سۋرەت اۆتورى ماقسات شاعىرباي
مەرگەندەرىمىز «ماجار», «ازيا», «تۇركى», «جامبى» ستيلدەرى بويىنشا باق سىنادى. جالپى ەسەپتى قورىتىندىلاي كەلە, 1-ورىندى ايتبەك سارىباي, 2-ورىندى ابزال ت ۇلىبەكوۆ, ال سوڭعى جولدامانى ەرالحان ايكوز ولجالادى. ال الەم چەمپيونى باتىر بەكساۋىت كوشپەلىلەر ويىندارىنا تىكەلەي جولداما العاندىقتان ىرىكتەۋگە قاتىسقان جوق.
«مەرگەندەردىڭ شەبەرلىگىن سىناۋ سايىسى وتە تارتىستى ءوتتى. ال ەندى ءبىز الداعى V دۇنيەجۇزىلىك كوشپەلىلەر ويىندارىندا التىن مەدال ولجالاپ, چەمپيون اتانۋ ءۇشىن بارىمىزدى سالامىز. ەل نامىسىن ابىرويمەن قورعاۋعا ۋادە بەرەمىن», دەدى جامبى اتۋدان ۇلتتىق قۇراما مۇشەسى ەرالحان ايكوز.
ەرالحان – 2021 جىلى يراننىڭ تەگەران قالاسىندا وتكەن XVI الەم چەمپيوناتىنىڭ جەڭىمپازى جانە كۇمىس جۇلدەگەرى. جامبى اتۋدان ءۇمىت ارتار ەكىنشى ساڭلاق باتىر بەكساۋىت 2021 جىلى جاستار اراسىنداعى ەل چەمپيوناتىندا توپ جارىپ, شىمكەنتتە وتكەن ازيا چەمپيوناتىنىڭ التىن جانە قولا جۇلدەگەرى اتاندى. قىتايدا وتكەن الەم چەمپيوناتىنىڭ التىن جانە قولا جۇلدەسىن ەنشىلەدى. ايتبەك سارىباي 2019 جىلى وڭتۇستىك كورەيادا وتكەن XV الەم چەمپيوناتىنىڭ جەڭىمپازى جانە قولا جۇلدەسىن يەلەندى, قىتايدا ۇيىمداستىرىلعان الەم چەمپيوناتىنىڭ كۇمىس مەدالىن ولجالادى. ابزال تۇرلىبەكوۆ 2018 جىلى جامبى اتۋدان الەم چەمپيوناتىندا جەڭىسكە جەتتى.
جامبى اتۋشىلاردىڭ الاتاۋ بوكتەرىندە باستالعان وقۋ-جاتتىعۋ جيىنى 18 تامىزعا دەيىن جالعاسادى. مەرگەندەردىڭ الاڭسىز دايىندالۋىن تۋريزم جانە سپورت مينيسترلىگىنىڭ ۇلتتىق جانە ات سپورتى تۇرلەرى ورتالىعى ۇيىمداستىرىپ وتىر.
«ازىرلىك ءوز دەڭگەيىندە ءجۇرىپ جاتىر. ءالى كەم-كەتىكتى بۇتىندەيتىن تۇسىمىز بار. كوشپەلىلەر ويىندارىنا 4 سپورتشىمىز جولداما الدى. دۇنيەجۇزىلىك كوشپەلىلەر ويىندارى ۇلتتىق سپورتتىڭ وليمپياداسى دەسەك تە بولادى. سوندىقتان دا بۇعان تاڭداۋلى مەرگەندەر قاتىسادى», دەدى ۇلتتىق قۇرامانىڭ باس باپكەرى ەلدوس باداشەۆ.
مەرگەندەر سوڭعى وقۋ-جاتتىعۋ جيىنىن 27 تامىز بەن 7 قىركۇيەك ارالىعىندا استانادا وتكىزەدى.
اتقا ءمىنۋ ءداستۇرى جالعاستى
ەلوردا ءتورىن دۇبىرگە بولەيتىن دۇنيەجۇزىلىك كوشپەلىلەر ويىندارىنىڭ قارساڭىندا ايتۋلى دودانى قولداۋ ماقساتىندا ءتۇرلى ءىس-شارالار ۇيىمداستىرىلىپ جاتىر. سونىڭ ءبىرى «اتقا ءمىنۋ ءداستۇرى» چەللەندجى استانا ماڭىنداعى «ارعىماق» ات-سپورتتىق ساۋىقتىرۋ كەشەنىندە جالعاسىن تاپتى. «بىرلىك كەرۋەنى» جوباسىنىڭ اياسىندا قۇرىلعان ەلوردالىق ەلشىلەر اتالعان چەللەندجگە قاتىسىپ, اتقا قونىپ, سەيىل قۇردى.
ەلىمىزدە تۇڭعىش رەت وتەتىن دۇنيەجۇزىلىك كوشپەلىلەر ويىندارىن قولداپ, حالىق اراسىندا ناسيحاتتاۋدى قولعا العان ەلشىلەر وسى ءىس-شارانى ۇيىمداستىردى. ەلشىلەرمەن بىرگە ۇلتتىق ات سپورتى فەدەراتسياسى مەن ۇلتتىق سپورت تۇرلەرى قاۋىمداستىعىنىڭ نەگىزىن قالاۋشىلاردىڭ ءبىرى, «اتبەگىلەر مەن شاباندوزدار» ۇيىمىنىڭ توراعاسى, ۇلتتىق سپورت تۇرلەرىنەن ەڭبەك سىڭىرگەن جاتتىقتىرۋشى, جازۋشى-پۋبليتسيست سادىبەك تۇگەل چەللەندجگە قاتىسىپ, باتاسىن بەردى. ەتنوسپورت الامانىن ناسيحاتتايتىن ءىس-شاراعا استانا قالاسى دەنە شىنىقتىرۋ جانە سپورت باسقارماسىنا قاراستى مەكەمە قىزمەتكەرلەرى جانە بەلگىلى سپورتشىلار قاتىستى.
«بىرلىك كەرۋەنى» جوباسى ەلىمىزدىڭ بارلىق ايماعىندا وتكىزىلىپ جاتىر. استانا قالاسىنىڭ ءبىر توپ ەلشىسى بۇعان دەيىن كوكپاردان وتكەن شەبەرلىك ساباعىنا دا قاتىستى.
