فوتو: جەتىسۋ وبلىسىنىڭ ءباسپاسوز قىزمەتى
فرانتسيادان ەلگە ورالعان بەتتە تۋعان جەرىنە ارنايى اتباسىن تىرەگەن بالۋان جاركەنت قالاسىنىڭ ورتالىق الاڭىندا حالىقتىڭ ىستىق ىقىلاسىنا بولەندى. كەزدەسۋگە مىڭنان استام حالىق جينالدى. سپورتشىنى قارسى الۋعا جەتىسۋ وبلىسى اكىمىنىڭ ورىنباسارى دياس ەسداۋلەتوۆ, اۋدان اكىمى مارات ساعىمبەك, 2008 جىلعى بەيجىڭ وليمپياداسىنىڭ كۇمىس جۇلدەگەرى, بالۋان نۇرباقىت تەڭىزباەۆ, ارداگەرلەر, جاستار, جالپى اۋدان تۇرعىندارى كەلدى.
جۇزدەسۋدە سوتسياليستىك ەڭبەك ەرى كۇلاش ايتجانوۆا, اۋداندىق ارداگەرلەر ۇيىمىنىڭ توراعاسى توقتارباي كەرىمقۇلوۆ, سپورتشى نۇرباقىت تەڭىزباەۆ چەمپيوندى پاريج وليمپياداسىنداعى ايتۋلى جەڭىسىمەن قۇتتىقتاپ, ىزگى تىلەكتەرىن جەتكىزدى.
تۇرعىنداردىڭ ىقىلاسىنا بولەنگەن دەمەۋ جادىراەۆ پاريج تورىندەگى بەلدەسۋ كەزىندە جانكۇيەرلەردىڭ, سونىڭ ىشىندە تۋعان ەلىنىڭ اق تىلەۋى وزىنە كۇش بەرگەنىن ايتىپ, قۇشاق اشىپ قارسى العان جەرلەستەرىنە العىس ايتتى.
«حالىققا, اۋدان تۇرعىندارىنا ريزاشىلىعىمدى بىلدىرەمىن. مەن كوپشىلىكتىڭ قولداۋىن ۇنەمى سەزىنىپ كەلەمىن, سوندىقتان ءار قادامىما جاۋاپكەرشىلىكپەن قارايمىن. بۇدان بىلاي دا سپورتتاعى جولىمدى جالعاستىرىپ, حالىقتىڭ ءۇمىتىن اقتايمىن دەپ سەندىرەمىن», دەدى د. جادىراەۆ.
وسى كەزدەسۋدە دەمەۋگە اۆتوكولىكتىڭ كىلتى سىيعا تارتىلدى. وليمپيادانىڭ كۇمىس جۇلدەگەرىنىڭ العاشقى باپكەرى جۇماحان تۇرعامبەكوۆ پەن جەكە باپكەرى بورانبەك قوڭىراتوۆقا دا اۆتوكولىك كىلتى تابىستالدى.
اتاپ وتسەك, قازاقستان رەسپۋبليكاسىنىڭ ەڭبەك سىڭىرگەن سپورت شەبەرى دەمەۋ جادىراەۆ 2003-2007 جىلدارى تالدىقورعان قالاسىنداعى دارىندى بالالارعا ارنالعان سپورت-ينتەرناتىندا وقىعان.
بۇعان دەيىن ول حالىقارالىق تۋرنيرلەر مەن الەم چەمپيوناتتارىنىڭ بىرنەشە مارتە جۇلدەگەرى بولعان. سپورتپەن اينالىسىپ جۇرگەنىنە - 20 جىل.
