«QazExpo» كونگرەسس ورتالىعىندا وتكەن الەمدىك الاماندا شاحماتشىلار راپيد جانە بليتستەن سايىسقا ءتۇستى. راپيد بويىنشا الەمدىك دودا شۆەيتساريالىق جۇيەمەن ءوتتى. ال بليتستە 8 توپقا بولىنگەن كوماندالار اينالما جۇيەدە تارتىستى. ەكى سايىس تا التى تاقتادا ءوربىپ, ءار كوماندا بەسىنشى تاقتادا ايەل شاحماتشىنى قوسسا, التىنشى تاقتادا اۋەسقوي شاحماتشى باعىن سىنادى.
بىلتىر كوماندالىق الەم چەمپيوناتى گەرمانيانىڭ ديۋسسەلدورف قالاسىندا وتكەنى بەلگىلى. ول كەزدە تەك راپيدتەن سىنعا تۇسكەن شاحماتشىلار ەلوردا تورىندە بليتستەن دە وي جارىستىردى.
الەم چەمپيوناتىنىڭ راپيد سىنىندا توپ جارعان «Al-اin ACMG UAE» كومانداسىندا ايەلدەر دۋەتى كاتەرينا لاگنو مەن چجۋ تسزينەر تەگەۋرىندى ويىن ورنەگىن كورسەتتى. «يراندىق كاسپاروۆ» لاقاپ اتىمەن تانىمال پارحاما ماگسۋدلۋ, دانيل دۋبوۆ, ۆلاديسلاۆ ارتەمەۆ سەكىلدى ۇزدىكتەر جەڭىسكە جەتتى. راپيد سايىسىندا 23 ۇپايدىڭ 21-ءىن ولجالاعان «Al-Ain ACMG UAE» كومانداسىنىڭ شاحماتشىلارى توعىز ماتچتا جەڭىسكە جەتىپ, ءۇش رەت تەڭ ءتۇستى.
وسى سىندا كۇمىس مەدال ولجالاعان «Decade China Team» كومانداسىندا الەم چەمپيوندارى دين ليجەن مەن تسزيۋي ۆەنتسزيۋن باعىن سىنادى. بۇدان تاعى ەكى سۋپەرگروسس يۋي ياني جانە قاڭتاردا نيدەرلاند ەلىندە وتكەن ۆەيك-ان-زەەدەگى تۋرنيرىندە الەمنىڭ ۇزدىكتەرىن جەڭىپ, قارىمىن بايقاتقان ۆەي ي سىندى ساڭلاقتار دوداعا قوسىلدى.
دودا باستالماي-اق ساۋەگەيلەر بىلتىرعى الەم چەمپيونى «WR Chess Team» كومانداسىنا قىزدى-قىزدىمەن باس بايگەنى بايلاپ تا قويعان ەدى. ولاي تون ءپىشۋدىڭ دە ءجونى بار. سەبەبى كومانداعا الەمنىڭ بىرنەشە دۇركىن چەمپيونى, دۇنيەجۇزىلىك رەيتينگتىڭ كوشىن باستاپ تۇرعان نورۆەگ ماگنۋس كارلسەن مەن ايەلدەر اراسىندا شوقتىعى بيىك (الەمدىك رەيتينگتە 1-ساتىدا تۇر) قىتايلىق حوۋ يفان جەتەكشىلىك ەتتى. الەمنىڭ ەكس-چەمپيونى الەكساندرا كوستەنيۋك, يان نەپومنياششي, دۇنيەجۇزىلىك شاحمات وليمپياداسىنىڭ چەمپيونى نوديربەك ابدۋساتتوروۆ, الەم كۋبوگىنىڭ يەگەرى يان-كشيشتوف دۋدا, الەم چەمپيوناتىنىڭ كۇمىس جۇلدەگەرى ۆينسەنت كەيمەر سىندى ۇزدىكتەر توپتاستى. كىل مىقتىنى ماڭىنا جيعان ماگنۋس كارلسەننىڭ سايىپقىراندارىنا راپيد سايىسىنىڭ قولا مەدالى بۇيىردى.
بىراق بليتس دوداسىندا كارلسەننىڭ كومانداسى مىنەز تانىتىپ, قارسىلاستارىن قاپى قالدىردى. ەكى كەزەڭ قورىتىندىسىندا بۇل كوماندانىڭ قارىمىنا ەشكىم توتەپ بەرە المادى. «ا» توبىنان پلەي-وفف كەزەڭىنە وتكەن ماگنۋس كارلسەننىڭ كومانداسى 8/1 فينالدا «Hunnu Air» كومانداسىن قاپى قالدىرىپ, شيرەك فينالدىق تارتىستا «GMHans.com» ويىنشىلارىن جەڭدى. ال جارتىلاي فينالدا «Chessy» كومانداسىنىڭ شاحماتشىلارىن ەڭسەردى. «Chessy» كومانداسىندا ۆيديت سانتوش گۋدجراتي, ريحارد راپپورت, الەكسەي سارانا, يوردەن ۆان فورەست, حامپي كونەرۋ, اننا مۋزىچۋك باق سىنادى. بليتستەن فينالدىق سايىس اسا تارتىسپەن ءوربىدى. رەيتينگتەگى كورسەتكىش بويىنشا دا قارسىلاستان مىسى باسىم تۇرعان ماگنۋس كارلسەن باستاعان ساڭلاقتار ءۇندىستاننىڭ «Team MGD1» كومانداسىن دا قاپى قالدىردى. بىراق جەڭىس وڭاي كەلگەن جوق, ءتىپتى ماگنۋس كارلسەندى اردجۋن ەريگايسي جەڭىپ, كوپشىلىك كۇتپەگەن ناتيجە تىركەگەن. بىراق ونىڭ كومانداسىنداعى وزگە گروسسمەيستەرلەر سىن ساتىندە تاباندىلىق تانىتىپ, جەڭىسكە جەتتى. بليتس دوداسىنىڭ قولا مەدالى «Al-اin ACMG UAE» مەن «Chessy» كومانداسىنىڭ مۇشەلەرىنە بۇيىردى.
استانا قالاسىن دۇبىرگە بولەگەن دودانىڭ دۋىنا قوسىلعان ەلىمىزدىڭ كوماندالارى 10-14 ساتىعا تۇراقتادى. بىراق بۇل سىنعا تاشكەنت قالاسىندا جاسوسپىرىمدەر اراسىنداعى الەم چەمپيوناتىنا قاتىسىپ جاتقان الەم چەمپيونى قازىبەك نوگەربەك, ءامينا قايىربەكوۆا, ليا قۇرمانعاليەۆا, نازەركە نۇرعالي, اياۋلىم قالداروۆا, زارينا نۇرعاليەۆا سياقتى جاس تالانتتار باق سىناعان جوق. دەي تۇرعانمەن «Kazسhess» كومانداسىندا تالاي دوداعا قوسىلىپ ىسىلعان, تاجىريبەلى ءبيبىسارا اساۋباەۆا (ەكى دۇركىن الەم چەمپيونى), الىشەر سۇلەيمەنوۆ الديار اڭسات, قازاقستان شاحمات فەدەراتسياسىنىڭ ءبىرىنشى ۆيتسە-پرەزيدەنتى دارمەن سادۋاقاسوۆ, شاحريار مامەدياروۆ, الەكساندر گريششۋك سىندى ۇزدىكتەر تارتىسقا ءتۇستى. Astana-1 كومانداسىندا قازاقستاننىڭ بىرنەشە دۇركىن چەمپيوندارى پاۆەل كوتسۋر, پيوتر كوستەنكو, نۇرلان ىبىراەۆ, دەنيس ماحنيوۆ, رامازان جالماحانوۆ, ارىستانبەك ورازاەۆ, جاندوس اعمانوۆ, پەن مەرۋەرت كاماليدەنوۆا دوداعا قوسىلدى. ءۇشىنشى كوماندا Teniz Kazakhstan ساپىندا گروسسمەيستەر ءانۋار يسماعامبەتوۆ كاپيتاندىق مىندەتتى اتقارىپ, قاتارىنا 2023 جىلعى ازيا چەمپيوندارى ارىستان يسانجولوۆ پەن كسەنيا بالاباەۆا, ەدگار مامەدوۆ, ساۋات نۇرعاليەۆ, دانيال ساپەنوۆ سىندى ۇزدىكتەردى جيناعانىمەن, جۇلدەگە جەتە المادى.
كوماندالىق الەم چەمپيوناتىنىڭ جالپى جۇلدە قورى – 350 مىڭ ەۋرو. راپيدكە – 250 مىڭ ەۋرو, بليتسكە 100 مىڭ ەۋرو ءبولىندى. راپيد سىنىندا جەڭىسكە جەتكەن كوماندا ەنشىسىنە 100 مىڭ ەۋرو سىياقى جازىلسا, بليتستەن جەڭىسكە جەتكەن كوماندا مۇشەلەرىنە 40 مىڭ ەۋرو بەرىلدى. كۇمىس, قولا جۇلدەگەرلەر دە قوماقتى سىياقىعا كەنەلدى.
