قازاقستان سپورتشىلارى 1991 جىلدان بەرى قىسقى جانە جازعى وليمپيا ويىندارىنا, سپورت تۇرلەرىنەن وتەتىن الەم چەمپيوناتى سىندى دۇنيەجۇزىلىك دودالارعا, حالىقارالىق تۋرنيرلەرگە تۇراقتى قاتىسادى. تاۋەلسىزدىك العان جىلدان باستاپ قازاقستان سپورتشىلارى ءتورت جىلدا ءبىر مارتە ۇيىمداستىرىلاتىن قىسقى جانە جازعى وليمپيا ويىندارىنان ولجاسىز قايتقان شاعى جوقتىڭ قاسى. تەك قىسقى وليمپيادا دوداسىندا مەيمانىمىز تاسىماعانىمەن, جازعى وليمپيادانىڭ دۋىندا ساڭلاقتار ەل مەرەيىن اسقاقتاتىپ ءجۇر.
الەم بىرىنشىلگى, الەم كۋبوگى, جازعى ازيا ويىندارى, ازيا چەمپيوناتتارى سىندى ايتۋلى الاماندا ولجا سالعان ساڭلاقتارىمىز ەل سپورتىنىڭ الەۋەتىن ارتتىرىپ, دەڭگەيىن وزگە ەلدەردىڭ دارەجەسىمەن تەڭەستىرىپ وتىر. 1994 جىلى ليللەحاممەردە وتكەن قىسقى وليمپيادا ويىندارىنا تۇڭعىش رەت دەربەس قۇراما رەتىندە قاتىسىپ, 1 التىن, 2 كۇمىس مەدال يەلەندى. سودان بەرى قازاقستان دەلەگاتسياسى قىسقى وليمپيا ويىندارىنا جەتى مارتە قاتىستى. شاڭعىمەن جۇگىرۋدەن, بياتلوننان, كونكي سپورتىنان ەنشىمىزگە مەدال جازىلدى. دەمەك بىزگە قىسقى سپورتتى دامىتۋ جولىندا وسىنداي سپورت تۇرلەرىنە باسىمدىق بەرۋىمىز كەرەك. 1994 جىلى نورۆەگيانىڭ ليللەحامەر قالاسىندا وتكەن قىسقى وليمپيادا دوداسىندا 50 شاقىرىم قاشىقتىقتا توپ جارعان ۆلاديمير سميرونوۆتىڭ ءىزىن باسار شاكىرتتەر دايارلاۋدىڭ ماڭىزى زور. 1998 جىلى جاپونيانىڭ ناگانو قالاسىندا وتكەن قىسقى الاماندا كونكيمەن جۇگىرۋدەن ليۋدميلا پروكاشەۆا, 2014 جىلى رەسەيدىڭ سوچي قالاسىندا وتكەن اق وليمپيادا الامانىندا دەنيس تەن مانەرلەپ سىرعاناۋدان قولا مەدال يەلەندى. ەندەشە, وليمپيادالىق سپورت تۇرلەرىنەن ءىزباسارلار دايارلايتىن كەشەندە وسى سپورت تۇرىنە ءمان بەرىلىپ, جاستاردىڭ شوعىرى جارقىراي كورىنۋىنەن ءۇمىت ەتەمىز. بيىل وڭتۇستىك كورەيادا وتكەن جاسوسپىرىمدەر اراسىنداعى قىسقى وليمپيادا الامانىندا شاڭعىمەن تۇعىردان سەكىرۋدەن چەمپيون اتانعان يليا ميزەرنىح سياقتى تالانتتاردىڭ بوي كورسەتۋىنە جول اشۋعا ءتيىسپىز.
1996 جىلى اقش-تىڭ اتلانتا قالاسىندا وتكەن جازعى وليمپيا ويىندارىنا قازاقستان دەلەگاتسياسى العاش رەت ات بايلادى. تورتكۇل دۇنيە ديدارىن وزىنە قاراتقان دۇنيەجۇزىلىك دوداعا قوسىلعان سپورتشىلاردىڭ ورتاسىندا ەگەمەندىگىن ەندى العان جاس مەملەكەتتىڭ دە وعلاندارى ويقاستاپ, جۇلدەنى كوسىپ الدى.
جالپى, جازعى وليمپيا ويىندارىنان ەلىمىزدىڭ سپورتشىلارى 2016 جىلى وتكەن ريو دوداسىنا دەيىن التىن مەدالسىز قايتقان ەمەس. اسىرەسە «جىرتىعىمىزعا جاماۋ بولىپ» بوكسشىلار ولقىلىقتىڭ ورنىن بۇتىندەپ كەلدى. قازاق بوكسىنىڭ باي ءداستۇرىن 2021 جىلى توكيودا وتكەن جازعى وليمپياداداعى 2 قولانى بيىلعى پاريجدەگى جالقى كۇمىستىڭ سالماعىمەن ولشەۋگە استە بولمايدى. بۋىن الماسۋ ءۇردىسى قاي سپورتتا دا جۇرەدى. راس, ۇلتتىق قۇرامانىڭ دايىندىعى, بوكسشىلاردىڭ الەۋەتىنە قاتىستى ايتىلار سىننىڭ ءال ءازىر باسىلمايتىنى بەسەنەدەن بەلگىلى. ءبىز تەك جەكپە-جەك سپورت تۇرلەرىنىڭ ىشىندە بوكسقا بار جاۋاپكەرشىلىكتى جۇكتەپ قويىپ, وراسان زور ناتيجەنى كۇتىپ وتىرعاندايمىز. دزيۋدو كۇرەسىنەن دە وليمپيادانىڭ التىن مەدالىن قازاق ەلىنىڭ سپورتشىلارى ولجالاي الاتىنىن ەلدوس سمەتوۆ ايگىلەپ بەردى. جەڭىل اتلەتيكادان دا جەرگە قاراتپايتىن ساڭلاقتارىمىزدىڭ بار ەكەنىن سوناۋ سيدنەي وليمپياداسىندا (2000) ولگا شيشيگينا التىن ولجالاپ پاش ەتتى. ونىڭ داڭقتى جولىن ولگا رىپاكوۆا جالعاستىردى. ارينە, بەكزات ساتتارحانوۆ سالعان سۇرلەۋمەن وليمپيادانىڭ التىنىن ولجالاعان ەرماحان ىبىرايموۆ, باقتيار ارتاەۆ, باقىت سارسەكباەۆ, سەرىك ساپيەۆ, دانيار ەلەۋسىنوۆتەردىڭ وليمپيادادان العان ەنشىسىن قايتالايتىن ساڭلاقتار تۋادى ءالى.
سپورتتىق گيمناستيكادان ساڭلاقتارىمىزعا وليمپيادانىڭ مەدالى جالىنان ۇستاتپاي كەلگەن. ناريمان قۇربانوۆ كۇنى كەشە پاريجدە كۇمىس مەدالعا قول جەتكىزىپ مەرەيىمىزدى اسىردى. نىسانا كوزدەۋدەن يسلام ساتپاەۆ پەن الەكساندرا لەنىڭ قولا مەدالى دە وراسان شارۋاعا ارقاۋ بولىپ سەڭدى قوزعاۋعا ءتيىس.
قازاق سپورتىنىڭ ەڭسەسىن تىكتەۋ جولىندا ءالى دە اتقارىلار شارۋا شاش-ەتەكتەن. اۋقىمدى رەفورما جاسالۋى كەرەك ەكەنىن پاريج جازعى وليمپياداسى دا ايقىنداپ بەردى.
ەلىمىزدىڭ سپورتشىلارى پاراليمپيادا, سۋردوليمپيادا ويىندارىنان دا جۇلدەسىز قايتقان ەمەس. بۇقارالىق سپورتتى دامىتۋ, ۇلتتىق سپورتتى وركەندەتۋ ىسىندە دە ىلگەرىلىك بايقالادى.
