فوتو: ۇكىمەت
ۇكىمەت باسشىسىنا ونەركاسىپ جانە قۇرىلىس, وقۋ-اعارتۋ, دەنساۋلىق ساقتاۋ, ەنەرگەتيكا, كولىك مينيسترلىكتەرىنىڭ باسشىلارى مەن بىرقاتار وبلىس اكىمدەرى سۋ تاسقىنى سالدارىن جويۋ جۇمىستارىنىڭ بارىسى تۋرالى باياندادى.
اپاتتى دەپ تانىلعان 8 650 ءۇيدىڭ يەسىنە قايتالاما نارىقتان ءۇي ساتىپ الىنۋدا نەمەسە جاڭاسى سالىنىپ جاتىر. ونەركاسىپ جانە قۇرىلىس ءمينيسترى قانات شارلاپاەۆتىڭ ايتۋىنشا, 2 569 جاڭا ءۇي سالىنىپ جاتىر, ولاردىڭ 619-ى تولىقتاي دايىن. 2 431 ءۇيدىڭ ىرگەتاسى تۇرعىزىلىپ, 2 207 ءۇيدىڭ قابىرعاسى قالانعان جانە 2 007 نىسان شاتىرى جابىلعان.
سونىمەن قاتار جوندەلۋى ءتيىس 9 189 نىساننىڭ 8 939-ىندا (97%) جۇمىستار اياقتالعان. ساتىپ الۋ جوسپارلانعان 6 081 ءۇي مەن پاتەردىڭ بۇگىندە 4 918-ءى (81%) ساتىپ الىنعان.
دەسە دە, پرەمەر-مينيستر سۋ تاسقىنى سالدارىن جويۋ جانە ازاماتتاردىڭ مۇلكىن قالپىنا كەلتىرۋ بويىنشا بەلسەندى جۇمىس جۇرگىزىلسە دە, بەكىتىلگەن كەستەلەردەن كەشىگۋ فاكتىلەرى بار ەكەنىنە توقتالدى.
«مەملەكەت باسشىسىنىڭ سۋ تاسقىنىنان زارداپ شەككەندەردى ۋاقىتىلى تۇرعىن ۇيمەن قامتاماسىز ەتۋ جونىندەگى مىندەتى مەرزىمىندە ورىندالۋى ءتيىس. رەسپۋبليكالىق شتاب قاجەتتى شەشىمدەردى قابىلدادى, قارجى تولىق كولەمدە ءبولىندى. بارلىق رەسۋرستاردى جۇمىلدىرىپ, جۇمىستى جانداندىرۋ قاجەت», دەدى ولجاس بەكتەنوۆ.
سونداي-اق ۇكىمەت باسشىسىنا الەۋمەتتىك نىسانداردى قالپىنا كەلتىرۋ جۇمىستارى تۋرالى باياندالدى. سۋ تاسقىنى سالدارىنان ەلىمىزدىڭ 6 وڭىرىندە 11 مىڭعا جۋىق بالا وقيتىن 40 ءبىلىم بەرۋ ۇيىمى زارداپ شەككەن. بۇل باعىتتا دا قالپىنا كەلتىرۋ جۇمىستارى بەلسەندى تۇردە اتقارىلىپ جاتقاندىعى اتاپ ءوتىلدى.
بۇل رەتتە اقتوبە وبلىسىندا 8 نىسانعا كۇردەلى جانە اعىمداعى جوندەۋ جۇمىستارى جۇرگىزىلىپ جاتىر. ۇكىمەت رەزەرۆىنەن 6 جاڭا ءبىلىم بەرۋ مەكەمەسىنىڭ قۇرىلىسىنا 6,2 ملرد تەڭگە بولىنگەن. ال, اتىراۋ وبلىسىنداعى 6 نىساندا جوندەۋ جۇمىستارى 50%-عا اياقتالعان. سونىمەن قاتار بالاباقشا مەن مەكتەپ قۇرىلىسى باستالعانى بەلگىلى بولدى.
باتىس قازاقستان وبلىسىندا 4 نىساننىڭ اعىمداعى جوندەۋ جۇمىستارىن 1 قىركۇيەككە دەيىن اياقتاۋ جوسپارلانىپ وتىر. سولتۇستىك قازاقستان وبلىسىندا سۋ باسقان 5 ءبىلىم بەرۋ ۇيىمىنىڭ ۇشەۋى وقۋ جىلىن باستاۋعا دايىن. اقمولا جانە قوستاناي وبلىستارىنداعى ءبىلىم بەرۋ مەكەمەلەرىندە جوندەۋ جۇمىستارى اياقتالۋعا جاقىن. اتالعان وڭىرلەردە 6 نىسان زاقىمدانعان, سولاردىڭ بىرەۋى بۇزىلىپ, ورنىنا جاڭا عيمارات سالىنادى.
سونىمەن قاتار وڭىرلەردە 8 مەديتسينا مەكەمەسى زارداپ شەككەن. ءۇش نىساننىڭ قۇرىلىسى «اۋىلدا دەنساۋلىق ساقتاۋدى جاڭعىرتۋ» باعدارلاماسى اياسىندا جۇرگىزىلىپ جاتىر. تاعى ءۇش نىساندا اعىمداعى جانە كۇردەلى جوندەۋدى قاجەت ەتەدى, ال بىرەۋىنىڭ ورنىنا جاڭا عيمارات سالۋ جوسپارلانعان.
بۇگىنگى تاڭدا رەسپۋبليكالىق ماگيسترالداردىڭ 102 ۋچاسكەسىندە جۇمىستار تولىعىمەن اياقتالعان. گاز تاسىمالداۋ ينفراقۇرىلىمى نىساندارى شتاتتىق رەجيمدە جۇمىس ىستەيدى.
ونەركاسىپ جانە قۇرىلىس مينيسترلىگىنە اكىمدىكتەرمەن بىرلەسىپ, بارلىق جۇمىستار اياقتالعانعا دەيىن قۇرىلىس نىساندارىندا ۇيلەستىرۋ مەن باقىلاۋ جۇمىستارىن كۇشەيتۋ تاپسىرىلدى.
