فوتو: اشىق دەرەككوزدەن
ولار قازىرگى ۋاقىتتا ح.ماقاجانوۆ اتىنداعى كوپبەيىندى اۋرۋحاناسىندا ەم-دوم قابىلداپ جاتىر. كاسىپورىن باسشىلارى دا زارداپ شەككەندەرگە كومەك كورسەتىپ, جۇمىسكەرلەرىنە الاڭداپ, اۋرۋحانانىڭ مەديتسينالىق قىزمەتكەرلەرىمەن بايلانىسىن كۇشەيتىپ وتىر.
– بەس ناۋقاس – جانساقتاۋ بولىمىندە. ۇشەۋى – قارقىندى تەراپيا بولىمىندە. دارىگەرلەر ناۋقاستاردى ءجىتى باقىلاپ, ەدەل-جەدەل ەم-دومىن جاساپ وتىر, – دەيدى پروفەسسور ح.ماقاجانوۆ اتىنداعى كوپسالالى اۋرۋحانانىڭ تراۆماتولوگيالىق ورتالىعىنىڭ باسشىسى بەرىك تىلەۋباەۆ.
دەنساۋلىق ساقتاۋ مينيسترلىگىنىڭ تاپسىرماسىمەن قوسىمشا مەديتسينالىق كومەكتى كورسەتۋ ءۇشىن قاراعاندىعا اكادەميك ن.باتپەنوۆ اتىنداعى ۇلتتىق تراۆماتولوگيا جانە ورتوپەديا عىلىمي ورتالىعىنىڭ ديرەكتورى ولجاس بەكارىسوۆ باستاعان قىزمەتكەرلەر ارنايى كەلدى. مەديتسينالىق توپتىڭ قۇرامىندا تاجىريبەلى كومبۋستيولوگ-رەانيماتولوگتار بار.
فەرروقورىتپا زاۋىتىندا بولعان جازاتايىم وقيعانىڭ سەبەپتەرى مەن ءمان-جايلارىن انىقتاۋ ءۇشىن ەڭبەك زاڭناماسىنا سايكەس ارنايى كوميسسيا قۇرىلدى. ونى ەڭبەك ينسپەكتسياسى باسقارماسىنىڭ باسشىسى مۇرات قاراقەكىلوۆ باسقارادى. كوميسسيا قۇرامىندا بارلىق ۋاكىلەتتى مەملەكەتتىك ورگانداردىڭ وكىلدەرى بار.
وقيعا ورنى تەكسەرىلىپ, جازاتايىم وقيعانىڭ كۋاگەرلەرىنە ساۋالناما جۇرگىزىلدى, تەحنيكالىق قۇجاتتامامەن تانىسۋ جۇمىستارى ءجۇرىپ جاتىر.
زاۋىتتاعى وقىس وقيعانى تەرگەپ-تەكسەرۋ جۇمىستارى وبلىس باسشىلىعىنىڭ تۇراقتى باقىلاۋىندا. وبلىس اكىمى ەرماعانبەت بولەكپاەۆ زارداپ شەككەن قىزمەتكەرلەردىڭ تۋىستارىمەن كەزدەسىپ, دارىگەرلەرمەن سويلەسىپ وتىر.
– وزدەرىڭىز بىلەتىندەي, فەرروقورىتپا زاۋىتىندا شتاتتان تىس جاعداي بولدى. وكىنىشكە قاراي, 8 قىزمەتكەر زارداپ شەكتى. قازىر بارلىعىنا تولىق كولەمدە قاجەتتى مەديتسينالىق كومەك كورسەتىلۋدە. مەديتسينا قىزمەتكەرلەرى قولدان كەلگەننىڭ ءبارىن جاساپ جاتىر, – دەدى ەرماعانبەت قابدۋلا ۇلى.
زارداپ شەككەن بەس ادامنىڭ جاعدايى وكىنىشكە قاراي وتە اۋىر. ال ۇشەۋىنىڭ جاعدايى اۋىر. بۇل تۋرالى وبلىستىڭ دەنساۋلىق ساقتاۋ باسقارماسىنىڭ باسشىسى بيبىگۇل تولەگەنوۆا ايتىپ وتىر. قازىر شوكقا قارسى بارلىق كەشەندى تەراپيا جۇرگىزىلىپ جاتقانىن قوسا مالىمدەدى.
بۇل وقيعاعا بايلانىستى فەرروقورىتپا زاۋىتىندا قىلمىستىق كودەكستىڭ قك 156-بابىنىڭ 2-بولىگى بويىنشا, ياعني, «ابايسىزدا دەنساۋلىققا اۋىر زيان كەلتىرۋگە اكەپ سوققان ەڭبەكتى قورعاۋ ەرەجەلەرىن بۇزۋ» بويىنشا قىلمىستىق ءىس تە قوزعالدى.
– كوميسسيا قۇرامىنا بارلىق ۋاكىلەتتى مەملەكەتتىك ورگانداردىڭ وكىلدەرى كىردى. جۇمىس ءبىرىنشى كۇننەن باستالىپ كەتتى. ءار وكىل ءوز باعىتىن پىسىقتاپ جاتىر. باستاپقىدا وقيعا بولعان جەر تەكسەرىلدى, جازاتايىم وقيعانىڭ كۋاگەرلەرىنە ساۋالناما جۇرگىزىلدى. ەندى تەحنيكالىق قۇجاتتامامەن تانىسىپ جاتىرمىز, – دەدى مۇرات قاراقەكىلوۆ.
تەرگەۋ شارالارى بويىنشا قورىتىندى جاسالادى.
– بۇل جۇمىستى سىزدەر بارلىق جاۋاپتى مەملەكەتتىك ورگاندارمەن, سونىڭ ىشىندە, قۇقىق قورعاۋ ورگاندارىمەن تىعىز ىنتىماقتاستىقتا جۇرگىزۋلەرىڭىز كەرەك. تۇبەگەيلى جانە وبەكتيۆتى تۇردە! – دەپ تاپسىرما جۇكتەدى ايماق باسشىسى.
