سەرگەي 1985 جىلى اقمولا وبلىسىنىڭ شورتاندى اۋدانىندا دۇنيەگە كەلىپ, استاناداعى ەۋرازيا ۇلتتىق ۋنيۆەرسيتەتىن تامامداپ, اسكەري قىزمەتىن دە ابىرويمەن اتقاردى. ستۋدەنت كەزىنەن باستاپ, بىرنەشە جىل «سارىارقا» ۆولەيبول كلۋبىنىڭ مۇشەسى رەتىندە جاستاردى سپورتقا باۋلۋعا كوپ ەڭبەك ءسىڭىردى. ءوزى دە ۇزدىك ويىنشى رەتىندە كوماندانىڭ قۇرامىندا ءتۇرلى تۋرنيرلەرگە قاتىسىپ كەلەدى.
قازاقستان رەسپۋبليكاسى ارداگەر ۆولەيبولشىلار فەدەراتسياسىنىڭ ۆيتسە پرەزيدەنتى ەرسۇلتان بەكتۇرعانوۆتىڭ ايتۋىنشا, شەت مەملەكەتتەردە قازاقتىڭ ۇلتتىق كيىمىن كيىپ, يىعىنا قاسقىر تەرىسىن جاۋىپ شىعاتىن سەرگەي قاجىمۇقان جانە بالۋان شولاق اتالارىمىزدىڭ كەزىندە جىلقىلارمەن, تۇيەلەرمەن, تەمىرلەرمەن, اۋىر تاستارمەن كورسەتكەن, اڭىزعا اينالعان ادىستەرىن كورەرمەندەر الدىندا قايتالاپ, حالىقتى تاڭ قالدىرىپ ءجۇر.
مەملەكەت باسشىسىنىڭ ازاماتتاردىڭ سالاماتتى ءومىر سالتىن ۇستانۋ تالاپتارىن قولداۋشى رەتىندە سەرگەي تسىرۋلنيكوۆ «تۋعان جەرگە قادام باسۋ», «اۋىل» جوبالارىنىڭ نەگىزىن قالاپ, كەيىنگى ءۇش جىلدا ەلىمىزدىڭ 129 اۋىلىن ءوز قاراجاتىنا سپورت بۇيىمدارىمەن قامتاماسىز ەتىپ, ەلدى مەكەندەردەگى 50 مىڭنان استام بالالارمەن كەزدەسۋلەر وتكىزىپ, ولاردىڭ سپورتقا قىزىعۋشىلىعىن ارتتىراتىن يگى ءىستى جۇزەگە اسىردى.
سەرگەي ۆالەرەۆيچ - الەمگە كۇش اتاسىن تانىتقان باتىر, ءتورت دۇركىن گيننەسس رەكوردتار كىتابىنا ەنگەن تۇڭعىش قازاقستان ازاماتى. سونىمەن قاتار ول مادەنيەت پەن سپورتتىڭ رەسمي ەلشىسى, «دوستىق», «قۇرمەت» وردەندەرىنىڭ, «قاجىمۇقاننىڭ 145 جىلدىعى», ساعادات نۇرماعامبەتوۆ, باۋىرجان مومىش ۇلى اتىنداعى ماراپاتتاردىڭ جانە كوپتەگەن مەدالدىڭ يەگەرى. 
