باسقوسۋدا ايدار سايتبەكوۆ قۇقىق قورعاۋ ورگاندارىنىڭ قىزمەتىن جەتىلدىرۋ ماسەلەلەرىنە ەگجەي-تەگجەي توقتالدى. ءسوز اراسىندا ول قوعام الدىندا پوليتسيا وتانداستارىمىزدىڭ سەنىمدى ءارى قورعانىش تىرەگى رەتىندە قابىلدانۋى ءتيىس ەكەنىن اتاپ ءوتتى.
«قاۋىپسىزدىكتى قامتاماسىز ەتۋ سالاسىنداعى ماسەلەلەردى بىرلەسىپ انىقتاۋ جانە شەشۋ ءۇشىن پوليتسەيلەردىڭ ازاماتتارمەن ءتيىمدى سەرىكتەستىك قارىم-قاتىناس ورناتۋى قاجەت. ءاربىر ءتارتىپ ساقشىسى انتقا ادال بولۋى كەرەك, كۇندەلىكتى جۇمىستا زاڭدى قاتاڭ ۇستانۋى كەرەك», دەدى ىشكى ىستەر ءمينيسترىنىڭ ورىنباسارى.
ءىسساپار بارىسىندا وكىل شۇبارشىدا قازا بولعان ارنايى جاساق جاۋىنگەرى رۋسلان جولدىباەۆتىڭ اتىنداعى كابينەت اشىلۋىنا قاتىستى. باتىردىڭ ەرلىگى مەن جانقيارلىعىن ايشىقتاۋ جانە ماڭگى ۇلگى ەتۋ ماقساتىندا وتكىزىلگەن شاراعا اقتوبە وبلىسى پوليتسيا دەپارتامەنتىنىڭ باسشىلىعى مەن جەكە قۇرامى, ءىىو ارداگەرلەرى, وبلىس اكىمىنىڭ ورىنباسارى, مەكتەپ ۇجىمى, باتىردىڭ وتباسى – اناسى, جارى مەن قىزى, سونداي-اق وقۋشىلاردىڭ اتا-انالارى قاتىستى.
«قازاقتا « ۇلىم دەيتىن ەل بولماسا, ەلىم دەيتىن ۇل قايدان بولسىن» دەگەن قاناتتى ءسوز بار. ەلىم دەپ ەزىلىپ, جانىن قيعان رۋسلاننىڭ ەرلىگى – بويىمىزدا شەكسىز قۇرمەت پەن ماقتانىش سەزىمىن ۇيالاتسا, ەكىنشى جاعىنان ونىڭ قايعىلى قازاسى قابىرعامىزدى قايىستىرادى. ەل ءۇشىن تۋىپ, ەل ءۇشىن جانىن قيعان ەرىمىزدىڭ ەسىمىن ۇلىقتاۋ جانە ۇلگى ەتۋ ماقساتىندا وبلىس اكىمدىگىنىڭ قولداۋىمەن اشىلىپ وتىرعان بۇل سىنىپتىڭ ورەندەرى بولاشاقتا ەلىنە ادال قىزمەت ەتەتىن ازاماتتار بولارىنا سەنىمىمىز مول», دەپ اقتوبە وبلىسى پوليتسيا دەپارتامەنتىنىڭ باستىعى اباي ءجۇسىپوۆ باتىردىڭ اناسى مەن وتباسىنا قولداۋ سوزدەرىن ارناپ, العىسحات پەن گۇل شوقتارىن تابىستادى.
اقتوبە وبلىسى پد ارنايى ماقساتتاعى ءبولىنىسىنىڭ اعا ينسپەكتورى رۋسلان باققالي ۇلى جولدىباەۆ 2011 جىلدىڭ 1 شىلدەسىندە تەمىر اۋدانىندا ەكى پوليتسيا قىزمەتكەرىنىڭ ءومىرىن قيعان قارۋلى ءدىني ەسترەميستىك سيپاتتاعى قىلمىستىق توپپەن بەتپە-بەت اتىس كەزىندە جولداستارىن قورعاي وتىرىپ, اۋىر دەنە جاراقاتىن السا دا, جولداستارى شەگىنگەنشە اتىستى توقتاتپاي, قاندىقول قىلمىسكەرلەر قولىنان ەرلىكپەن قازا تاپقان. كەيىن پرەزيدەنت جارلىعىمەن «ايبىن» وردەنىمەن ماراپاتتالدى.
«قايسار بولمىس پەن انتىنا ادالدىقتىڭ ايقىن ۇلگىسى بولعان رۋسلان جولدىباەۆتىڭ ەرلىگى ماڭگى ەستە. وسى ماقساتتا ءوزى وقىعان اقتوبە قالاسىنداعى №13 ورتا مەكتەپتە باتىردىڭ اتىندا العاشقى اسكەري دايىندىق سىنىبى اشىلىپ وتىر. بۇل – ەڭ الدىمەن, وكشە باسىپ, اعا بۋىننىڭ ءىزىن جالعايتىن جاستارعا ۇلگى ونەگە. ءارى ەسەپسىز ەرلىكتى تاريحتا قالدىرۋدىڭ ءبىر تەتىگى», دەدى ىشكى ىستەر ءمينيسترىنىڭ ورىنباسارى.
6-سىنىپتىڭ 25 وقۋشىسى تاجىريبەلى ءتارتىپ ساقشىلارىنىڭ الدىندا ماقتانىشپەن ءارى تولقىنىس سەزىمىمەن سالتاناتتى تۇردە ادالدىق انتىن بەرىپ, رۋسلان جولدىباەۆ اتىنداعى سىنىپقا رەسمي تۇردە قابىلداندى. سونىمەن قاتار ءىس-شارادا پوليتسيا دەپارتامەنتىنىڭ جانە №13 ورتا مەكتەپتىڭ باسشىلىعى ءوزارا ىنتىماقتاستىق تۋرالى مەموراندۋمعا قول قويىپ, الداعى اۋقىمدى جۇمىستىڭ بىرلەسكەن باعىتىن ايقىندادى.
ايتا كەتەيىك, تاۋەلسىزدىك العان جىلداردىڭ ىشىندە ەلىمىزدە ىشكى ىستەر ورگاندارىنىڭ 817 قىزمەتكەرى قىزمەت بابىندا قازا بولعان.
