فوتو: دەنساۋلىق ساقتاۋ مينيسترلىگى
ديانا بورودينو اۋىلىنان التايداعى اۋدانارالىق اۋرۋحاناعا جەدەل جاردەم كولىگىمەن جەتكىزىلىپ, بىردەن رەانيماتولوگتار, تراۆموتولوگتار جانە گينەكولوگتاردىڭ قامقورلىعىنا الىندى. ناۋقاستىڭ باسىن, موينىن, كەۋدەسىن, اياق-قولدارىن ءبىرىنشى, ەكىنشى جانە ءۇشىنشى دارەجەدەگى كۇيىك شالعانى انىقتالدى.
دارىگەرلەر ناۋقاستىڭ جاعدايىن اۋىر دەپ باعالادى. وبلىستىق ورتالىق ماماندارىنىڭ كونسيليۋمىنان كەيىن تىكۇشاق جىبەرتۋگە شەشىم قابىلداندى. اۋدانعا قۇرامىندا وبلىستىڭ باس رەانيماتولوگى گالينا سەمەنوۆا, فەلدشەر نازىم بەيسەنباەۆا بار بريگادا ۇشىپ جەتتى. زارداپ شەككەن ايەل شىعىس قازاقستان وبلىستىق مامانداندىرىلعان مەديتسينا ورتالىعىنا جەتكىزىلدى.
ء«بىزدىڭ دارىگەرلەر – الەمدەگى ەڭ ۇزدىك ماماندار. ولار قىزىم ەكەۋمىزدى امان الىپ قالۋ ءۇشىن مۇمكىن ەمەستى جاسادى. الدا ءالى ۇزاق رەابيليتاتسيا كۇتىپ تۇر, بىراق ەڭ قورقىنىشتىسى ارتتا قالدى. دارىگەرلەردىڭ ارقاسىندا ءومىرىمنىڭ ءمانى بار جانە سول ءۇشىن دە ەمىمدى جالعاستىرامىن», دەپ قۋانىشتىڭ كوز جاسىن توگە وتىرىپ جاس انا العىس ايتتى.
ديانا مەن ونىڭ بالاسىنىڭ ءومىرى ءۇشىن وڭىرلىك جانە رەسپۋبليكالىق دارىگەرلەردىڭ مۋلتيتارتىپتىك بريگاداسى كۇرەستى. بولىمشەدەگى دارىگەر-رەانيماتولوگ-انەستەزيولوگ الەكساندر نارەيكو مەن ونىڭ ارىپتەستەرى ناۋقاستىڭ ءومىرىن ساقتاپ قالۋ ءۇشىن بار كۇشىن سالدى. دەنساۋلىق ساقتاۋ مينيسترلىگىنىڭ ماماندارى دا مەديتسينالىق كومەك كورسەتۋ ۇدەرىسىن ۇيلەستىرىپ وتىردى.
ديانا ينتەنسيۆتى تەراپياعا شىداپ, ەرلىك تانىتتى, تەرىنى اۋىستىرىپ سالۋ بويىنشا بىرنەشە وتادان ءوتتى. جاراسىن وممو تراۆموتولوگيا بولىمشەسىنىڭ مەڭگەرۋشىسى رافاەل گافۋروۆتىڭ جەكە ءوزى تاڭدى. بالا مەن انانىڭ جاعدايىن وبلىستىڭ شتاتتان تىس باس گينەكولوگى مارات كوكسەگەنوۆ تۇراقتى قاداعالاپ وتىردى.
ديانا — سوڭعى ەكى ايدا شقو-دا ءومىرىن ساقتاپ قالۋ مۇمكىن بولعان ءۇشىنشى انا.
جاقىندا دارىگەرلەر اۋىر سەپتيكالىق پنەۆمونياعا شالدىققان, وكپەسىنىڭ 80 پايىزى زاقىمدالعان 18 جاستاعى ناۋقاستىڭ ءومىرىن العاش رەت ەكمو ءادىسىن قولدانا وتىرىپ امان ساقتاپ قالدى. قىزدىڭ جاعدايى جاقسارىپ, ينفەكتسيالىق بولىمشەگە اۋىستىرىلدى. سونىمەن قاتار اۋىر ينتوكسيكاتسيا جانە كوپ اعزالىق جەتكىلىكسىزدىكپەن تۇسكەن سامار اۋدانىنىڭ 44 جاستاعى تۇرعىنى دا قۇتقارىلدى. 20 كۇن ەم العاننان كەيىن ونىڭ جاعدايى تۇراقتالىپ, ول دا تەراپيا بولىمشەسىنە اۋىستىرىلدى.
وڭىرگە جۇمىس ساپارى بارىسىندا دەنساۋلىق ساقتاۋ ءمينيسترى قيىن جاعدايداعى انالار مەن بالالار ءومىرىن ساقتاپ قالعان باتىر دارىگەرلەرگە سالالىق ماراپاتتار تابىستادى.
ماراپاتتالعانداردىڭ اراسىندا يتراب مەڭگەرۋشىسى, 20 جىلدىق تاجىريبەسى بار جوعارى ساناتتى دارىگەر-رەانيماتولوگ گاۋحار مۋرزاعاليەۆا, 30 جىلدىق تاجىريبەسى بار 1 ساناتتى دارىگەر-رەانيماتولوگ ەلەنا دميتريەۆا جانە 41 جىلدىق جۇمىس تاجىريبەسى بار جوعارى ساناتتى دارىگەر-انەستەزيولوگ الەكساندر نارەيكو بار.
شقو-دا انا ءولىمىنىڭ الدىن الۋ جاعدايىنىڭ ناتيجەلەرى بويىنشا جوعارى ساناتتى دارىگەر-كارديوحيرۋرگ, مەديتسينا عىلىمدارىنىڭ كانديداتى, كارديوحيرۋرگيا بولىمشەسىنىڭ مەڭگەرۋشىسى ەدىل بوتاباەۆ, انا مەن بالا ورتالىعىنى دارىگەرلەرى – وبلىستىڭ باس اكۋشەر-گينەكولوگى مارات كوكسەگەنوۆ جانە اكۋشەر-گينەكولوگ ليزا قاسىمحانوۆا دا ماراپاتقا ۇسىنىلدى.
