اۋدارىسپاقتان ۇلتتىق قۇرامانىڭ باس باپكەرى جانباتىر بەكمۇرساەۆ شاكىرتتەرىنىڭ دايىندىعى قالاي ەكەنىن ايتىپ بەردى.
«دۇنيەجۇزىلىك كوشپەلىلەر ويىندارىنا دايىندىقتى ەكى رەت وتكىزدىك. ۇلتتىق قۇراماعا قابىلدانعان بالۋاندار جوسپارلى جاتتىعۋدى وتكىزىپ, فيزيكالىق, تاكتيكالىق تۇرعىدان كەمشىن تۇسىن بۇتىندەپ جاتىر. جىگىتتەردىڭ مىنگەن اتتارى دا ۇيرەنىسىپ كەلەدى. ءبىزدىڭ ماقسات – ەلىمىزدە وتەتىن الاماندا توپ جارۋ. وسى مەجەدەن كورىنۋگە بىلەك ءتۇرىنىپ ازىرلەنىپ جاتىرمىز», دەدى باس باپكەر.
ۇلتتىق قۇرامانىڭ مۇشەسى, اۋدارىسپاقتان ەكى دۇركىن الەم چەمپيونى دارىن وتكەلباي ءوزى تۇڭعىش قاتىساتىن دۇنيەجۇزىلىك كوشپەلىلەر ويىندارىندا جەڭىسكە جەتۋگە بارىن سالاتىنىن ايتتى.
«اۋدارىسپاق ويىنىنا بالا كۇنىمنەن قىزىعۋشىلىعىم ارتتى. ەرلەردىڭ ات ۇستىندەگى قايرات-كۇشى سىنالاتىن سايىستا ايانىپ قالمايمىز. ءوزىم 80 كگ سالماقتا دوداعا تۇسەمىن. نەگىزگى قارسىلاس قىرعىزستان, وزبەكستان, موڭعوليا جانە رەسەيدەن كەلەتىن سپورتشىلار بولماق. دەگەنمەن ءوز ەلىمىزدە وتەتىن الاماندا توپ جارۋ – ءبارىنىڭ ارمانى. مەن دە چەمپيون اتانۋعا بارىمدى سالامىن», دەدى د.وتكەلباي.
