فوتو: kaz.caravan.kz
مينيسترلىك سۋ تاسقىنىن تالداۋ, بولجاۋ جانە مودەلدەۋدىڭ تسيفرلىق شەشىمدەرىن بەيىمدەۋ بويىنشا گەرمانيا (TALSIM) مەن نيدەرلاندىنىڭ (FEWS) جۇيەلەرىن تاڭداپ الدى.
«سۋ تاسقىنىن بولجاۋدىڭ تيىمدىلىگى مەن دالدىگىن ارتتىرۋ ءۇشىن اتالعان ادىستەردى بىرىڭعاي جۇيەگە بىرىكتىرۋ جوسپارلانعان. اتالعان جۇيە گيدرولوگيالىق جانە بۇلت, ىلعالدىلىق, جاۋىن-شاشىن سەكىلدى اۋا رايى دەرەكتەرىنىڭ نەگىزىندە ساراپتاما جاسايدى. قازىرگى ۋاقىتتا جۇيەگە ەسىل وزەنى باسسەينىنىڭ دەرەكتەرى ەنگىزىلىپ جاتىر», دەلىنگەن مينيسترلىك حابارلاماسىندا.
ايتا كەتۋ كەرەك, الداعى ۋاقىتتا ەلىمىزگە نيدەرلاندىدان جۇيەنى ازىرلەۋشى ماماندار كەلمەك. ولار ەلدەگى ماماندارمەن بىرگە ءوڭىردىڭ ەرەكشەلىگى مەن سۇرانىسىن ەسكەرە وتىرىپ, جۇيەنى جەرگىلىكتى جاعدايعا بەيىمدەۋ مۇمكىندىكتەرىن پىسىقتايتىن بولادى.
