جاساندى ينتەللەكت: قارا جاشىكتىڭ مۇمكىندىكتەرى مەن الەۋەتى

ينتەرنەتكە «جاساندى ينتەللەكت» دەپ جازساڭىز, الدىڭىزدان روبوت بەينەسى, ميدىڭ سۋرەتى, كوپ تسيفرلار مەن تاڭبالار شىعا كەلەدى. ءبىزدىڭ سانامىزدا جاساندى ينتەللەكتىنىڭ بەينەسى وسىنداي. Yandex Qazaqstan كومپانياسىنىڭ جاساندى ينتەللەكت تەحنولوگيالارىن دامىتۋ جونىندەگى ديرەكتورى الەكساندر كراينوۆتىڭ ايتۋىنشا, نەگىزىندە جاساندى ينتەللەكت قارا جاشىك ىسپەتتى. بۇل جاشىكتىڭ ىشىندە كۇردەلى سحەمالار, نەيروندىق جەلىلەر بولادى. ول نەيروندىق جەلىلەر بىرنەشە قاباتتان, قاباتتار نەيرونداردان تۇرادى. نەيرون – قاراپايىم فورمۋلا. مۇندا بىرنەشە مالىمەت كەلىپ, ءبىر شەشىم شىعارىلادى.

جاساندى ينتەللەكتىنىڭ وقىتۋ جانە قولدانۋ دەگەن ەكى كەزەڭى بارىن ەسكەرسەك, ادام ازىرلەگەن روبوت وزدىگىمەن ەشتەڭە ۇيرەنە المايدى. ونىڭ باعدارلاماسىنا ءتۇرلى دۇنيەنى ەنگىزەتىن, وقىتاتىن – ادام. قانداي دا ءبىر روبوتتى جاساپ وزدىگىمەن جىبەرە سالساڭىز, ونىڭ قازىرگى دەڭگەيى مەن 10 جىلدان كەيىنگى دەڭگەيى ءبىر بولادى. ال ادام ميى كۇن سايىن جاڭا مالىمەت قابىلدايدى.

جالپى جاساندى ينتەللەكت تۋرالى تۇسىنىكتى جەتكىزۋ قيىن نارسە. ول تۋرالى ناقتى تۇسىنىك جوق. اركىم ءارتۇرلى پىكىر ايتادى. بىرەۋلەر جاساندى ينتەللەكت ادامعا ءتان قابىلەتتەردى جۇزەگە اسىرا الاتىن ماشينا دەيدى. الەكساندر كراينوۆ ونى ادام شەشە المايتىن ەسەپتەردى شەشۋگە قاۋقارلى قۇرال دەپ وتىر. ماسەلەن, ادام وپ-وڭاي  اقۋىز مولەكۋلاسىنىڭ قۇرىلىمىن ايتا المايدى. جاساندى ينتەللەكت ادام ميىنا كىرىپ-شىقپايتىن وسىنداي بولجامداردى بولجاي الادى. بىراق ول بارلىق جاعدايدا شىندىققا جاناسپاۋى مۇمكىن. سەنىمدىلىك ءۇشىن فاكتچەكينگ جاساعان ابزال.

قايتكەندە دە جاساندى ينتەللەكت ءبىزدىڭ ءومىرىمىزدىڭ ءبىر اجىراماس بولىگىنە اينالدى. قازىر ءبىز جاساندى ينتەللەكتىنىڭ تەحنولوگيالارىن عانا ەمەس ونىمدەرىن دە ءجيى قولدانىپ ءجۇرمىز. ءبىر قۋانتاتىنى قازىر قازاق ءتىلدى ونىمدەر دە كوبەيىپ كەلەدى. قازىر Yandex Qazaqstan كومپانياسى قازاق تىلىندە جاساندى ينتەللەكت ونىمدەرىن ازىرلەۋگە بەلسەندى تۇردە ينۆەستيتسيا سالىپ جاتىر. بۇل تۋرالى Qaz.AI جاساندى ينتەللەكتىنى دامىتۋ قاۋىمداستىعى ۇيىمداستىرعان ماستەر-كلاسس بارىسىندا بەلگىلى بولدى. بۇل قادام ەلىمىزدىڭ جاساندى ينتەللەكت سالاسىنداعى ۇستانىمىن ەداۋىر كۇشەيتۋگە جانە جاڭا تەحنولوگيالاردىڭ دامۋىنا ىقپال ەتۋگە باعىتتالعان.

Qaz.AI قاۋىمداستىعى قازاقستانداعى تەحنولوگيالىق كومپانيالاردى بىرىكتىرىپ, ءبىلىم مەن تاجىريبە الماسۋ پلاتفورماسى رەتىندە قىزمەت ەتەدى. قاۋىمداستىق قۇرىلعان ساتتەن باستاپ جاساندى ينتەللەكت سالاسىنداعى ۇلتتىق دامۋ مەن وپەراتسيالىق جۇيەلەردەگى وزگەرىستەردى رەتتەۋمەن اينالىسىپ كەلەدى. جاقىندا قاۋىمداستىق ماستەر-كلاسس وتكىزىپ, جاساندى ينتەللەكتىنى قوعامدا قالاي قولدانۋعا بولاتىنىن ءتۇسىندىردى. سونداي-اق وقۋ بارىسىندا قاتىسۋشىلار جاساندى ينتەللەكتىگە بايلانىستى ءتۇرلى ماسەلەلەر مەن مۇمكىندىكتەر تۋرالى تالقىلاپ,  بىلىمدەرىن تەرەڭدەتە ءتۇستى.

كەزدەسۋ بارىسىندا Qaz.AI جاساندى ينتەللەكتىنى دامىتۋ قاۋىمداستىعى Yandex Qazaqstan-نىڭ جاڭا مۇشەسى رەتىندە قوسىلعانىن حابارلادى. باسشىلىقتىڭ ايتۋىنشا, قازاقستاندا بۇل سەرىكتەستىك جاساندى ينتەللەكتىنى ەنگىزۋدى جىلدامداتادى ءارى بىرىگە كوتەرگەن جۇك جەڭىل بولارى انىق.

«Yandex Qazaqstan-نىڭ  قاۋىمداستىققا قوسىلعانىنا قۋانىشتىمىز. تاجىريبەلى, اۋقىمدى ساراپتاماسى بار Yandex Qazaqstan سياقتى ءىرى كومپانيانىڭ مۇشەلىك ەتۋى ءبىزدىڭ مۇمكىندىكتەرىمىزدى ايتارلىقتاي ارتتىرادى. يننوۆاتسيالاردى ىلگەرىلەتۋگە جانە ەلىمىز ءۇشىن نەگىزگى باستامالاردى قولداۋعا كومەكتەسە وتىرىپ, قازاقستاندا ۇلتتىق جاساندى ينتەللەكتىنى دامىتۋ باعىتىندا قىزمەت ەتەمىز»,  دەدى قازاقستانداعى جاساندى ينتەللەكتىنى دامىتۋ قاۋىمداستىعىنىڭ توراعاسى باقىتجان ەشمۇحامبەتوۆ.

جوعارىدا ايتىپ وتكەنىمىزدەي, Yandex Qazaqstan قازاق تىلىندە جي-ونىمدەرىن دايىنداۋعا ينۆەستيتسيا سالىپ جاتىر. وسى ۋاقىتقا دەيىن ازىرلەنگەن جۇمىستارىنىڭ ىشىنەن ۆيرتۋالدى كومەكشى – اليسانى, ىزدەۋ مۇمكىندىكتەرى مەن ۇلكەن گەنەراتيۆتى مودەلدەردى بىرىكتىرگەن نەيرو قىزمەتىن, ءماتىندى اۋدارۋعا كومەكتەسەتىن اقىلدى كامەرانى, ۆيدەونى قازاق تىلىنە اۋدارۋعا, دىبىستىق جولدى تالداۋعا جانە گرامماتيكالىق ەرەكشەلىكتەرىن ەسكەرۋگە مۇمكىندىك بەرەتىن ياندەكس براۋزەرىندەگى ۆيدەونىڭ نەيروجەلىلىك اۋدارماسىن ەرەكشە اتاپ وتۋگە بولادى. ولاردىڭ قاي-قايسىسى دا ۋاقىتتى ۇنەمدەۋگە, جۇمىستى جەڭىلدەتۋگە كوپ كومەك بەرەدى.

2024 جىلعى شىلدەدە پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا 2024-2029 جىلدارعا ارنالعان جاساندى ينتەللەكتىنى دامىتۋ تۇجىرىمداماسى بەكىتىلگەن-ءدى. قۇجات ەكونوميكانىڭ ءارتۇرلى سالالارىنا جاساندى ينتەللەكت تەحنولوگيالارىن ەنگىزۋدى جانە 2029 جىلعا قاراي جاساندى ينتەللەكت ونىمدەرىنىڭ سانىن بەس ەسەگە ارتتىرۋدى كوزدەيدى. سونىمەن قاتار بىلىكتى مامانداردى دايارلاۋ ءۇشىن جاساندى ينتەللەكت بويىنشا ءبىلىم بەرۋ باعدارلامالارىن كەڭەيتۋ جانە ەكونوميكادا مۋلتيپليكاتيۆتىك اسەر جاساۋ ءۇشىن وتاندىق كومپانيالاردىڭ قاجەتتىلىكتەرىن ەسەپكە الۋ جوسپاردا بار. اتالعان باستامالاردى Qaz.AI قاۋىمداستىعى Yandex Qazaqstan قىزمەتىنىڭ قولداۋىمەن جۇزەگە اسىرۋعا نيەتتى. بۇل قازاقستانعا جاساندى ينتەللەكت سالاسىندا كوشباسشى پوزيتسيالاردى الۋعا جانە ۇلتتىق يننوۆاتسيالىق ەكوجۇيەنى نىعايتۋعا كومەكتەسەدى.