فوتو: smi24.kz
قايرات ءساتجانوۆ بوكستان قازاقستان ەرلەر قۇراماسىنا باس باپكەر بولىپ تاعايىندالدى.
قايرات تۇرسۇنقان ۇلى ءساتجانوۆ - 54 جاستا, قازاقستان رەسپۋبليكاسىنىڭ بوكستان ەڭبەك سىڭىرگەن جاتتىقتىرۋشىسى, قازاقستان رەسپۋبليكاسىنىڭ دەنە شىنىقتىرۋ جانە سپورت ۇزدىگى. باپكەرلىك ەڭبەك ءوتىلى - 34 جىل. 2021-2022 جىلدارى قازاقستان ۇلتتىق قۇراماسىنىڭ باس باپكەرى قىزمەتىن اتقارعان. 2024 جىلدان قازاقستان جاستار قۇراماسىنىڭ اعا باپكەرى بولدى.
جاڭا باس باپكەردىڭ جەتەكشىلىگىمەن 2021 جىلى قازاقستان قۇراماسى الەم چەمپيوناتىندا (سەربيا) II كوماندالىق ورىن (2 التىن, 2 كۇمىس, 1 قولا مەدال) الدى.
2022 جىلى ازيا چەمپيوناتىندا (يوردانيا) ءىى كوماندالىق ورىن (3 التىن, 6 كۇمىس, 3 قولا) ەنشىلەگەن.
2024 جىلى استانادا وتكەن جاستار اراسىنداعى ازيا چەمپيوناتىندا قازاقستان كومانداسى I كوماندالىق ورىن (5 التىن, 1 كۇمىس, 3 قولا) الدى.
قايرات ساتجانوۆ جاتتىقتىرۋشى رەتىندە 7 الەم چەمپيونىن, 43 ازيا چەمپيونىن دايىنداعان.
«قازىرگى ۋاقىتتا جاڭا جاتتىقتىرۋشىلار قۇرامى قۇرىلىپ جاتىر, ونىڭ ىشىندە: شەتەلدىك جاتتىقتىرۋشى مامان, جالپى دەنە دايارلىعى بويىنشا جاتتىقتىرۋشى, سونداي-اق عىلىمي توپ ماماندارى شاقىرىلادى. سونىمەن قاتار باس جاتتىقتىرۋشىنىڭ جەكە شاكىرتى بولمايدى دەگەن تالاپ ەنگىزىلدى», دەلىنگەن بوكس فەدەراتسياسى تاراتقان حابارلامادا.
