فوتو: جوعارعى سوت
فورۋمعا قاتىسۋشىلارعا جىلى لەبىزىن بىلدىرە كەلە, ول ەل تاريحىنداعى جاڭا ءداۋىردى بەلگىلەگەن 2022 جىلعى كونستيتۋتسيالىق رەفورمانىڭ ماڭىزدىلىعىن, مەملەكەتتىك ساياساتتىڭ نەگىزى رەتىندە ادىلەتتى قازاقستاندى قالىپتاستىرۋ يدەياسىن جانە كونستيتۋتسيالىق دامۋ ەۆوليۋتسياسىن مەملەكەتتىڭ ەڭ جوعارى قۇندىلىعى – ادام مەن ازاماتقا جانە ونىڭ قۇقىقتارىن قورعاۋعا باعىتتالعان ۆەكتور ەكەنىن اتاپ ءوتتى.
ا.مەرعاليەۆ كونستيتۋتسيالىق سوتتىڭ ءوز شەشىمدەرىندە ۇلتتىق كونستيتۋتسيالىق بىرەگەيلىكتى قۇرايتىن قۇقىق, ادىلەتتىلىك جانە گۋمانيزم يدەيالارىن بەينەلەيتىن ادام قۇقىقتارى مەن نەگىزگى بوستاندىقتارىن قورعاۋ جونىندەگى جوعارى ميسسيانى ورىندايتىندىعىنا توقتالدى.
جوعارعى سوت توراعاسى مەملەكەت باسشىسىنىڭ ءبىزدىڭ ەلىمىزدىڭ پروگرەسسيۆتى ىلگەرىلەۋىنىڭ ىرگەتاسى بولۋعا ءتيىس, ءومىردىڭ بارلىق سالالارىندا زاڭ ۇستەمدىگى قاعيداتىن ساقتاۋ تۋرالى ءسوزىن ەسكە سالدى.
وسى ورايدا سوت جۇيەسىنىڭ تيىمدىلىگىن ارتتىرۋ ماقساتىندا ونى ودان ءارى جاڭعىرتۋ شارالارى قولعا الىنعانى ايتىلدى.
كونستيتۋتسيالىق سوتتىڭ جولداۋلارى مەن نورماتيۆتىك قاۋلىلارىن ىسكە اسىرۋعا باعىتتالعان ماڭىزدى جاڭاشىلدىقتار بلوگى تۋرالى ءسوز بولدى. ولار كاسساتسيالىق قاداعالاۋ سالاسىنداعى زاڭنامانى جەتىلدىرۋ, تارتىپتىك جاۋاپكەرشىلىك پەن سۋديالاردىڭ كاسىبي قىزمەتىن باعالاۋ, سوتقا جۇگىنگەن كەزدە مەملەكەتتىك باج تولەۋ جانە ت.ب.
«جۇرگىزىلىپ جاتقان رەفورمالار ازاماتتاردىڭ قۇقىقتارىن قورعاۋدىڭ ساپاسى مەن دەڭگەيىن ارتتىرۋعا, سوت تورەلىگىنە قولجەتىمدىلىكتى كەڭەيتۋگە, سۋديالاردىڭ تاۋەلسىزدىگىن قامتاماسىز ەتۋگە جانە جاۋاپكەرشىلىگىن كۇشەيتۋگە باعىتتالعان», دەدى ا.مەرعاليەۆ.
فورۋمنىڭ ديالوگ الاڭى 30-دان استام ەلدىڭ, سونىڭ ىشىندە ەۋروپا, ازيا جانە افريكا ەلدەرىنەن كونستيتۋتسيالىق سوتتاردىڭ سۋديالارىن, ادام قۇقىقتارى جونىندەگى ۋاكىل مەن ادام قۇقىقتارى جونىندەگى ينستيتۋتتاردىڭ وكىلدەرىن بىرىكتىردى.
ءىس-شاراعا قازاقستان رەسپۋبليكاسى پرەزيدەنتى اكىمشىلىگىنىڭ, مەملەكەتتىك ورگانداردىڭ باسشىلىعى, پارلامەنت دەپۋتاتتارى, باس پروكۋرور, ادام قۇقىقتارى جونىندەگى ۋاكىل, كاسىبي زاڭ جانە عىلىمي قاۋىمداستىقتاردىڭ, حالىقارالىق ۇيىمداردىڭ وكىلدەرى قاتىستى.
