جالپى, قوردا وتاندىق تاۋار وندىرۋشىلەردى قولداۋ ءۇشىن بىرقاتار جۇمىس قولعا الىنعان. ماسەلەن, بيىلعى ءساۋىر ايىندا وتاندىق تاۋار وندىرۋشىلەردى قولداۋ شارالارىنىڭ جاڭا پاكەتى قابىلدانعان.
– ءبىز كومپانيا باسشىلارى ءۇشىن ەلىشىلىك قۇندىلىق پەن جاسالعان وفتەيك-كەلىسىمشارتتاردىڭ ۇلەسى بويىنشا KPI بەلگىلەدىك. سونداي-اق جەتكىزۋشىلەرگە وتاندىق ونىمدەردى تۇتىنۋ ۇلەسىن ساقتاۋ بويىنشا مونيتورينگ جۇرگىزىلەدى. بۇعان قوسا جاڭا وندىرىستەردى قۇرۋ باعدارلاماسىنا وزگەرىستەر ەنگىزدىك. دالىرەك ايتقاندا, بۇل قازاقستاندىق نارىقتا قانداي دا ءبىر ءونىمنىڭ تاپشىلىعى بولعان جاعدايدا 20 جىلعا وفتەيك-كەلىسىمشارتتار مەن ينۆەستيتسياعا ايىرباس رەتىندە كەلىسىمشارتتار جاساۋعا مۇمكىندىك بەرەدى, – دەدى قور باسشىسى ن.جاقىپوۆ.
قازىرگى كەزدە قوردا وتاندىق تاۋار وندىرۋشىلەردى قولداۋ باعىتىندا 15-تەن اسا ءىس-شارا قولعا الىنعان.
توراعانىڭ ايتۋىنشا, جاڭا وندىرىستەردى اشۋ باعدارلاماسىنا سايكەس بيىلعى قاڭتار-شىلدە ايلارىندا جالپى قۇنى 107 ملرد تەڭگە بولاتىن 155 وفتەيك-كەلىسىمشارت جاسالعان. وتكەن جىلمەن سالىستىرعاندا بۇل كورسەتكىش 7,5 ەسەگە كوپ. بۇعان قوسا 182 ملرد تەڭگەگە 24 جوبا ءالى دە قارالىپ جاتىر ەكەن. وسى ايدىڭ سوڭىنا دەيىن بۇل جوبالار بويىنشا ناقتى شەشىم قابىلدانادى.
ن.جاقىپوۆ بيىل بىرقاتار جوعارى تەحنولوگيالىق ءوندىرىس ماقۇلدانعانىن ايتتى. اتاپ ايتقاندا, تۇركىستان وبلىسىندا قۋاتى 800 مىڭ توننا بولاتىن كۇكىرت قىشقىلى زاۋىتىن سالۋ, اۆتوماتتاندىرىلعان اقپاراتتىق-ولشەۋ جۇيەسى ارقىلى ەلەكتر ەنەرگياسىن ەسەپتەۋ, گاز ايداۋ اگرەگاتىن, گاز تۋربينالى قوندىرعىلار جيناعىن ءوندىرۋ سەكىلدى ءوندىرىس ورىندارى بار.
سونىمەن قاتار قور تاراپىنان ەڭبەكاقى دەڭگەيىن كوتەرۋ, جاڭا جۇمىس ورىندارىن اشۋ جانە باسقا دا مىندەتتەمەلەر جۇكتەلگەن.
وتاندىق وندىرۋشىلەردەن تاۋار ساتىپ الۋ ۇلەسىن ارتتىرۋ باعىتىندا جىل باسىنان بەرى قۇنى 689,5 ملرد تەڭگەنى قۇرايتىن شارتتار جاسالدى. ونىڭ ىشىندە 396 ملرد تەڭگەنىڭ 66 ۇزاق مەرزىمدى شارتى بار. وسىلايشا, وتكەن جىلمەن سالىستىرعاندا وتاندىق وندىرۋشىلەردەن ساتىپ الۋ كولەمى 72%-عا ارتىپ وتىر.
سونىمەن قاتار ن.جاقىپوۆ پرەزيدەنتتىڭ ەكونوميكانى ىرىقتاندىرۋ تۋرالى جارلىعىنا سايكەس جوسپارلانىپ وتىرعان قوردىڭ ساتىپ الۋ تارتىبىنە ەنگىزىلەتىن وزگەرىستەرگە توقتالىپ ءوتتى. بۇل وزگەرىستەر ساتىپ الۋ پروتسەسىنىڭ اشىقتىعىن ارتتىرۋدى جانە ساتىپ الۋعا سەنىمسىز جەتكىزۋشىلەردىڭ قاتىسۋىنا جول بەرمەۋدى كوزدەيدى. ياعني وزگەرتۋلەر ساتىپ الۋدىڭ بارلىق كەزەڭىن, اتاپ ايتقاندا, ساتىپ الۋدى جوسپارلاۋ, جاريالاۋ جانە شارتتى ورىنداۋعا دەيىنگى ارالىقتاردى تۇگەل قامتيدى. ماسەلەن, باسەكەگە قابىلەتسىز ساتىپ الۋدىڭ ۇلەسىن ازايتۋ. كۇندەلىكتى نەمەسە اپتا سايىنعى قاجەتتىلىككە قاراي تۋىندايتىن ءبىر كوزدەن الۋ تاسىلىندەگى ساتىپ الۋدى شەكتەۋلى قاتىسۋشىلار اراسىندا باعا ۇسىنىستارىن سۇراتۋ ارقىلى ساتىپ الۋ ادىسىنە اۋىستىرۋ ۇسىنىلدى.
سونداي-اق باسەكەلەستى ساتىپ الۋدى ارتتىرۋ كوزدەلگەن. بۇل كەزەكتە ساتىپ الۋ كولەمىنىڭ ۇلعايۋىنا بايلانىستى شارت قۇنىن ۇلعايتۋ مۇمكىندىگىنە شەكتەۋلەر ەنگىزۋ ۇسىنىلدى. وزگەرىستەر دەمپينگكە قارسى شارالاردى جەتىلدىرۋ, سەنىمسىز جەتكىزۋشىلەردى ساتىپ الۋ پروتسەسىنەن الاستاتۋ ماسەلەلەرىن دە قامتىدى. اينالىپ كەلگەندە, بۇل شارالاردىڭ بارلىعى وتاندىق تاۋار وندىرۋشىلەرگە كوپ دەمەۋ بولىپ, ەل ۇلەسىن ارتتىرۋعا سەپتەسەدى.
