نيك ۋيللەرتتى امەريكالىقتار بەساسپاپ بالۋان رەتىندە تانيدى. ول مما سپورتى, شاڭعى, سەرفينگپەن دە شۇعىلدانىپ, كوكپار تارتۋدى دا شەبەر مەڭگەرگەن. دۇنيەجۇزىلىك كوشپەلىلەر ويىندارىندا امەريكالىق بالۋان اۋدارىسپاقتان دا قارىمىن سىناۋعا بىلەك ءتۇرىپ وتىر.
«2018 جىلى اقش قۇراماسىنىڭ ساپىندا كوكبورى سپورتىنان جانە اۋدارىسپاقتان دۇنيەجۇزىلىك كوشپەلىلەر ويىندارىنا قاتىستىم. بيىل دا كوكپاردان ءھام اۋدارىسپاقتان باسەكەگە تۇسەتىنىمدى زور ماقتانىش سانايمىن. قازاقستانعا بارسام دەگەن ارمانىم اقيقاتقا اينالماق. كوپتەن بەرى كورىكتى مەكەنگە ساپارلاپ, ساياحاتتاۋدى جوسپارلاپ ءجۇر ەدىم. كوكپار سپورتىن ۇلتتىق ويىنى سانايتىن, كەڭىنەن ناسيحاتتاپ دامىتقان ەلدەر اقش بالۋاندارىن وسال ساناۋى مۇمكىن. بىراق ءبىز دە بارىمىزدى سالىپ, كوكپار تارتۋدى قانشالىقتى شەبەر مەڭگەرگەنىمىزدى كورسەتەمىز», دەدى نيك ۋيللەرت.
امەريكالىق بالۋاندى جانكۇيەرلەر جەتە تانيدى. سەبەبى ول 2018 جىلدان بەرى دۇنيەجۇزىلىك كوشپەلىلەر ويىندارىنا كوكپار مەن اۋدارىسپاقتان تۇراقتى قاتىسىپ ءجۇر.
