فوتو: قازاق ۇلتتىق قىزدار پەداگوگيكالىق ۋنيۆەرسيتەتى
قىزدار بەينەلەنگەن مونۋمەنتالدى-ساندىك پانەلدى قازاق ۇلتتىق قىزدار پەداگوگيكالىق ۋنيۆەرسيتەتى ۇجىمى, قر سۋرەتشىلەر وداعى جانە مولداحمەت كەنباەۆتىڭ ۇلى بىرلەسە ساقتاپ قالماق. ۋنيۆەرسيتەت رەكتورى گۇلميرا قاناي جوبا دەمەۋشىلەرىنە قولداۋ كورسەتكەنى ءۇشىن العىسىن ءبىلدىرىپ, قالانىڭ مادەني مۇراسى ءۇشىن وسىنداي ارتەفاكتىلەردى ساقتاۋدىڭ ماڭىزدىلىعىن اتاپ ءوتتى.
«اسحانا عيماراتىنىڭ بۇزىلۋىنا بايلانىستى ۋنيۆەرسيتەت پانەلدەردى قالپىنا كەلتىرۋدى جانە جاڭا ورىنعا قايتا ورناتۋدى جوسپارلاپ وتىر, سونىڭ ارقاسىندا ونى قالا تۇرعىندارى دا كورە الادى. موزايكا تەك كوركەمدىك قانا ەمەس, سونىمەن قاتار تاريحي قۇندىلىققا يە. مولداحمەت كەنباەۆ پەن نيكولاي تسيۆچينسكي كوپتەگەن بىرەگەي پانەلدەر مەن ۆيتراجدار جاساپ, قازاقستاننىڭ مونۋمەنتالدى ونەرىندە ەلەۋلى ءىز قالدىردى. ولاردىڭ قازاق ەپوسىن بەينەلەگەن شىعارمالارى بۇگىندە قۇندى مادەني جادىگەرلەرگە اينالدى. الايدا ولاردىڭ كوپشىلىگى جوعالىپ كەتتى, بىزگە قالعان شىعارمالاردى ساقتاپ قالۋىمىز كەرەك», دەدى QyzPU رەكتورى.
قازاق كسر حالىق سۋرەتشىسى مولداحمەت كەنباەۆتىڭ ۇلى الپامىس كەنباەۆ تا سۋرەتشى-مونۋمەنتاليست, موزايكانى قالپىنا كەلتىرۋ پروتسەسىنە بەلسەندى اتسالىسىپ جاتىر. سۋرەتشى ونەردى بولاشاق ۇرپاق ءۇشىن ساقتاۋدىڭ ماڭىزدىلىعىن اتاپ ءوتتى جانە پانەلدەردى قالپىنا كەلتىرۋگە, جاڭا جەرگە ورناتۋعا كومەكتەسۋگە دايىن ەكەنىن جەتكىزدى. قر سۋرەتشىلەر وداعى دا موزايكانى قالپىنا كەلتىرۋ ءۇشىن جوبانى قولداۋعا دايىن.
«بۇل موزايكالىق پانەل – قازاق ۇلتتىق قىزدار پەداگوگيكالىق ۋنيۆەرسيتەتىنىڭ تاريحى. ال تاريحتى ۇمىتپاۋىمىز كەرەك. بۇل پانەلدىڭ جانىنان ءارتۇرلى كەزەڭدە قانشاما ستۋدەنت, قىزمەتكەرلەر ءوتتى. ۋنيۆەرسيتەت باسشىلىعىنا قازاقستان تاريحىن تۇسىنەتىن ادام كەلگەنىنە وتە قۋانىشتىمىن. جوندەۋ جۇمىستارى جۇرگىزىلگەندە موزايكالىق پانەلدەردىڭ ۇستىنەن قابىرعا سىلانعانى وتە وكىنىشتى. بۇل موزايكالىق پانەل – تۇتاس ءبىر ءداۋىر. تاريحتى ۇمىتپاۋ جانە ستۋدەنتتەردىڭ وتانعا دەگەن ماحابباتىن وياتۋ, ولارعا سۇلۋلىقتى كورۋدى ۇيرەتۋ وتە ماڭىزدى. ولار بۇل سۇيىسپەنشىلىكتى وقۋشىلارىنا دا جەتكىزۋى ءتيىس. قازىر موزايكانى قالپىنا كەلتىرۋ بويىنشا اۋقىمدى جۇمىس كۇتىپ تۇر, سمالتانىڭ ءتۇس سحەماسىن بارىنشا تاڭداۋ كەرەك. موزايكانى بولشەكتەۋ كەزىندە كەيبىر سمالتتار ءتۇسىپ كەتەدى, ولاردى جيناپ, پانەلگە قايتا بەكىتۋ سىندى جۇمىستار بار. پليتا جارىلىپ كەتۋى دە مۇمكىن, ونى دا قالپىنا كەلتىرۋ شارت. موزايكا قاجىرلى ەڭبەكتى تالاپ ەتەدى. وعان سمالتا, كافەل, شىنى سياقتى ماتەريالدار كەرەك. كەيبىر ماتەريالدار وزىمدە ساقتالعان. مۇنىڭ ءبارى ماتەريالدىڭ تۇسىنە بايلانىستى. ماسكەۋدەن نەمەسە سانكت-پەتەربۋرگتەن تاپسىرىس بەرۋگە تۋرا كەلەدى», دەدى الپامىس كەنباەۆ.
