ءوڭىردىڭ دەموگرافيالىق وسىمىنە ءوز ۇلەسىن قوسقان, دۇنيەگە ۇشەم اكەلگەن روزا ارىپباەۆانى ارنايى قۇتتىقتاپ بارعان وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆتىڭ ايتۋىنشا, 2024 جىلدىڭ ءبىرىنشى جارتىجىلدىعىندا 25 045 نارەستە دۇنيەگە كەلگەن. ال اتالعان پەريناتالدىق ورتالىقتا جىل سايىن شامامەن 9,5 مىڭعا جۋىق ايەل بوسانادى.
«دەنى ساۋ ۇلت» ءار ازامات ءۇشىن ساپالى ءارى قولجەتىمدى دەنساۋلىق ساقتاۋ» ۇلتتىق جوباسى اياسىندا پەريناتالدىق ورتالىق جاڭا تۋعان نارەستەلەرگە زاماناۋي رەانيماتسيالىق كومەك كورسەتەدى. بۇل ءۇشىن بارلىق قاجەتتى جابدىق بار. سونداي-اق وڭىردە العاشقىلاردىڭ ءبىرى بولىپ مەديتسينالىق گەنەتيكا بولىمشەسى ىسكە قوسىلعان. بۇرىن شىمكەنت پەن تۇركىستان وبلىسى بولىنبەي تۇرىپ, قالا تۇرعىندارى دا №1 وبلىستىق پەريناتالدىق ورتالىعىنا كەلىپ گەنەتيكالىق تەست تاپسىراتىن. سودان بەرى ارادا 6 جىل وتسە دە, وبلىس تۇرعىندارى گەنەتيكالىق تەستى وسىندا تاپسىرادى. سەبەبى وبلىستا مۇنداي گەنەتيكالىق ورتالىق بىرەۋ-اق. نەگىزى جوسپار بويىنشا وسىنداي ورتالىقتىڭ وبلىس بويىنشا تاعى ۇشەۋىن اشۋ كەرەك. شىمكەنتتىڭ ءوز پەريناتالدىق ورتالىعى بار, سوندىقتان قالا تۇرعىندارى سوندا بارىپ وتكىزەدى. حالىق سانىنا بايلانىستى رەسپۋبليكا بويىنشا حالىققا كومەك كورسەتۋ ساتىسىندا الدىڭعى قاتاردا تۇرعان №1 وبلىستىق پەريناتالدىق ورتالىق 2022 جىلى ەڭ ۇزدىك بوساندىرۋ ۇيىمى رەتىندە «التىن شيپاگەر» مەديتسينالىق جۇلدەسىنە يە بولعان. ورتالىق باسشىسى سالتانات جاباعيەۆانىڭ ايتۋىنشا, دارىگەرلەر كۋراتورلىق كومەك كورسەتۋ جانە ءبىلىمدى مونيتورينگىلەۋ ماقساتىندا وبلىس اۋداندارىنا بارىپ, جۇمىس جۇرگىزەدى. ياعني بىلىكتى دارىگەرلەر ءوز جاۋاپكەرشىلىگىنە پەريناتالدىق ورتالىقتاعى جۇمىسىنان بولەك, وزدەرىنە جۇكتەلگەن اۋداندارداعى پەرزەنتحانالاردىڭ جاعدايىن دا باقىلاپ, اي سايىن بارىپ كومەك قولىن سوزىپ وتىرادى.
«كەيدە ايىنا 1-2 رەت, كەيدە 10 رەت ساناۆياتسياعا شىعۋعا تۋرا كەلەتىن جاعدايلار بولادى. ول جاققا تولىق بريگادا بولىپ بارادى. حيرۋرگتىڭ كومەگى قاجەت بولسا, ونى دا قوسىپ جىبەرەمىز. سوسىن قاجەت بولسا, ماماندارىمىز سول جەردە وپەراتسيا جاسايدى, بوساندىرادى, ەمىنە كوررەكتسيا جاساپ كومەك كورسەتەدى. ايەلدى ستابيليزاتسيالىق جاعدايعا كەلگەنىنشە سول جەردە باقىلاۋعا الامىز. ياعني كەيدە دارىگەرلەرىمىز سول اۋداندارداعى پەرزەنتحانالاردا ەكى-ءۇش تاۋلىكتەپ ءجۇرىپ قالۋى عاجاپ ەمەس», دەيدى سالتانات وسەتىللاقىزى.
سونداي-اق پەريناتالدىق ورتالىقتا رەانيماتسياعا كوپ كوڭىل بولىنەدى. سەبەبى بالالاردىڭ ءولىم جاعدايىنا جول بەرىلمەۋى كەرەك.
«سالماعى جەتپەي تۋعان نارەستەلەر كەمىندە 2,5 كيلو سالماق جينامايىنشا ۇيىنە شىعارمايمىز. نارەستە ءوز ەركىمەن ەمە الاتىن جاعدايدا بولۋعا ءتيىس. كەي شارانالاردىڭ پاتولوگياسى بولادى. سونداي كۇردەلى جاعدايداعىلاردى بالالار اۋرۋحاناسىنا اۋىستىرامىز. ال بالالار اۋرۋحاناسى سالماعى 2,5 كيلوعا جەتپەگەن بالالاردى قابىلدامايدى. ياعني تۋا بىتكەن اقاۋىمەن ءومىر ەسىگىن اشقان شارانا ءوسىپ, وپەراتسيالاردى كوتەرە الاتىنداي جاعدايعا جەتكەنشە ءبىزدىڭ قامقورلىعىمىزدا بولادى», دەيدى دارىگەرلەر.
پرەزيدەنتتىڭ تاپسىرماسىمەن ەلىمىزدە «اڭساعان ءسابي» الەۋمەتتىك باعدارلاماسى 2021 جىلدان ىسكە اسىرىلىپ كەلە جاتقانى ءمالىم. بۇرىندارى ەكستراكورپورالدى ۇرىقتاندىرۋ (ەكۇ) قىزمەتىنە تەك الماتى, استاناعا باراتىن تۇركىستان وبلىسى مەن شىمكەنت قالاسى تۇرعىندارىنا بۇل قىزمەت ءتۇرى بۇگىندە قولجەتىمدى. ءۇشىنشى مەگاپوليستە ءبىر ەمەس, بىرنەشە كلينيكا بار. ال №1 وبلىستىق پەريناتالدىق ورتالىعى ايەلدەردى تولىق تەكسەرۋدەن وتكىزىپ, ەكۇ قىزمەتىن جاسايتىن كلينيكالارعا جولداما بەرىپ وتىرادى. بۇل جەردىڭ ءتيىمدى تۇسى – بالا اڭساپ جۇرگەن ايەلدەر شىعىندالمايدى. بارلىعى مەملەكەت ەسەبىنەن تولەنەدى. ياعني ايەلدەر پورتال ارقىلى كەلىپ, تەگىن ەكۇ قىزمەتىنە جۇگىنە الادى. ورتالىققا 2021 جىلعا دەيىن جىلىنا 70-اق كۆوتا ءبولىنىپ وتىرعان بولسا, بۇل كورسەتكىش كەيىن 666-عا جەتكەن. 2022 جىلى 550 ەكۇ جاسالعان. سول 550 ايەلدىڭ 261-ءى جۇكتى بولعان. بۇل جاساندى جولمەن ۇرىقتاندىرۋدىڭ ءساتتى شىققان ناتيجەسىنىڭ 48 پايىزىن قۇرايدى. ەڭ عاجابى 261 ءساتتى جۇكتىلىكتەن 42 ەگىز جانە ءبىر ۇشەم انىقتالعان.
تۇركىستان وبلىسى
