كەزدەسۋ بارىسىندا كەنىش جۇرگىزۋشىلەرىنىڭ كاسىبي قىزمەتى مەن الەۋمەتتىك كەپىلدىكتەرىنە قاتىستى ماسەلەلەر تالقىلاندى. بيىلدان باستاپ زياندى ەڭبەك جاعدايىندا جۇمىس ىستەپ جۇرگەن 55 جاسقا تولعان ازاماتتارعا مەملەكەت ارناۋلى الەۋمەتتىك تولەم بەرە باستاعانى بەلگىلى. باسقوسۋ بارىسىندا جۇرگىزۋشىلەر وزدەرىن وسى تولەم الۋ قۇقىعىنا يە تۇلعالار تىزىمىنە قوسۋدى سۇرادى.
ءماجىلىس ۆيتسە-سپيكەرى بۇل ماسەلەنى ەڭبەك جانە حالىقتى الەۋمەتتىك قورعاۋ مينيسترلىگىمەن بىرلەسە وتىرىپ تالقىلاۋ قاجەت ەكەنىن ايتتى. ويتكەنى زياندى ەڭبەك جاعدايىنداعى جۇمىسشىلاردىڭ ءتىزىمىن وسى مينيسترلىك بەكىتەدى. ءماجىلىس توراعاسىنىڭ ورىنباسارى «سسكوب» اق جۇمىسشىلارعا الەۋمەتتىك كەپىلدىكتەر بەرۋ جانە وندىرىستەگى قاۋىپسىزدىكتى قامتاماسىز ەتۋ جونىنەن ەلىمىزدەگى جەتەكشى كاسىپورىنداردىڭ ءبىرى ەكەنىن دە اتاپ ءوتتى.
«كارەرلىك جۇك كولىكتەرىن جۇرگىزۋ اسا اۋىر ءارى جۇيكەگە ايتارلىقتاي جۇك تۇسىرەتىن جاۋاپتى دا بەينەتى مول جۇمىس ەكەنىن جاقسى بىلەمىز. سىزدەرگە لايىقتى ەڭبەك جاعدايىن جاساپ, دەنساۋلىقتارىڭىزدىڭ قورعالۋىن قامتاماسىز ەتۋدىڭ دە وتە ماڭىزدى ەكەنىن تۇسىنەمىز. «Amanat» پارتياسى سايلاۋالدى باعدارلاماسىندا زياندى جانە قاۋىپتى وندىرىستەردە جۇمىس ىستەيتىن قىزمەتكەرلەردىڭ ەرتە زەينەتكە شىعۋىن قامتاماسىز ەتۋ مىندەتىن قويعان بولاتىن. دەپۋتاتتار زاڭ ازىرلەدى, پرەزيدەنت قولدادى. بۇگىندە ەل كولەمىندە 8 مىڭنان استام ادام تولەم الىپ جاتىر. ال كەنىشتەگى جۇك تۇسىرەتىن كولىك جۇرگىزۋشىلەرىنىڭ زەينەتكە ەرتە شىعۋ قۇقىعىنا يە بولۋى جونىندەگى ماسەلەنى ۇكىمەتپەن بىرلەسە وتىرىپ قاراستىرامىز», دەدى البەرت راۋ.
زياندى وندىرىستەردە جۇمىس ىستەيتىن قىزمەتكەرلەردىڭ زەينەت جاسىن 55 جاسقا دەيىن تومەندەتۋ تۋرالى زاڭ بيىل 1 قاڭتاردان باستاپ كۇشىنە ەنگەنىن ايتا كەتكەن ءجون. زاڭ قاۋىپتى ەڭبەك جاعدايىندا جۇمىس ىستەپ كەلگەن ازاماتقا زەينەتكە شىعۋ نەمەسە قىزمەت ءتۇرىن وزگەرتىپ, جەڭىل جۇمىسقا اۋىسۋ مۇمكىندىگىن بەرەدى. زەينەت دەمالىسىنا ەرتە شىعۋ ءۇشىن نەمەسە ءتيىستى تولەمدەردى رەسىمدەۋ ءۇشىن جۇمىسشىنىڭ كەمىندە 7 جىل ەڭبەك ءوتىلى جانە مىندەتتى زەينەتاقى جارناسى بولۋى قاجەت.
جيىننان سوڭ البەرت راۋ سوكولوۆ-سارىباي كەن-بايىتۋ وندىرىستىك بىرلەستىگىندەگى اۆتوموبيل تسەحىنىڭ جۇمىسىمەن تانىسىپ, كاسىپورىننىڭ پارتيالىق بەلسەندىلەرىمەن جۇزدەستى.
قوستاناي وبلىسى
