فوتو: اشىق دەرەككوزدەن
بۇعان دەيىن قىزمەت قىلعان سوقىرلار ۇيىنە ءوزى دە تاپ بولامىن-اۋ دەگەن ءوڭى تۇرماق, تۇسىنە دە ەنبەپتى. ويپىر-اي, شاپقىلاپ ءجۇرىپ زاعيپ جاندارعا قىزمەت قىلعانى كەشە عانا ەدى, ەندى, مىنە, ءوزىنىڭ بىرەۋگە كۇنى قاراپ, قاپالانىپ وتىرعان جايى بار.
زاعيپتار ۇيىنە جاڭادان تاپ بولعان بۇعان مۇنىڭ ورنىنا كەلگەن ازامات ءتيىستى كەرەك-جاراقتارىن اتاپ, تابىستاپ جاتىر.
– مىناۋ كيىم-كەشەكتەرىڭىز, ماتاسى مىقتى, مىسىر ەلىنىكى, – دەيدى.
ءوزى العان زات, مىسىردان ادىرەم قالسىن, كورشى قىتايدىڭ كور-جەرىن بىلەدى... ە, وزىنە دە وبال جوق, مۇمكىن وسىلاردىڭ كوز جاسى ۇردى ما ەكەن... الىنۋعا ءتيىس زاتتاردى ەڭ ارزاننان الىپ, ءىس-قاعازعا قىتايدىكىن – مىسىردىكى, قىرعىزدىكىن وڭتۇستىك كورەيدىكى دەپ... وسى سياقتى ەتىپ ساپىرىلىستىرىپ, ايىرما اقشادان ارانى اشىلىپ ارىنداپ-اق ەدى...
– ەتىگىڭىز يتاليانىكى, – دەيدى... يت ارقاسى يتاليادا نەسى بار: «وۋ, بۇل مىنا تۇرعان بىشكەكتىكى عوي, باعاسى سەن ايتىپ تۇرعانداي ەمەس!» دەپ تەپسىنگىسى بار... ءوزى العان زات, ءوز قولىن ءوزى كەسسىن بە؟
– ءان-اۋەن, حابار-وشار تىڭداۋعا قالاي ەدىڭىز, مىناۋ جاپوننىڭ ماگنيتوفونى, – دەپ قولىنا ۇستاتقان بولدى.
سيپاپ «كورىپ» الاقانى ارقىلى كورشى ەلدىڭ تانىس قوندىرعىسى ەكەنىن جازباي تانىدى.
...قايسىبىرىن ايتسىن, ول ءار بەرگەن زاتىنىڭ ماقتاۋىن مايىن تامىزا تابىستاپ-اق جاتىر. بۇل العان ءار زاتىنىڭ قيتۇرقى قىر-سىرى وزىنە ءمالىم بولعاندىقتان, امالسىز اۋىز بۋلى, قىجىلى ىشىندە, بارماق شايناعاننان باسقاعا دارمەن جوق...
اسىرەسە كۇنى-ءتۇنى قاسىندا, اشسا الاقانىندا بولاتىن تاياعىن: «ارنايى امەريكادان الدىرتتىق» دەگەنىنە دە كۇيىپ كەتتى. ەندى قايتسىن, ءىس-قاعازدى ءوزى تولتىرعان, ونداعى ءار تاياقتان تۇسكەن ون مىڭ تەڭگە ەسىندە عوي. ءبارىن ايت تا, ءبىرىن ايت, سوراقىسى – وسىنداي حالگە دۋشار بولاردا وپەراتسيا جاسايتىن قۇرال كورشى ەلدىڭ كور-جەرى ەكەنىن بىلە تۇرا, ونى اناۋ الىستاعى الپاۋىت ەلدەگى اپپارات قۇنىمەن باعالانىپ العاندارى جانىنا باتادى... جاڭا جىل جىلت ەتكەندە قىتايدىڭ جارىق بەرىپ جالت ەتكىش جارىلعىش زاتىن وسىنداعى ورتادا وتىرىپ جاعىپ كورىپ, جالىنعا ورانىپ, ءورتى ءسوندىرىلىپ, تىكە ۇشقان ۇشقىن جانارىن شارپىپ... ىلە-شالا «شالا ساۋاتتى» كورشىنىڭ اپپاراتىندا وپەراتسيا جاسالىنىپ... بولاتىندى بولدىرماي, بوزداتىپ ءوتتى ەمەس پە؟ بۇيتكەن اپپاراتىنا بولايىن, ونى العانداعى ايىرماعا مىنگەن جەڭىل كولىگىنىڭ ەنەسىن ۇرايىن...
...بۇعان زاتتارىن تابىستاپ وتىرعان دا بەكەر ەمەس, كور-جەردى بىلەتىن «كوسەم» بولۋى كەرەك, وڭاشا وتىرعاندى پايدالانىپ, بۇنى ءوزىمسىنىپ جارتىلىقتىڭ تىعىنىن اشىپ قىرلى ۇرەمكەگە قۇيىپ, الىپ قويالىق دەگەنىندە:
– ماعان نەعىپ از قۇيدىڭ؟ – دەپ ەدى, اناۋ بارلاي قاراپ: – قالاي ءبىلدىڭىز؟ – دەپ تاڭىرقاعاندا:
– مەنىكىنە قۇيىلعاندا «قۇلق-قۇلق» ءۇش رەت, سەنىكىنە بەس رەت بولدى! – دەپ, بۇل مۇنداعى العاشقى بىلگىشتىگىن بايقاتتى...
بەرىك سادىر
