القاپتىڭ جارتىسى جويىلعانى – راسىندا دا قۋانىشتى جاڭالىق. بىراق مۇنىمەن ءىس ءبىتتى مە, ەسىرتكى وسىرۋگە داعدىلانعانداردىڭ قاراسى سيرەدى مە؟
وبلىس اۋماعىنداعى قاراسورا القابى ازايعانىمەن, ەستى الاتىن ەسىرتكىگە اڭسارى اۋعاندار ازايماي تۇرعان سەكىلدى. وعان «قاراسورا-2024» ناۋقانى كەزىندە تاعى دا كوز جەتكىزگەندەي بولدىق. مەركىلىك ازامات ءىرى كولەمدە كەپتىرىلگەن جانە كەپتىرىلمەگەن ماريحۋانا جيناعانى ءۇشىن ۇستالدى.
جالپى, جابايى قاراسورامەن كۇرەسۋ ءۇشىن جىل سايىن الدىن الۋ ءىس-شاراسى وتكىزىلەدى. ءبىر سوزبەن ايتقاندا, ەسىرتكىگە ەسى كەتكەندەردىڭ ايىلىن جيدىرۋ ءۇشىن قۇزىرلى ورگاندار تاراپىنان اۋىز تولتىرىپ ايتارلىقتاي جۇمىس اتقارىلىپ جاتىر. الايدا سوعان قاراماستان ءىرى مولشەردە ەسىرتكى جيناعاندار جىل سايىن ۇستالىپ جاتادى. ولاردىڭ قاتارىندا ەسىرتكىنى بيزنەسكە اينالدىرعاندار دا بارشىلىق.
وبلىستىق پوليتسيا دەپارتامەنتىنىڭ ءباسپاسوز قىزمەتى كەلتىرگەن دەرەككە جۇگىنسەك, 42 جاستاعى مەركىلىك ازاماتتى پوليتسەيلەر «قاراسورا-2024» ناۋقاندىق ءىس-شاراسى كەزىندە قولعا تۇسىرگەن. سوت-حيميالىق ساراپتامانىڭ قورىتىندىسىنا سايكەس مەركى اۋدانىنىڭ ازاماتىنان 39,7 كيلوگرامم كەپتىرىلگەن جانە 22 كيلوگرامم كەپتىرىلمەگەن ماريحۋانا تاركىلەنگەن. قىرىقتىڭ قىرقاسىنا شىققان ازامات ءوز كىناسىن تولىقتاي مويىنداعان.
«كۇدىكتى قاس قارايعان شاقتا قولعا ءتۇستى. شىنتۋايتىنا كەلسەك, ەسىرتكى ساتۋمەن اينالىساتىندار ءتۇن قاتىپ جۇمىس ىستەيتىنى بەلگىلى. مۇنىڭ ءبارىن جەتىك بىلگەندىكتەن, ءبىز ىلكى ساتكە دە دامىل تاپپاي, توقتاۋسىز جۇمىس ىستەپ جاتىرمىز. اسىرەسە جابايى قاراسورا قاۋلاپ وسكەن كەزەڭدە جۇمىستى توقتاتۋعا قاقىمىز جوق. كۇدىكتى ازاماتقا قاتىستى اسا ءىرى مولشەردە ەسىرتكى زاتتارىن زاڭسىز ساقتاعانى ءۇشىن سوتقا دەيىنگى تەرگەۋ امالدارى باستالدى», دەيدى وبلىستىق پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ باسشىسى ءالىم باجىقباەۆ.
وبلىستىق پوليتسيا دەپارتامەنتىنىڭ ءباسپاسوز قىزمەتى كەلتىرگەن دەرەككە سەنسەك, ءوز كىناسىن تولىق مويىنداعان كۇدىكتى ۋاقىتشا ۇستاۋ يزولياتورىنا قاماققا الىنعان. ول بۇرىن دا ەسىرتكى قىلمىسىمەن قۇرىقتالىپ, ءىستى بولعان ەكەن.
ىلگەرىدە پوليتسيا قىزمەتكەرلەرى 35 جىل بويى بايىرعى كارتامەن جۇمىس ىستەپ كەلگەنى ءمالىم. ەرتەرەكتەگى دەرەك بويىنشا, جابايى قاراسورا وسىرىلەتىن القاپ 138 مىڭ گەكتاردان اسىپ جىعىلاتىن. جاقىندا عانا جاسالعان جاڭا كارتا القاپتىڭ ەكى ەسەگە ازايعانىن ايقىنداپ بەردى. ەندى ەسىرتكى وسىرۋشىلەرمەن كۇرەس پوليتسيا قىزمەتكەرلەرى ءۇشىن بۇرىنعىداي قيىن بولا قويماس.
جامبىل وبلىسى
