– اسسالاۋماعالەيكۋم, مەيرامبەك زامانداس! اقجول ماحمۇدوۆتاي گرەك-ريم كۇرەسىنەن قىرعىزدان شىققان تۇڭعىش الەم چەمپيونىنىڭ جەكە باپكەرى ەكەنىڭىزدى ەستىپ, مارقايىپ قالدىق. ەلدەگى باۋىرلارىڭىز بىلە ءجۇرسىن, اۋەلى اتا جۇرتىڭىز, ءتۇپ نەگىزىڭىز, اكە-شەشەڭىز تۋرالى ايتساڭىز.
– كوپ راحمەت! اتا جۇرتىم – جامبىل وبلىسىنىڭ قورداي اۋدانى. اكەم جانەل احمەت ۇلى قوردايدان, انام مايكە مۇحيموۆا شۋ اۋدانىنان. ەكەۋى دە قازاق. ول كىسىلەر وتكەن عاسىردىڭ الپىسىنشى جىلدارى بىشكەككە كوشىپ كەلدى. سودان بەرى قىرعىز جەرىندە تۇرىپ جاتىرمىز. قوردايداعى اعايىن-تۋعاندارىمىزبەن ارالاسىپ تۇرامىز.
– بارەكەلدى, ەندى اڭگىمە ارناسىن سپورتقا بۇرساق. ماكە, باپكەرلىك تۋرالى تۇيىندەپ ايتىپ كورسەڭىز. بۇل ءوزى كاسىپ پە, ماماندىق پا, الدە باسقالاي قىرلارى بار ما؟
– جاتتىقتىرۋشىلاردىڭ ءبارى بىردەي مىقتى مامان ەمەس. ناعىز باپكەرلىك قاسيەت اللادان بەرىلەدى. زالدا جاتتىعۋ جاساتقاننىڭ ءبارىن باپكەر دەۋگە كەلمەيدى. باپكەر ەڭ اۋەلى بالانى دۇرىس تاربيەلەي ءبىلۋى كەرەك. ول ءۇشىن ءوزى تاربيەلى بولۋعا مىندەتتى. شاكىرتتەرىڭە كەرەك جەرىندە اكەسىندەي قامقور بول. ەڭ الدىمەن كۇرەستى سۇيۋگە تاربيەلە, كىشكەنتايىنان ويلى, ساپالى كۇرەسكە باۋلى. باپكەردىڭ نيەتى تازا بولسا, بالا ونى سەزەدى. ال كۇرەس شىڭىنا نيەتى ءتۇزۋ, جۇرەگى تازا, تاربيە كورگەن ويلى ءارى تاباندى شاكىرت قانا جەتەدى. سوندىقتان قاراماعىمداعى بالالارعا ەڭ اۋەلى ادامشىلىعىڭدى ساقتا, كىسىگە جاماندىق جاساما, تەك جاقسىلىق قىل دەگەندى ايتۋدان جالىققان ەمەسپىن. چەمپيون شاكىرتتەرىمە كەۋدەڭدى كوتەرمە, كوپشىلىك قانداي قاراپايىم بولسا, سەن ودان وتكەن قاراپايىم بول دەيمىن. جۇرت سۋرەتكە تۇسەيىك دەسە, قاسىنا تۇرا قال, ەرتەڭ ول «چەمپيون مەنىمەن قۇشاقتاسىپ سۋرەتكە ءتۇستى» دەپ مارقايىپ جۇرەدى. جاقسىلىققا بەيىم ادام عانا – ناعىز چەمپيون دەگەن ۇستانىمدى شاكىرتتەرىم دە ۇستانسا دەيمىن.
– ايگىلى فۋتبول باپكەرى ۆالەري لوبانوۆسكيدىڭ: «باپكەر ءومىر بويى وقىپ, ىزدەنۋى كەرەك. ىزدەنىستى توقتاتقان باپكەر – باپكەر ەمەس» دەگەن سوزىنە قالاي قارايسىز؟
– كاسىبىن شىنايى سۇيگەن ادام عانا ۇلكەن جەڭىستەردىڭ ءدامىن تاتادى. جوسپارلى, جۇيەلى جۇمىس قانا جاقسى ناتيجە بەرمەك. باپكەر ۇنەمى ىزدەنىس ۇستىندە بولعانى ابزال. روبوت ءتارىزدى سەزىمسىز, ىزدەنىسسىز تىرلىكتەن ەشتەڭە شىقپايدى. بۇگىنگى جاتتىعۋدا مىنانى ىستەدىك, ەندى مىنا نارسەنى قوسساق قالاي بولادى, تاعى نەنى ۇمىتتىم دەپ تالماي ىزدەنگەن, ەرىنبەي ەڭبەكتەنگەن ادام عانا ءتۇبى ماقساتىنا جەتەدى.
بالالاردى ۇنەمى قىزىقتىرىپ, ەلىتىپ وتىرۋ وڭاي ەمەس. ولار كۇندەلىكتى جاتتىعۋدا بەلگىلى جۇكتەمەنى قينالماي اتقارىپ, ءلاززات الۋى كەرەك. ۇيگە راحات سەزىممەن قايتقان بالا كەلەسى جاتتىعۋعا اسىعىپ تۇرادى. مۇنداي جاعدايدا شاكىرتتەرىڭ دە ريزا, ءوزىڭ دە ريزا بولاسىڭ. ال ىزدەنىسىن توقتاتقان جاتتىقتىرۋشى كۇرەس زالىندا مۇنداي اتموسفەرا قالىپتاستىرا المايدى.
– شاكىرتتەرى ءدۇيىم ەلدى مويىنداتقان باپكەرلەردى سۇراپىل سابىر يەلەرى دەپ جاتادى. بۇعان نە ايتار ەدىڭىز؟
– ءبىر كىسى جاقسى ترەنەر بولۋ ءۇشىن ادام وتە ءتوزىمدى, وتە سابىرلى بولۋى كەرەك دەپتى. بۇعان الىپ-قوسارىم جوق.
– ءسىزدىڭ ۇستازدارىڭىز تۋرالى بىلە وتىرساق.
– جاس كەزىمدە ەركىن كۇرەستەن كسرو-نىڭ ەڭبەك سىڭىرگەن جاتتىقتىرۋشىسى, كەڭەس قۇراماسىنىڭ باپكەرى بولعان الەكساندر رەمەزوۆتىڭ جاتتىعۋىنا ءجيى بارىپ تۇردىم. الەم, ەۋروپا جانە كسرو چەمپيوندارىن باپتاعان الەكساندر يۆان ۇلىنىڭ جاتتىعۋ ۇدەرىسى ناقتى جوسپارمەن قىزىقتى ءوتۋشى ەدى. ول كىسىنىڭ شاكىرتى, بىلىكتى باپكەر جەڭىس دونباەۆتىڭ دا ماشىقتارى كوڭىلگە قونىمدى بولاتىن. جەڭىس دونباەۆ – ەركىن كۇرەستەن الەم چەمپيوناتىنىڭ قولا مەداليسى, كسرو حالىقتارى سپارتاكياداسىنىڭ چەمپيونى كەنجەبەك ومىراليەۆتىڭ, ازيا ويىندارىنىڭ جۇلدەگەرلەرى ماقسات بوبۋربەكوۆ پەن نۋردين دونباەۆتىڭ, تاعى باسقا بەلدى بالۋانداردىڭ باپكەرى, كەڭەس وداعىنىڭ ەڭبەك سىڭىرگەن جاتتىقتىرۋشىسى. جەڭىس اعا ساۋاتتى, ىزدەنىمپاز مامان. جاتتىعۋ ۇدەرىسىن جۇيەلى جوسپارمەن تارتىمدى قىلىپ اتقاراتىن. وسىنداي ۇستازداردان ۇيرەنە ءجۇرىپ, ءوزىم دە تالماي ىزدەندىم.
– شاكىرتتەرىڭىزدىڭ ناتيجەلەرىنە, اڭگىمەڭىزگە قاراعاندا جاتتىعۋ ۇدەرىسىن جوسپارمەن, بەلگىلى جۇيەمەن اتقاراتىن ءتارىزدىسىز.
– سانالى ادام ۋاقىتىن بوسقا وتكىزبەۋگە تىرىسادى. مەكتەپتە جاقسى وقىدىم. ءبىلىمدى بولۋعا تالپىندىم. اسىرەسە گۋمانيتارلىق پاندەرگە كوڭىلىم بۇرىپ تۇراتىن. ماتەماتيكانى تازا تورتكە وقىدىم. قازىرگى باپكەرلەردىڭ كوبى وقۋعا, بىلىمگە جەتە ءمان بەرمەيدى. كوبى فيزكۋلتۋرا ينستيتۋتىندا جارىتىپ وقىماي, بازالىق ءبىلىمىن شالا قالىپتاستىرىپ جاتتىقتىرۋشى بولادى. كەيبىرەۋلەر كەزىندە جاقسى كۇرەسكەن شىعار, بىراق ءارى قاراي ىزدەنبەسەڭ, وقىماساڭ جاقسى باپكەر بولا المايسىڭ. بىلىكتى باپكەر بولۋ ءۇشىن اۋەلى ءوزىڭنىڭ دەڭگەيىڭدى جان-جاقتى كوتەرۋىڭ كەرەك. مىسالى, شاكىرتتەرىڭ جامىراپ سۇراق قويادى. ءبىلىم-بىلىگىڭ جەتپەسە, جاۋابىڭ شيكى بولادى. ءار بالانىڭ تابيعاتى ءارتۇرلى. ءبىرى كۇشتى, ءبىرى سەزىمتال, ەندى ءبىرى جىلدام, ءبىرى باياۋ دەگەندەي. ارقايسىسىنىڭ بەيىمىنە قاراي جاتتىعۋ ادىستەمەسىن ىڭعايلاۋعا ءتيىسسىڭ. ءبىرىنىڭ ادىستەمەسى ەكىنشىسىنە ساي كەلمەيدى. ال بالانىڭ ىرگەتاسىن دۇرىس قالىپتاستىرۋدىڭ ماڭىزى وتە زور. سوسىن كۇرەس تەحنيكاسىن, ودان ءارى ءادىس, وعان جالعاستىرا كومبيناتسيا ۇيرەتەسىڭ. سوندا بالا ساتىلاپ جەتىلىپ, ويلانىپ كۇرەسۋگە داعدىلانادى.
بالالاردى باس-كوز جوق جارىسقا سالۋعا بولمايدى. ولاردى ءوز دەڭگەيىندەگى باسەكەگە دايىن بولعاندا, قۇلشىنىسى ويانعاندا عانا اپارۋ كەرەك. ايتپەسە, مىنەزى, كۇرەسى ءالى قالىپتاسىپ ۇلگەرمەگەن شاكىرت مۇقالىپ, جاسىپ قالۋى مۇمكىن. ونداي بالانىڭ قالپىنا كەلۋى قيىنعا سوعادى. سوسىن شاكىرتىڭنىڭ قيمىلى كوڭىلىڭە قونباي تۇرسا دا, ونى ءبىر مەزگىل قايراپ, بىردە ماقتاپ وتىرۋ قاجەت. بۇل ولاردىڭ قۇلشىنىسىن كۇشەيتىپ, جىگەرىن جاني تۇسەدى.
– ماكە, ەندى اڭگىمە ارناسىن اقجولعا بۇرايىق. ونى العاش كورگەندەگى سەزىمىڭىز ەسىڭىزدە مە؟
– ەسىمدە. اقجول ماعان 2013 جىلى 14 جاسىندا كەلدى. سالماعى 38 كيلو. ارىق, سۇڭعاق بالا. كوزىنە قاراپ, ويلى ەكەنىن ءبىلدىم. كۇرەستى ىشىمەن سەزەتىنىن اڭعاردىم. العاشقى جاتتىعۋلاردا-اق سەزىمتال, تاباندى قاسيەتىن بايقاتتى.
– كۇرەسىنە قاراساڭ, كىشكەنتايىنان قارا جۇمىسقا جەگىلگەن اۋىل بالاسى ءتارىزدى. كۇرەس تەحنيكاسى مەن كۇشى قاتار جەتىلگەنىن ايتىپ وتىرمىن.
– اكەسى ماحامادجان وتباسىن اسىراۋ ءۇشىن تاندىر نان ءپىسىردى. اقجول كىشكەنتايىنان ناندى ۆەلوسيپەدپەن بىشكەكتىڭ ءار قيىرىنداعى ساۋدا ورىندارىنا تاراتۋعا جاردەمدەستى. ساباعى مەن جاتتىعۋى بولسا دا, ەرىنبەي, ايانباي اكەسىنىڭ قولعاناتىنا اينالدى. ءسويتىپ ءجۇرىپ ءبىر تيىننىڭ قادىرىن ءبىلدى, شيرادى, ءپىستى, بەينەتپەن ەسەيدى.
– قاراماعىڭىزدا بالا كوپ. ءبارى چەمپيون بولعىسى كەلەدى. بارىنە بىردەي تەڭ قاراۋ, كوڭىل ءبولۋ تىم اۋىر ەمەس پە؟
– ارينە, وڭاي ەمەس. بىراق اقجول سەكىلدى ەرەكشە دارىندى بالاعا كوبىرەك كوڭىل ءبولۋ قاجەت. باسقالاردان ەرەكشەلەپ جاتپاي-اق ونىڭ كەمشىلىگىن تۇزەپ, قاتەلىگىن كورسەتىپ وتىردىم. ۇنەمى نازاردا ۇستادىم. زورىقتىرماي, ۇلكەن بالالارمەن بەلدەستىرمەي, سالماق «قۋعىزباي», جاراقاتقا ۇرىندىرماي باپتاۋعا تىرىستىم. ءجاسوسپىرىم شاعىندا جارىسقا ساعىندىرىپ بارىپ قانا سالدىم. ساعىن سىندىرمادىم. اۋەلى دەڭگەيى ورتاشا جارىستارعا قوستىم. ول قارسىلاستارىن جىعىپ, كادىمگىدەي قۋاناتىن. قۇددى الەم چەمپيونى بولعانداي كۇي كەشەتىن. وسىنداي جەڭىستەر ارقىلى ونىڭ بويىندا جەڭىمپازدىق رۋح قالىپتاستى.
– وقۋى, مىنەزى قالاي ەدى؟ زەرەك بالا ما؟
– مەكتەپتە 4 پەن 5-كە وقىدى. سابىرلى, ادامگەرشىلىگى مول, مەيىرىمدى جىگىت. قولى اشىق, جىگىتتەرمەن دامگە بارعاندا تارىلماي, ءوزى تولەپ جىبەرەدى.
– وتە باتىل, ەركىن كۇرەسەدى. مۇنداي دەڭگەيگە قالاي جەتتى؟
– اقجولدى كىشكەنتايىنان كىلەمدە ءوزىن ەركىن سەزىنۋگە, ەركىن قيمىلداۋعا باۋلىدىم. كۇرەسكە قاتتى تولقىپ, تىرىسىپ شىقساڭ, تەز شارشايسىڭ. ونداي كەزدە ءادىسىڭ ءساتتى شىقپايدى, قيمىلىڭ ۇيلەسپەي قويادى. ناعىز بابىڭا ەنگەندە ساناڭ تۇنىق, ويىڭ ۇشقىر, ون ەكى مۇشەڭ ۇستاراداي قىلپىلداپ تۇرادى. جۇرەككە تاۋ قوپاراتىنداي الاپات سەنىم ۇيالايدى. سوندا عانا سۇراپىل قۋاتپەن قارسىلاسىڭدى سەڭ سوققانداي قىلاسىڭ.
– نەبىر تالانتتى جىگىتتەر جاتتىعۋدىڭ تارتپاسىن ءسال بوساتىپ جىبەرىپ, وپىق جەپ جاتادى...
– مەن وسى جاسىما دەيىن اقجول سەكىلدى بەينەتقور سپورتشىنى كورگەن ەمەسپىن. ول جاتتىعۋدان كەيىن ءوز ەركىمەن 1-1,5 ساعات تەر توگەدى. كەيدە زورىعىپ قالماسىن دەپ زالدان قۋىپ شىعامىن.
ءيا, كەي بالا كەرەمەت تالانتتى, بىراق جالقاۋلىق جولىن بايلايدى. كەي بالا ەڭبەكقور, بىراق دارىنى كەم. ەڭبەكقور سپورتشى ءبىراز جەرگە بارادى, ايتسە دە, تابيعي تالانتسىز ۇلكەن جەڭىستەرگە جەتۋ وتە قيىن. ال اقجول تالانتتى, ەڭبەكقور, ويلى ءارى جۇرەكتى بالۋان. اللا تاعالا ونىڭ ءبىر باسىنا چەمپيونعا ءتان قاسيەتتىڭ ءبارىن بەرە سالعان.
– اقجولدىڭ كۇرەسىنە كوزىڭ تويادى. جۇلقىنىپ, جۇتىنىپ تۇرادى. وزىنە بەك سەنىمدى. وپىرىپ, جاپىرىپ كۇرەسەدى. ءسىز جۇيەلى, جوسپارلى جاتتىعۋعا قوسا سپورتتىق رەجىمگە دە قاتتى ءمان بەرەتىن ءتارىزدىسىز.
– رەجىمسىز تۇك تە شىقپايدى. ماسەلەن, تاڭعى جاتتىعۋدا بالۋاندار ءبىراز ەنەرگيا جۇمسايدى. سول ەنەرگيانى كەشكى ماشىققا دەيىن ورنىنا كەلتىرۋ كەرەك. تۇسكى قۇنارلى استىڭ ءجونى بولەك. سوسىن تۇستەن كەيىنگى ەكى ساعاتتاي ۇيقىنىڭ ماڭىزى زور. مەن شاكىرتتەرىمدى وسى تارتىپكە داعدىلاندىردىم. كوپ باپكەر بۇعان جەتە ءمان بەرمەيدى. جۇمساعان قۋاتتى جاستايىنان, ءدال ۋاقىتىندا قالپىنا كەلتىرمەسە, سپورتشى ەسەيگەندە ۇلكەن مايداندارعا شىدامايدى. كەي بالۋاننىڭ بەلدەسۋدىڭ سوڭعى جاعىندا زورىعىپ, تۇرالاپ قالاتىنى سودان.
– سپورتشى ءۇشىن دۇرىس تاماقتانۋدىڭ ماڭىزى زور ەكەنىن بىلەمىز...
– ءيا, جۇيەلى جاتتىعىپ, كەرىسىنشە, دۇرىس تاماقتانباساڭ – ورگانيزم السىرەي بەرەدى. اقجول نەگىزىنەن بۋعا پىسكەن تاماق ىشەدى. قۋىرىلعان تاماققا تىيىم سالدىم. تابيعي شىرىن ىشەدى. نەگىزگى اس ءمازىرى قوي مەن تاۋىق ەتى, سوسىن بالىق. ءتاتتى تاعامدارعا شەكتەۋ قويدىق. سەبەبى تاتتىدەن سالماعى ءوسىپ كەتەدى.
– اقجول تۇرەگەپ تۇرىپ تا, پارتەردە جاتىپ تا قارسىلاستارىن شىداتپايدى. ادىستەرى سان الۋان. كەيىنگى 3-4 جىلدا گرەك-ريم كۇرەسى بويىنشا دۇنيە جۇزىندەگى ەڭ ادىسقوي بالۋاننىڭ ءبىرى ءارى بىرەگەيى اقجول بوپ تۇر. مۇنداي دەڭگەيگە قالاي جەتتىڭىزدەر؟
– ەگەر سەنىڭ وڭتايلى ءبىر ءادىسىڭ بولسا, قارسىلاسىڭا سول ءادىستىڭ جولىن جابۋ اسا قيىنعا سوقپايدى. ال ءيىن قاندىرىپ جاسايتىن 5-6 ادىسىڭە قارسىلاسىڭ توسقاۋىل قويا المايدى. بىرىنە تۇسپەسە, ەكىنشىسىنە تۇسەدى. ەكىنشىسىنە تۇتىلماسا, ءۇشىنشى قارماققا ءبارىبىر ىلىگەدى.
جوعارىدا ايتتىم عوي, اقجولدى كىشكەنتايىنان زورىقتىرماي, دەنساۋلىعىن جانە بابىن ساقتاي وتىرىپ شىڭدادىم دەپ. ىزدەنە كەلە بىرنەشە ءادىستى بىرىنە-ءبىرىن جالعاستىرا قاس-قاعىمدا ساپالى جاسايتىن دارەجەگە جەتكىزدىك. مىسالى, اقجول ەتپەتىنەن سوزىلىپ جاتقان قارسىلاسىنا باس جاعىنان كەلىپ موينى مەن قولتىقتان وراعان بويى شالقالاي بەرە كەۋدەسىنەن اسىرا لاقتىرۋعا شەبەر. بۇعان الاپات كۇش كەرەك. سوسىن جامباسقا سالۋعا, قولتىققا كىرىپ يىقتان اسىرا تاستاۋعا (كوچەرگا), پارتەردە كەرى جۇلقىپ لاقتىرۋعا شەبەر. تاعى ءبىراز ءادىسى بار. بۇل ادىستەردى اۆتوماتتى جاعدايعا جەتكىزۋ ءۇشىن جاتتىعۋ ۇستىندە ءارتۇرلى كومبيناتسيامەن كەمى 200 رەتتەن جاسايمىز. جاتتىعۋ سوڭىنان اقجول تاعى 200 مارتە قايتالاپ شىعادى.
– ماكە, تالاي جىلعى ەڭبەك اقتالىپ, اقجول ماحمۇدوۆ 2022, 2023 جىلدارى 77 كيلو سالماقتا قاتارىنان ەكى رەت دۇنيە ءجۇزىنىڭ چەمپيونى اتاندى. وسى ەكى چەمپيوناتتا دا اقجول كەيبىرەۋلەر قۇساپ كىلەمدە ىرعاسىپ, تىرەسىپ ءجۇرىپ الماي, قارسىلاستارىن ەس جيعىزباي, ۇمار-جۇمارىن شىعاردى. جيىرما ەكىنىڭ فينالىندا ماجار زولتان لەۆايدى سۇمدىق قۋاتپەن شالقالاي بەرە يىقتان اسىرا وراي تاستاعانىن, ءارى قاراي ونى ەسىن جيعىزباي سەرەيگەن قالپىندا باسىنان اسىرا كىلەمگە اتىپ ۇرعانىن ۇمىتا قويعان جوقپىز. مۇنداي تاۋەكەلدى جۇرەگىنىڭ تۇگى بار, بابى كەمەلىنە جەتكەن بالۋان قانا جاساي الادى. وسى ساتتەگى ءسىزدىڭ بال-بۇل جانعان ءجۇزىڭىز دە جادىمىزدا. وسى كەرەمەت جەڭىستىڭ اقجول ەكەۋىڭىزگە ورتاق ەكەنىن ءداپ سول مەزەت جان جۇرەگىمىزبەن سەزىنگەن ەدىك.
– راحمەت!
– ماكە, اقجولدان باسقا الەمدىك ارەنادا ولجاعا كەنەلگەن شاكىرتتەرىڭىز بار شىعار؟
– اللاعا شۇكىر, بار. ءتول شاكىرتىم – قاناتبەك بەگاليەۆ 66 كيلو سالماقتا 2006 جىلعى الەم چەمپيوناتىنىڭ, 2008 جىلعى وليمپيا ويىندارىنىڭ كۇمىس جۇلدەگەرى. 2007 جىلعى ازيا چەمپيونى. قانات وسى بەلەستەرگە جەتكەندە «بۇل كەزدەيسوق جەڭىس» دەپ, كەيبىرەۋلەر مەنىڭ باپكەرلىك بىلىگىمە كۇمان كەلتىرىپ, نامىسىما ءتيدى. مەن ودان سايىن شيرىعىپ, قامشىنى باسا ءتۇستىم.
كوپ ۇزاماي, 2011 جىلى شاكىرتىم ارسەن ەراليەۆ ازيا چەمپيوناتىن ۇتتى. ول لوندون وليمپياداسىندا 8-ورىنعا, ريو-دە-جانەيرو وليمپياداسىندا 5-ورىنعا تابان تىرەدى. قانىبەك جولشىبەكوۆ اتتى شاكىرتىم جاستار جانە ستۋدەنتتەر اراسىنداعى الەم چەمپيونى, ەرەسەكتەر باسەكەسىندە ازيا ويىندارىنىڭ 2 مارتە كۇمىس جۇلدەگەرى, ازيا چەمپيونى. داميربەك اسىلبەك ۇلى ازيا چەمپيوناتىنىڭ كۇمىس, قولا مەدالدارىن جەڭىپ الدى.
– بارەكەلدى! وزىندىك مەكتەبى قالىپتاسقان, وزىندىك قولتاڭباسى بار الەمدىك دەڭگەيدەگى باپكەر ەكەنسىز. قۋانىشتىمىز. ەل جاقتان وتانىڭىزعا قايتىڭىز دەگەن ۇسىنىس تۇسكەن جوق پا؟
– ءبىراز جىل بۇرىن داۋلەت تۇرلىحانوۆ الماتىعا شاقىردى. ءيا, قازاقستاندا كۇرەستىڭ ءداستۇرلى مەكتەبى بار, سوعان ساي باسەكە دە كۇشتى. سىرتتان بارىپ سىيىسىپ, ورنىعىپ كەتە الامىن با دەپ ءبىراز ويلاندىم. قىسقاسى, قابىرعاممەن كەڭەسە كەلە بىشكەكتە قالعاندى ءجون كوردىم.
– ماكە, اڭگىمەڭىزگە كوپ راحمەت! اقجول شاكىرتىڭىزدىڭ پاريج وليمپياداسىنداعى قولا مەدالى قۇتتى بولسىن! قىرعىز جەرىندە ءسىز سەكىلدى الەمدىك دەڭگەيدەگى قازاق باپكەرىنىڭ جۇرگەنى بىزگە دە ابىروي. ەڭبەگىڭىز جانا بەرسىن! امان بولىڭىز!
– كوپ راحمەت! ەلگە دۇعاي-دۇعاي سالەم ايتىڭىز.
اڭگىمەلەسكەن –
قىدىربەك رىسبەك,
جۋرناليست
