋلاق (سەركە) تارتۋعا ىنتاسى ارتىپ, دوداعا كىرۋگە ۇمتىلادى. ءدۇيىم قىرعىز حالقى سەنىم ارتاتىن سايىستا جەڭىسكە جەتۋ ءۇشىن بارىمىزدى سالامىز», دەدى ر.تىناليەۆ.
ال دۇنيەجۇزىلىك كوشپەلىلەر ويىندارىنا تۇڭعىش رەت قاتىسۋعا مۇمكىندىك العان ۇلتتىق قۇراما مۇشەسى ومىربەك ەسەن ۇلى كومانداداعى تاجىريبەلى ويىنشىلاردان ءتالىم الىپ, ءدۇبىرلى الاماندا بارىن سالۋعا ۇمتىلاتىنىن ايتتى.
«دۇنيەجۇزىلىك كوشپەلىلەر ويىندارىنىڭ چەمپيونى اتانۋ – زور باقىت, وراسان مەرەي. بيىل بەسىنشى مارتە ۇيىمداستىرىلاتىن دودادا جەڭىسكە جەتسەك, سەنىم اقتالعانى», دەيدى كوكپارشى.
دۇنيەجۇزىلىك كوشپەلىلەر ويىندارىندا كوكپار مەن كوكبورى دوداسى «قازانات» يپپودرومىندا وتەدى.
