فوتو: ۆەدومستۆو. تەلەگرام
سۋ رەسۋرستارى جانە يرريگاتسيا ۆەدومستۆوسىنىڭ ءمالىم ەتۋىنشە سالا ءمينيسترى نۇرجان نۇرجىگىتوۆتىڭ وسى تۇرعىداعى وزبەك تاراپىمەن مامىلەسى ناتيجەسىندە كەلىسىلگەن سۋ كولەمى كەلىپ وتىر. سۋارۋ كەزەڭىنىڭ سوڭىنا دەيىن وزبەكستان تاعى 1 ملرد تەكشە مەتر سۋ جىبەرمەك.
بۇگىندە شاردارا سۋ قويماسىندا 2,6 ملرد تەكشە مەتر سۋ بار, بۇل وتكەن جىلمەن سالىستىرعاندا 689 ملن تەكشە مەترگە ارتىق. وعان جالپى كولەمى 3,9 ملرد تەكشە مەتر سۋ كەلدى.
ءوز كەزەگىندە شاردارا سۋ قويماسىنان سىرداريا وزەنىنىڭ تومەنگى اعىسىنا 3,6 ملرد تەكشە مەتر سۋ جىبەرىلگەن. بۇل بىلتىرعى كورسەتكىشپەن سالىستىرعاندا 950 ملن تەكشە مەترگە ارتىق. قىزىلقۇم كانالىنا 700 ملن تەكشە مەتر سۋ, ال 400 ملن تەكشە مەتر سولتۇستىك ارال تەڭىزىنە جىبەرىلدى.
«توقتوعۇل جانە باحري-توچيك سۋ قويمالارىنىڭ جۇمىس كەستەسىن كورشىلەرىمىزبەن الدىن الا كەلىسۋدىڭ ناتيجەسىندە «دوستىق» مەملەكەتارالىق كانالىنىڭ قازاقستان تاراپى بولىگىنە سۋ تۇراقتى تۇردە كەلىپ وتىر. اتالعان كانال ارقىلى ەلىمىزگە قازىر سەكۋندىنا 90 تەكشە مەتر سۋ كەلەدى. بۇل تۇركىستان وبلىسى شارۋالارىن سۋارمالى سۋمەن تولىق قامتاماسىز ەتۋ ءۇشىن جەتكىلىكتى», دەدى مينيسترلىكتىڭ رەسمي وكىلى ءمولدىر ابدۋاليەۆا.
